Еліміздің шығысында орналасқан Зайсан шекара отрядына қарасты «Майқапшағай» бақылау-өткізу бекетінің бақылаушылары қомақты қаржыны жасырын жолмен алып өтпек болған қытай елінің азаматын ұстады.
Аспан асты елінен Қазақстанға «Ютон» автобусымен келе жатқан 40 жасар қытайлық өзінде ешқандай заңсыз заттың жоқ екендігін хабарлады. Ал автобустың ұңғыл-шұңғылын тереңдетіп қараған кезде оның бір қуысынан қомақты ақша шыға келді. Санап жібергенде анау-мынау емес –
3 000 000 теңге болып шықты, деп хабарлады ҰҚК ШҚ баспасөз қызметі.
Аталған дерек бойынша ҚР Әкімшілік-құқық бұзушылық кодексінің 551-бабы, яғни «Тауарларды, қолма-қол ақшаны, жол чектерін, немесе құнды қағаздарды жарияламау немесе дұрыс жарияламау» бабы бойынша іс қозғалып, кеден бекетіне тапсырылды.