Ақтөбедегі «FIBC Kazakhstan» ЖШС мұнай-газ өнеркәсібі, құрылыс, тұрмыстық техника және автомобиль өндірісінде кеңінен қолданылатын полипропилен шикізатын өңдеу арқылы қапшық, вагон төсеніші мен қаптама, шатыр, техникалық таспаларды сатылымға шығарады. 8 жыл бұрын шағын цех түрінде ашылған кәсіпорын бүгінде 104 адамды тұрақты жұмыспен қамтып отырған іргелі өндіріске айналды.
Ұзақ жолға шыдас беретін жоғары сапалы полипропилен қаптамаларына ірі компаниялар тарапынан тапсырыс көбейген. Өйткені өнеркәсіп тауарының тиісті жеріне бұзылмай әрі бүлінбей жетуі үшін қаптаманың сапалы әрі берік болғаны абзал. Бүгінде «FIBC Kazakhstan»-ның вагон қаптамаларын «Теңізшевройл», «Аралтұз», «ҚТЖ»-ның Ақтөбедегі «Батыс» филиалы тұрақты тұтынады. «Қазхромға» қарасты Ақтөбе ферроқорытпа зауыты да қызығушылық танытып отыр.
Серіктестік директоры Ботагөз Айбөкенованың айтуынша, биыл қаңтардан бастап айына 100 тонна полипропилен өңдеп, одан синтетикалық материалдар дайындау басталған. Оған қажетті түйіршік түріндегі полипропилен шикізаты Атыраудағы «KPI» компаниясынан жеткізіледі.
Өндірісте түйіршіктерді синтетикалық матаға айналдыру әлдеқайда тиімдірек. Алайда өңдеу өндірісін іске қосу қосымша ғимарат, жаңа құрылғы және жабдықтармен жұмыс істей алатын мамандарды қажет етеді. Сондықтан 2024 жылдың соңында «Даму» қоры көмегімен 1 млрд теңге несие алып, оған Үндістаннан өндірістік машиналар әкелінген.
«Тапсырыстардың көбеюіне байланысты өнім түрлерін шығаруды арттырдық. Өндірістік аумақтан жаңа цех ғимаратын алып, онда Үндістаннан әкелінген экструдер жабдықтарын қондырып жатырмыз. Былтыр KPI-мен әріптестік байланыс орнатып, ол жақтан шикізат күйінде әкелінетін өнімді өзімізде өңдейтін болып шешкенбіз. Алайда бізде полипропилен түйіршіктерін қалыпқа салып, ерітіп, лайықты пішінде мата дайындайтын, экструдер машиналарын басқаратын және цилиндр, конус пішіндес айналмалы бөлшектерді дайындайтын маман болмады. Экструдер маманын Ақтөбедегі кәсіптік-техникалық оқу орындарынан таба алмадық. Ауыр машиналарда жұмыс істейтін тігіншілер де керек. Полимер, пластик, резеңке материалдарды қыздырып, арнайы қалыптардан өткізетін экструдер машинасының маманы қондырғыны бақылап, өнім дайындалып жатқанда температура, қысым, жылдамдығын реттейді. Дайын өнімнің сапасы мен біркелкі болуын, қажетті өлшемге сай екенін тексереді. Қондырғының ақауын анықтап, жөндеу жұмысымен де айналысады. Осы жұмыспен техникалық дайындықтан өткен мамандар айналысады», дейді Б.Қыдырбайқызы.
Тігін цехының аға шебері Руслан Сүлейменовтің айтуынша, тігіншілер бір тәулікте 1-2,5 тонна синтетикалық материалдан 2 мың дана қапшық тігеді. Кейде екі ауысыммен де жұмыс істейді. Бір ауысымда вагон қаптамасын тігуге 34 шебер, қапшық тігуге 70 тігінші кіріседі. Жаңа қондырғыларды орнатып болған соң жұмыс көлемі артпақ.
Ақтөбе облысы