Жарыс күнделігі

Шорт-тректен Италияның Бормио қаласында өткен «Alta Valtellina Trophy» турнирінде Валерий Клименко 500 метрлік сайыста күміс медальды иеленді. Дәл осы қашықтықта бақ сынаған Айбек Темірхан бесінші орынға табан тіреді. Келесі күні қоржынымыз қос алтынмен толықты. Оның иегерлері – Нұртілек Қажығали (1000 метр) мен ерлер құрамасы (эстафета). Қытайдың Макаосында ұйымдастырылған UFC «Fight Night» турнирінде қытайлық бауырымыз Мақсат Қайсар (10-3) бразилиялық Николас Моттамен (14-5) күш сынасты. Өкінішке қарай, бұл жарыста қандасымыздың жолы болмады. Ол қарсыласына ұпай санымен есе жіберді. Ресейлік Юлия Готовкомен жұптасып өнер көрсеткен Жібек Құламбаева Португалияда өткен ITF турнирінің жеңімпазы атанды. Финалда олар Полина Яценко (Ресей) мен Ханне Вандевинкельден (Бельгия) 6:3, 1:6, 10:4 есебімен басым түсті. Ал жекелеген бәсекеде Жібек 1/8 финалда сүрінді. Ол германиялық Катарина Хобгарскиге жол берді – 2:6, 0:6. 6-15 желтоқсан аралығында Бахрейннің астанасы – Манамада әлем чемпионаты өтетіні белгілі. Аса жауапты жарыс қарсаңында оқу-жаттығу жиынын Алматы облысы аумағында өткізген отандық зілтеміршілеріміз соңғы дайындық жұмыстарын Парсы шығанағында пысықтауды жөн көрді. Кеше жерлестеріміз Манамаға аттанды. Аралас жекпе-жектен Алма­тыда өткен «Найза 69» турнирінің басты бәсекесінде Рүстем Құдай­бергенов (8-5) украиналық Даниил Донченкомен (10-2) айқасты. Бес раундқа созылған жеңіл салмақ­тағы чемпиондық тәж жолындағы тартыста қазақ файтері қарсы­ласынан ұпай санымен ұтылды. Құрлықтық хоккей лигасында (ҚХЛ) күш сынасып жүрген «Барыс» кезекті тур ойынын Астанада Ом­бының «Авангардына» қарсы өт­кізді. Бәсеке барысында екі шайба айырмашылығымен алда келе жатқан жерлестеріміз ақыры овертаймда 2:3 есебімен жеңілістің кермек дәмін татты.