Атырау облысында 18 жастағы бозбала жол апатынан ауыр жарақат алды. Облыстық аурухана дәрігерлері оның өміріне араша бола алмады, деп жазады Egemen.kz.
Атырау облыстық денсаулық сақтау басқармасы баспасөз қызметінің ақпаратына қарағанда, жол-көлік оқиғасынан кейін 2007 жылғы азамат жедел жәрдем бригадасының көлігімен облыстық ауруханасына жеткізілген.
«Ауруханаға түскен кезде ер адамның жағдайы өте ауыр болды. Дәрігерлер науқастың жағдайын тұрақтандыру үшін барлық қажетті реанимациялық шараны шұғыл түрде жүргізді. Алайда көрсетілген медициналық көмектерге қарамастан пациенттің өмірін сақтап қалу мүмкін болмады», деп хабарлады басқарманың баспасөз қызметі.
Атырау облыстық полиция департаментінің баспасөз қызметі растаған дерекке сүйенсек, жол-көлік оқиғасы 27 наурызда болған.
«Түскі сағат 13:43 шамасында Доссор кентінен Атырау қаласы бағытындағы жолдың Оңай ата зираты тұсында Shacman және Hyundai Elantra көліктері соқтығысты. Жол-көлік оқиғасының салдарынан жеңіл көліктегі 2007 жылы жолаушы түрлі дене жарақатын алды. Зардап шеккен жолаушы Атырау облыстық ауруханасына жеткізілген еді», деп мәлім етті департаменттің баспасөз қызметі.