Жарыс күнделігі

Шорт-тректен еліміздің әйелдер құрамасы Бейжіңдегі «World Tour» турнирінің кезеңдік сайысын үшінші орынмен қорытындылады. Біздің команда сапында Мәлика Ермек, Алина Әжіғалиева, Яна Хан, Ольга Тихонова өнер көрсетті. Бас жүлдені Оңтүстік Корея олжаласа, Қытай күміске қол созды. Санкт-Петербуртегі «Наше дело» деп аталатын промоушен ұйымдастырған турнирде Асылжан Бақытжанұлы (15-4-1) кезінде UFC-де өнер көрсеткен ресейлік Шәміл Гамзатовпен (14-2) күш сынасты. Үш раундтың қорытындысында барлық төреші біздің жігіттің мықтылығын бірауыздан мойындады. 22 ақпанда Эр-Риядта орта салмақтағы кәсіпқой боксшылар – доминикандық Карлос Адамес пен ұлыбританиялық Хамза Шираздың жұдырықтасатыны белгілі. Олар WBC-тің алтын белбеуі үшін таласады. Осы кездесуде жеңіске жеткен саңлақ екі бірдей белді нұсқаның чемпионы Жәнібек Әлімханұлымен жекпе-жекке шығады. Бұл жайында Сауд Арабиясының ойын-сауық істері бойынша бас басқарма төрағасы, бокстың суперинвесторы Түрки Әл аш-Шейх мәлімдеді. Егер осы жоспар жүзеге асса, онда жер-жаһан жанкүйерлері алапат айқастың куәсі болатыны анық. Грэпплингтен екі дүркін әлем чемпионы Самат Айтпанбетке «допинг қолданды» деген айып тағылды. Бұл ақпарат Халықаралық тестілеу агенттігінің (ITA) ресми сайтында жарияланды. Егер ол расталса, онда 27 жастағы алматылық арлан биыл Астанада өткен дүниежүзілік додада олжалаған бас жүлдесінен айырылып, бірер жылға үлкен спорттан шеттетіледі. Ал оның алтыны еліміздің тағы бір белді грэпплері Нұрбек Мырзалиновке табыс етіледі. Дәл сол спортшыны Самат елордада өткен жарыстың финалында ұтқан еді. Швейцарияның Ньон қаласында футболдан 2025/26 жыл­дары ұйымдастырылатын жасөспірімдер (U-17) арасындағы Еуро­па чемпионатының бірінші кезеңінің жеребесі тартылды. Еліміз ­8-топқа түсті. Қарсыластарымыз – Хорватия, Нидерланд, Алба­ния. 14 топтың әрқайсысында бірінші, екінші орынды иеленген ­командалар А лигасының екінші кезеңіне өтеді. Қалғандары В лигасында бақ сынайды. Ал жарыстың финалдық бөлігінің шымылдығы Эстонияда түріледі. Астананың «Барысы» ҚХЛ-дың тұрақты біріншілігінде қатарынан сегізінші рет жеңіліс тапты. Жұма күні біздің хок­кейшілер Череповецте жергілікті «Северстальға» 3:5 есебімен ұтылды. Жексенбіде Санкт-Петербургтің СКА-сы сан соқтырып кетті – 0:1.