Жапонияның Хатинохе қаласында конькиден «Төрт құрлық біріншілігі» аяқталды. Осы жарыстың командалық сайысында бас жүлдені олжалаған Қытай құрамасы сапында қазақ қызы Ақнар Ардақ өнер көрсетті. Екінші, үшінші орындарды Жапония, Оңтүстік Кореяның конькишілері иеленді.
Семсерлесуден Канаданың Ванкувер қаласында жалауы желбіреген Әлем кубогінің кезеңдік сайысында еліміздің шпагашылары қола медальді еншіледі. Үшінші орынға тартыста жерлестеріміз Франциядан 35:34 есебімен басым түсті. Бұл бәсекеде ел намысын Руслан Құрбанов, Элмир Әлімжанов, Вадим Шарлаимов, Ерлік Сертай қорғады. Мажарстан мен Жапония құрамалары арасында өткен финалдық айқас қарт құрлық өкілдерінің пайдасына шешілді.
Теннисшілердің әлемдік рейтингі қайта жаңартылды. WTA тізімінде Елена Рыбакина алтыншы орында. Ол Арина Соболенко (Беларусь), Ига Швентек (Польша), Коко Гауф (АҚШ), Жасмин Паолини (Италия), Циньвэнь Чжэннен (Қытай) кейін орналасқан. АТР рейтингінде Янник Синнердің (Италия) өзгелерден көші ілгері. Оны Александр Зверев (Германия), Карлос Алькарас (Испания), Тейлор Фриц (АҚШ), Даниил Медведев (Ресей) өкшелеп келеді. Отандастарымыз арасынан Александр Бубликтің ғана аяқалысы тәуір. Ол 33-орында.
13-15 желтоқсан аралығында Норвегияда ардагерлер мен қазіргі үстел теннисінің әлем жұлдыздарының қатысуымен алғашқы Вальднер кубогі өтеді. Азия құрамасының намысын Ма Лонг, Чэнь Мэн, Джанг Вуджин, Лим Джонхун, Шин Юбин, Маника Батрамен бірге еліміздің бірінші ракеткасы Кирилл Герасименко қорғайды. Сондай-ақ додада Ян-Уве Вальднер, Трульс Морегард, Дмитрий Овчаров, Уго Калдерано, Адриана Диас, Бернадет Сёч сынды дүлдүлдердің де өнерін тамашалаймыз.
Таяу күндері фристайл-могулдан Финляндияның Рука қаласында тұсауы кесілетін Әлем кубогінің кезеңдік сайысында Юлия Галышева, Павел Колмаков, Анастасия Городко, Аяулым Әміренова, Антон Бондарев, Фёдор Бугаков бақ сынайды.
Танымал аралас жекпе-жек шебері, отандық «Найзаның» чемпионы Диас Еренғайыпов өзінің келесі кездесуін 13 желтоқсанда Бахрейнде өткізеді. Жергілікті BRAVE промоушені ұйымдастырғалы отырған жарыста қандасымыз бразилиялық Марсиано Ферейрамен (12-2) айқасады.
Алматының «Қайрат» футзал клубы Хорватияға аттанып кетті. Сол жақта олар УЕФА Чемпиондар лигасының элиталық кезеңіндегі бәсекелерге қатысады. В тобында ойнайтын жерлестеріміз «Олмиссум» (Хорватия), «Этуаль» (Франция), «Динамо» (Загреб, Хорватия) клубтарымен күш сынасады. Бұл бәсекелер 26 қараша – 1 желтоқсан аралығында өтеді.
Теннистен Дэвис кубогінің жеңімпазы анықталды. Финалда Италия мен Нидерланд құрамалары күш сынасты. Жартылай финалда Апеннин түбегінің түлектері Аустралиядан айласын асырса, қызғалдақтар елінің өкілдері Германияны жолынан ығыстырды. Шешуші сайыста бағы жанған италиялықтар бас жүлдені олжалады. Жеңімпаз команданың сапында Янник Синнер, Лоренцо Музетти, Андреа Вавассори, Симоне Болелли, Маттео Берреттини сынды саңлақтар ойнады.