Кеше Қазақстан Парламенті Сенаты Төрағасының орынбасары Мұхамбет Көпеев Кувейт мемлекеті Халық Ассамблеясының депутаты, “Кувейт-Қазақстан” достық тобының төрағасы Уалид Мусаид әл-Табтабаи бастаған парламенттік делегациямен кездесті, деп хабарлады осы палатаның баспасөз қызметі.
Кездесу барысында М.Көпеев бұл сапардың парламентаралық байланыстарды одан әрі ілгерілетудегі және мемлекетаралық қатынастарды дамытудағы халық дипломатиясының маңызын атап өтті.
Сенат қызметі мен құрылымын таныстыра келіп, Төраға орынбасары мемлекеттік органдар жүйесіндегі Парламенттің рөлі туралы әңгімеледі. Қазақстанның сыртқы саясатына қатысты М.Көпеев біздің еліміздің халықаралық құрылымдарға белсене араласып келе жатқаны туралы айта келіп, жаһандық өркениетаралық және дінаралық үнқатысуды дамыту, толеранттылық және төзімділікті нығайтудағы Астананың бастамаларына тоқталды.
У.М. әл-Табтабаи өз кезегінде екі мемлекеттің заң шығарушы органдары арасындағы ынтымақтастықты белсенділендіруде осы сапардың маңызды қадам болатынын атап өтті. Оның пікірінше, заң шығару саласындағы тәжірибе алмасу және кеңесулер парламентаралық байланыстарды жаңа деңгейге көтеретін болады.
Кувейт Халық Ассамблеясының депутаты толеранттылық және дінаралық келісім саласындағы біздің еліміздің жетістіктерін жоғары бағалады және араб әлеміндегі Қазақстанның ерекше орны мен Орталық Азия өңіріндегі жетекші рөлін атап өтті.
У.М. әл-Табтабаи Қазақстан алдағы жылы Ислам Конференциясы Ұйымы төрағасының лауазымында маңызды миссияны табысты атқаратынына сенім білдірді.