Жанға жайлы бес мекен

«Щучье – Бурабай» курорттық аймағы

Щучье – Бурабай курорттық аймағы – еліміздегі қысқы демалыстың негізгі бағыттарының бірі. Өңір туристерді тұмса табиғатымен, таза ауасымен, жоғары деңгейдегі жайлылығымен бір­ден баурайды. 2024 жылғы қаңтар-маусым аралы­ғында өңірде туристік ағынның айтарлықтай арт­қаны байқалды. Орналастыру орындарының саны 203-ке жетіп, қызмет көрсетілген қонақ­тар саны 143 629 адам болды. Бұл өткен жыл­дың сәйкес кезеңімен салыстырғанда 10 949 адамға көп. Инфрақұрылымның дамуы мен қыз­мет көрсету сапасының жақсаруы аймақтың тартым­дылығын арттыруда маңызды рөл атқарады.

 

Алматы тау кластері

Алматы тау кластері қысқы спортты ұнататын­дарға белсенді демалыстың алуан түрін ұсынады. Тау кластері Қаскелең мен Түрген таулары арала­рын қамтиды. Құрамына қала аумағындағы Шым­бұлақ, Алматау, Бутаковка, Табаған, Орман ерте­гісі, Ақбұлақ секілді тұмса табиғат аясындағы көрік­ті жерлер кіреді. 2024 жылдың бірінші жарты жыл­дығында таулы өңір 1,2 миллионнан астам қонақты қа­былдап, орналас­тыру орындарының саны 518-ге жет­кен. Алматы тау кластері инфрақұрылым мен қыз­мет көрсету деңгейін ұдайы жетілдіріп отырады, отандық, шетелдік турис­терге одан сайын тартымды ете түседі.

 

Катонқарағай курорттық аймағы

Катонқарағай курорттық аймағының табиғаты – тыныш әрі оңаша демалысты сүйетіндерге таптырмас орындардың бірі. 2024 жылдың алғашқы алты айында курорттық аймақ өткен жылдың осы кезеңімен салыстырғанда екі есе көп қонақ қабылдап, ұсынылған қызметтердің көлемі 17,7 миллион теңгеге өскен.

 

Шарын шатқалы

Шарын шатқалы – қыс мезгілінде ерекше атмос­фераға бөленіп, табиғат сұлулығын бағалай­тын туристерге шабыт сыйлайтын мекен. Кеңейтілген инфрақұрылым мен жаңа демалыс орындары аймақ­тың туристік тартымдылығын арттыруда маңызды рөл атқарып отыр. Шарын шатқалы келушілерге таңға­жайып табиғат көріністерімен демалуға ыңғайлы мүмкіндіктер ұсынады.

 

Көкшетау және оның айналасындағы көлдер

Көкшетау және айналасындағы көлдер шаңғы әрі сноуборд тебу сияқты тыныш демалыс пен бел­сенді көңіл көтеруге арналған тамаша демалыс орын­дарын ұсынады. Қазір де аймақтың туристік инфрақұры­лымы қарқынды дамып келеді. Бұл өз кезегінде өңірді отбасылық қысқы демалыс орны ретінде тартымды етеді.