2025 жылдың 1 қаңтарынан бастап Румыния мен Болгария Шенген аймағының толыққанды мүшесі болады. Бұл Еуропадағы саяхат, сауда және туризм үшін жаңа мүмкіндіктер ашады, деп хабарлайды Egemen.kz.
Шешімді Еуропалық Одақ Кеңесі қабылдап, Еуропалық комиссия келісім береді. Еуропалық комиссияның мәлімдемесіне сәйкес, 2025 жылдың басынан бастап Румыния, Болгария және басқа Шенген елдері арасындағы ішкі шекаралық бақылау жойылады. Енді бұл елдердің тұрғындары Шенген аймағының ішінде құрлық шекараларында қосымша тексерулерге тап болмай-ақ жүре алады.
Румыния мен Болгарияның Шенгенге қосылу процесі 2023 жылы басталды. 2023 жылдың желтоқсан айынан бастап бұл елдердің ішкі әуе және теңіз шекараларында бақылау алынып тасталды, ал 2024 жылдың 31 наурызынан бастап Шенген визаларын беруді реттейтін жаңа ережелер күшіне енді. Осылайша, екі ел де өз азаматтары мен саяхатшылары үшін қауіпсіздік пен жеңілдетілген процестерді қамтамасыз ете отырып, Шенген стандарттары бойынша жұмыс істей бастады.
Румыния мен Болгарияның Шенгенге қосылуы Еуропалық Одақтың бірлігін нығайту жолындағы маңызды қадам болмақ.
«Бүгін барлық болгарлар, румындар және біздің бүкіл Одақ үшін қуанышты оқиға», деді Еуропалық комиссия төрағасы Урсула фон дер Лейен.
Оның айтуынша, Шенгенге кіру арқылы Румыния мен Болгарияның Еуроодақтың басқа елдерімен экономикалық және мәдени байланыстарын нығайтуға бұдан да көп мүмкіндіктері болады. Қауіпсіз және ыңғайлы саяхат тек ел азаматтары үшін ғана емес, сонымен қатар туристер мен кәсіпкерлер үшін де қолжетімді болады, бұл аймақтағы экономикалық өсім мен сауданың дамуына оң әсер етеді.
Шенген аймағы 450 миллионға жуық адамды біріктіретін әлемдегі ең көп келетін аумақ болып қала береді. Еуропалық ішкі істер комиссары атап өткендей, Румыния мен Болгарияның Шенгенге қосылуы аймақтың қауіпсіздігін нығайтып қана қоймай, оның әлемдік аренадағы маңызын арттырады.