Ел дамуында үлкен рөл атқаруы тиіс бастама

Президенттің баспасөз қызметі Қазақстан халқы Ассам­блеясы Кеңесінің Қазақстан Республикасы Президентінің сай­лауын өткізу жөніндегі бастамасына байланысты келіп түскен хаттар мен жеделхаттар туралы хабарлады. Мемлекет басшысының атына ел өңірлеріндегі қоғамдық бір­лестіктерден және эконо­ми­каның түрлі салалары мен әлеуметтік салада жұмыс істейтін азаматтардан көптеген хат-хабарлар келіп түсуде. Жұмысшылар, аграршылар, шағын және орта бизнес, ғылым және мәдениет, шығармашыл зиялы қауым өкілдері, студенттер өз хаттарында мемлекеттің әрі қарай дамуында маңызды рөл атқаруға тиіс бастамаға жан-жақты қолдау танытуда. Атап айтсақ, «Нұр Отан» партиясының мәлімдемесінде ҚХА Кеңесінің бастамасы ел мүддесіне жауап беретін дұрыс қадам екені айтылған. «Біздің халқымыз ел тарихының ең шешуші сәттерінде болашақ ұрпақ үшін даналық таныта отырып, бірліктің, өз Көшбасшысының айналасына топтасудың биік деңгейін көрсетті. Бұл «Қазақстан-2050» ұзақ мерзімді Стратегиясы мен «Мәңгілік Ел» идеясын жүзеге асыруды қамтамасыз ете отырып, бұдан да күшті, бұдан да ұйымшыл болудың тарихи мүмкіндігі», – делінген хатта. Қазақстан қаржыгерлері қауым­дастығының мүшелері сайлау өткізу экономикалық және ақша-несиелік саясаттың сабақтастығын қамтамасыз етіп, инвесторларға сенімділік беретінін, елдегі іс­кер­лік белсенділікті жандандыратынын атап өткен. «Елдің қаржы ұйымдарының басшылары мен қызметкерлері қоғамымыздың экономикалық дамудың мейлінше жоғары сатысына қарай жүйелі қозғалысын қолдау ісіне өз үлестерін қосу үшін қолдан келгеннің бәрін жа­сау­ға дайын және ұсынылған сайлау­дың маңыздылығын осы жолда­ғы қажетті кезең ретінде толық түсінеді», – деп жазады авторлар. Түрлі кәсіпорындардың жұ­мыс­шылары да хат жолдап отыр. «Болат Нұржанов атындағы Екібастұз ГРЭС-1» ЖШС жұмыс­шылары елді өркендету үшін алға қойылған міндеттерді жүзеге асыру ісіне қатысуға дайын екендіктерін білдіреді. «Біз электр энергиясын ел­дің барлық өңірлеріне және шетел­ге бағыттаймыз. Біздің мінде­тіміз – әр үйде күндіз де, түнде де электрдің болуы. Біздің тұтыну­шы­ларымыз тұрақтылықты жоға­ры бағалайды, ал біз тұрақ­ты­лықты тек Сізбен байланыстырамыз. Біз «Қазақстан-2050» Стра­тегиясын жалғастыруды, ішкі саяси тұрақтылықты нығайтуды, әрі қарай дамуды жақтаймыз. Сон­дықтан Сізден Президент сайлауын 2015 жылы өткізу бастамасын қолдауды сұраймыз», – деп жазады авторлар. Жамбыл облысындағы «Қаз­фосфат» ЖШС хатында алты мың­дық еңбек ұжымының негізгі тілегі – Нұрсұлтан Назарбаевқа сенетінін растау екені айтылған. «Дәл бүгін бірлікті, келісім мен тұрақтылықты нығайту маңызды, сондықтан біз Сізді ел Президенті лауазымына лайықты кандидат санаймыз. Қазіргі бақ-берекемізді және болашағымызды тек Сізбен байланыстырамыз», – делінген хатта. «Қазақмыс» Корпорациясы» ЖШС еңбек ұжымдарының 9 мың­нан астам мүшесі – кеншілер, ме­таллургтер, кен байыту кәсіп­орын­дарының жұмысшылары да еліміздің одан әрі қарқынды дамуын қамтамасыз ету үшін Қазақстан Президентіне жаңа сенім мандатын беру қажет екенін атап өткен. «Біз бүгінде басқа балама жоқ екеніне сенімдіміз. Өйткені, нақ Сіздің басшылығыңызбен еліміз өз дамуында елеулі табыс­тарға жетті. Сіз республиканы ауқымды жаңғырту және оны әлемнің мейлінше бәсекеге қабілетті 30 елінің қатарына қосу жолындағы жұмысты Қазақстан халқымен бірге жалғастыруға тиіссіз деп санаймыз. Барлық қазақстандықтарды, еңбекшілерді, тұрақтылықты және егемен Қазақ­станның жүйелі дамуын қымбат санайтын баршаны Президент сайлауын өткізуді қолдауға шақы­рамыз», – делінген хатта. Ақмола облысындағы «Родина» агрофирмасы» ЖШС ұжымының мүшелері өз хаттарында жаһандық экономикалық дағдарыс пен әлемдегі геосаяси тұрақсыздықтың белең алуы жағдайында Қазақстан қуатты әрі ілкімді көшбасшыны қажет ететініне тоқталған. «Қоғамда елдің әрі қарайғы әлеуметтік-экономикалық табысы көбіне-көп Сіздің Мемлекет басшысы, Елбасы ретіндегі рөліңіз арқылы ғана мүмкін болатыны туралы айқын түсінік бар. Сондықтан, отандастарымыздың бастамасын толық қолдай отырып, Сізден жүрек қалауымен жасалған халық таңдауына құлақ асуды сұраймыз», – делінген хатта. Алматы облысындағы «Хиль­ниченко және К» коммандиттік серік­тестік жұмысшылары Мем­лекет басшысының осындай тұрақсыз уақытта стратегиялық сипатта шұғыл шешімдер қабылдай білуі – дендеп келе жатқан сыртқы сын-қатерлерді табысты еңсеру кепілі екенін атап өткен. «Бүгін біз және ел тағдырына бейжай қарай алмайтын бар­лық қазақстандықтар, жауапкер­ші­лікпен айта аламыз: Қазақстанда Сізге саяси балама жоқ. Сіз секілді Президент­пен бізге бәрі жеңіл, біз дағдарыс кезеңінің барлық қиындықтарын еңсереміз. Өйткені, олар өтпелі ғой, ал біздің Қазақстан мәңгілік болсын», – деп жазады авторлар. Қазақстан халқы Ассамблея­сы­ның сайлау өткізу туралы бастамасын мақұлдаған азаматтардың қатарында Мемлекет басшысына қолдау көрсету туралы пікір білдірген көптеген жас ұрпақ өкілдері бар. Әл-Фараби атындағы Қазақ ұлттық университетінің студент­тері Мемлекет басшысының Жолдауын және «Қазақстан-2050» Стратегиясын табысты жүзеге асыру үшін күш жұмылдырудың маңыздылығын атап өткен. «Осыған байланысты кейінге қалдырмай сайлау өткізу маңызды деп санаймыз және Қазақстан халқы Ассамблеясының бастамасына толық қолдау көрсетеміз», – делінген хатта. І.Жансүгіров атындағы Жетісу мемлекеттік университетінің сту­денттері Елбасының басшы­лығымен еліміз тәуелсіздік жылдарында түрлі қиындықтардан сәтті өткеніне тоқталған. «Біз алдағы уақытта да Мем­лекет басшысымен бірге Қазақ­станды әлемнің дамыған 30 елінің қатарына қосу жөніндегі мақсатқа қарай ілгерілетуді қалаймыз. Сондықтан Сізден президент сайлауын өткізуге келісім беруіңізді сұраймыз», – деп жазады авторлар. Қазақстан халқы Ассамблея­сы Кеңесінің ел Президентінің сай­лауын өткізу жөніндегі баста­масына байланысты хаттар Мем­лекет басшысының атына толас­­сыз келіп түсуде.