Құрамында Эльмир Әлімжанов, Руслан Құрбанов, Ерлік Сертай, Вадим Шарлаимов сынды семсерлесушілері бар Қазақстан командасы Халықаралық семсерлесу федерациясының (FIE) жаңартылған рейтингінде төртінші орынға көтерілді. Бұл – спорттың осы түрінде жерлестеріміз үшін бұрын-соңды болмаған көрсеткіш.
Бүгін Қытайдың Макаосында UFC Fight Night турнирі өтеді. Негізгі жарыста Қытайдың қазағы Мақсат Қайсар (10-3) бразилиялық Николас Моттамен (14-5) күш сынасады. Ал Қытайда дүниеге келген тағы бір қандасымыз Бағлан Жеңісұлы (18-5) іріктеу сынында оңтүстіккореялық Су Ён Югенмен (13-3) шеберлік байқасады. Осы жекпе-жекте жеңіске жеткен файтер әлемдегі ең белді промоушенде өнер көрсету құқығына ие болады.
Жапонияның Наганосында конькимен жүгіруден Әлем кубогінің кезеңдік сайысы басталды. Бұл жарыста Надежда Морозова, Кристина Шумекова, Кристина Силаева, Инесса Шумекова, Маргарита Галиева, Алина Шумекова, Дарья Важенина, Мария Деген, Виталий Щиголев, Нұрәлі Ақжол, Бақдәулет Сағатов, Роман Биназаров, Евгений Кошкин, Алтай Жәрдембекұлы, Никита Важенин, Вадим Якубовский бақ сынайды.
Қазақтың атақты боксшысы, әлем және Азияның екі дүркін чемпионы, Дүниежүзілік әскерилер ойындарының жеңімпазы Теміртас Жүсіпов 12 желтоқсанда Бахрейнде өтетін «IBA Чемпиондар түні» додасына қатысады. Аса жеңіл салмақта күш сынасып жүрген 36 жастағы ардагер спортшының қарсыласы әлі анықталған жоқ.
Әйгілі Goal.com сайты футболдан 2026 жылы өтетін әлем чемпионатының фавориттерін анықтады. Бас жүлдеден басты үміткерлер тізімін Испания құрамасы бастап тұр. Үздіктер көшінде Аргентина, Германия, Англия, Франция бар. Сондай-ақ Португалия, Италия, Нидерланд, Колумбия, Бразилияның да әлеуеттері жоғары бағаланады.
Испанияның Малага қаласында ұйымдастырылған Дэвис кубогінің жартылай финалына шыққан командалар толықтай анықталды. Бұл межеде Италия мен Аустралия, Германия мен Нидерланд теннисшілері өзара күш сынасады.