Қар еріп, көктем шыққалы Орал қаласында әдеттегі санитарлық-тазалық жұмысы басталды. Қала әкімдігінің арнайы қаулысымен 29 наурыздан 26 сәуірге дейін экологиялық тазалық айлығы жарияланды.
Өткен сенбі күні облыс орталығын қоқыстан жаппай тазалау жұмысы басталып та кетті. Қаланың 10-шағын ауданы, ет комбинаты бөлігі, Деркөл мен Зачаган кентін байланыстыратын айналма жол, Желаев жолы бойы тазаланды. Іс-шараларға бір мыңнан астам адам, студенттер, жастар, мемлекеттік қызметшілер, үкіметтік емес ұйымдар атсалысты. Білім беру ұйымдары, денсаулық сақтау мекемелері, бизнес нысандары, кәсіпорындар, көпқабатты, жеке сектордағы тұрғын үй иелері өздеріне қарасты аумақты жинады. Сенбілік аясында қала аумағында бір күнде 400 тонна қоқыс қалдығы шығарылды.
– Біз қала тазалығын ұйымдастыруды бірнеше бағытқа бөліп қолға алдық. Қазір әкімдіктің бөлім мамандары қаланың әр учаскесіндегі бизнес нысандарды аралап, өз аумағын тазалау жөнінде ресми хабарлама таратып жатыр. Санитарлық тазалық айлық аясында жасайтын жұмыс көлемі нақты жоспарланған, – дейді Орал қаласы әкімінің орынбасары Жандос Дүйсенғалиев.
Осы жоспарға сәйкес, алдағы 5, 26 сәуірде өтетін сенбіліктер – көшет отырғызу, тал-теректің түбін әктеу, гүлзарларды қалпына келтіру апталығы болмақ. Орал қаласында 57 сквер мен саябақ бар. Олардың әрқайсысына облыс орталығындағы департаменттер мен басқармалар жауапты болып бекітілген. Әр басқарма өзіне қарасты аумақты абаттандыруға әзір.
Жандос Асхатұлының айтуынша, 19 сәуірде «таза жағалау» іс-шарасы өтеді. Орал қаласын орап жатқан Деркөл, Шаған, Жайық өзендерінің жағалауы тазаланады. Бұл шараға да түрлі мекеме, ұйым қызметкерлері жұмылдырылады.
Бір айта кетерлігі, санитарлық-экологиялық айлық уақытында сенбі күндері Орал-Саратов тас жолы бойындағы, Асан ауылының маңындағы полигондар тұрғындардан күл-қоқысты тегін қабылдайтын болды. Яғни жеке ауласы бар тұрғындар қыс бойы жиналып қалған көң-қоқысын арнайы орындарға тегін төгіп кете алады.
Бүгінде Орал қаласының тазалығын күтіп-ұстау тендер нәтижесінде «Жайық таза қала» мекемесіне тапсырылған. Компания 2026 жылдың соңына дейін қызмет көрсетпек. Сонымен қатар ірі габаритті қалдықтарды шығаруға «Строй Компас» ЖШС да атсалысады.
«Қала әкімдігі қала аумағында контейнер алаңдарын салып, жаңа еуроконтейнерлер сатып алу жұмысын жалғастырып келеді. Биыл жергілікті бюджет қаражаты есебінен 1 000 дана еуроконтейнер алынып, қатты тұрмыстық қалдықтарға арналған 80-ге жуық жаңа алаң жасалатын болады», дейді Ж.Дүйсенғалиев.
Орал қаласында абаттандыру ережесін сақтау, бұзушылыққа жол бермеу мақсатында қалалық тұрғын үй коммуналдық шаруашылық бөліміне қарасты мониторингтік топ құрылған. Топ құрамындағы 15 адам қала аумағында күнделікті мониторинг жүргізіп отырады. Топтың жұмысы өте нәтижелі, 2025 жылдың басынан бері ғана ереже бұзушылықты жою жөнінде 1 188 хабарлама берілген.
Қоршаған ортаны күтіп ұстау, тазалық сақтау – әркімнің міндеті. Сондықтан мекеме, ұйымдар, әсіресе бизнес нысандары, коммерциялық ұйымдар, құрылыс мекемелері өздеріне тиесілі аумақты ретке келтіріп, күл-қоқыстан тазалау, абаттандыру ісіне белсенді қатысуға тиіс. Сондай-ақ ПИК, МИБ, ЖС сияқты көппәтерлі үйлерді басқарушы нысандар да тазалық айлығына бір кісідей қатысып, тұрғындар өз ауласында, көпқабатты үйлерде сенбілік ұйымдастырып жатыр.
Батыс Қазақстан облысы