...мешітте Нұрсұлтан бөбектің тұсауы кесілді
Еңбекшіқазақ ауданы Есік қаласында бір мезгілде 500 адам мінәжат ететін жаңа мешіт ашылды. Аталған шараға Қазақстан мұсылмандары діни басқармасының төрағасы, Бас мүфти, шеих Әбсаттар қажы Дербісәлі қатысып, Ислам дінінің қағидаттарын уағыздады, Ислам дінінің басты бағыты – ұлтқа, нәсілге бөлінбей, бірлік пен ынтымақта болып, өзара достықты берік ұстану екендігін ортаға салды.Мемлекет басшысы Нұрсұлтан Назарбаевтың қалауы мен саясаты да осы. Демек, ортақ шаңырақтағы осы құндылықтардан айнымайық деген ниетпен бата берді.
Жұртшылық бесін намазынан соң бір жасқа келген Нұрсұлтан бөбектің тұсауын кесіп, ақ жол тіледі. Кішкентай бөбек апыл-тапыл басып, алғашқы қадамын Алла үйінің ақ табалдырығынан бастады.
Күмісжан БАЙЖАН, Алматы облысы.
...диірмен кешені ашылды
Қостанай қаласының іргесінде ашылған “Алтын май” диірмен кешені – облыста биыл жүзеге асатын 11 инвестициялық жобаның алғашқысы. Мұнда орнатылған шетелдік жабдық тәулігіне 300 тонна бидай тарта алады. Кәсіпорын жүзден аса адамға жұмыс орнын ұсынып отыр. Диірмен кешенін салу 1 миллиард 300 миллион теңгеге түсті. Бұл – облыстың ауыл шаруашылығы саласындағы инвестициялық жобаларға бөлінген ең көлемді қаржы.
Жоғары сапалы ұн өндіретін диірмен облыс экономикасына серпін береді. Ал оның өнімі экспортқа шығарылатын болады. Кешенде, сонымен қатар, зығыр майы да өндіріледі. Ол ел рыногындағы отандық тауарлардың үлесін арттырмақ.
Нәзира ЖӘРІМБЕТОВА, ҚОСТАНАЙ.
...пошта байланысы қызмет көрсетеді
Чкалов ауылында пошта байланысының жаңа ғимараты бой көтерді. Ол Үкіметтің 2004-2010 жылдарға арналған ауылдық аумақтарды дамыту бағдарламасы бойынша жүзеге асырылды. Кеңсе үйінің жобасын “Қазпошта” АҚ дайындады. Мұнда пошта қызметкерлерінің талапқа сай жұмыс істеп, сапалы қызмет көрсетуіне қолайлы жағдай туғызылған. Жұмыс орындарының компьютерлендірілуі, өндірістік үдерістердің корпоративті басқару жүйесіне қосылуы істің атқарылуын жеңілдете түскен. Клиенттер банкомат қызметін де пайдалана алады. Мекеме қызметкерлері 851 зейнеткер мен әлеуметтік жәрдемақы және 471 жалақы алатын адамдарға өз қызметтерін ұсынады.
Аталмыш бағдарлама шеңберінде Қызылжар, Айыртау, М.Жұмабаев аудандарында осындай үлгілі жобалар қолға алынатын болады.
Өмір ЕСҚАЛИ, Солтүстік Қазақстан облысы, Тайынша ауданы.
...балабақша 45 күнде салынды
Темір ауданының Құмқұдық ауылында Елбасы Нұрсұлтан Назарбаевтың биылғы Жолдауында көрсетілген “Балапан” бағдарламасы аясында 25 орындық “Балапан” балабақшасы пайдалануға берілді. Балабақша құрылысына Корей ұлттық мұнай корпорациясы қаржылай демеушілік жасады. Ғимараттың құрылысын “КазПромСтройГрупп” ЖШС небәрі 45 күнде салып бітірді. Бұл – осы ауылда соңғы отыз жыл ішінде салынған алғашқы жаңа құрылыс нысаны.
Ғимараттың ашылу салтанатына аудан әкімі Бауыржан Қаниев, Корей ұлттық мұнай корпорациясы бас директорының орынбасары Лим Гынмук және басқалары қатысып, балабақшаның іші сәбилердің шаттық күлкісіне толы болсын деген тілектерін білдірді. Ауыл тұрғындары қазақы дәстүрмен осындағы әлеуметтік мәселелерді шешуге ұдайы атсалысып келе жатқан Лим Гынмуктың иығына шапан жауып, астына ат мінгізді.
Сатыбалды СӘУІРБАЙ, Ақтөбе облысы.