Түркияда Ливия Қарулы күштері Бас штабының бастығы Мохаммед Али Ахмед Аль-Хаддад мінген жеке бизнес-джет апатқа ұшырады. Falcon 50 үлгісіндегі ұшақ Анкара маңында радардан жоғалып кеткен. Бұл туралы Түркияның бұқаралық ақпарат құралдары мәлім қылған, деп хабарлайды Egemen.kz.
Ұшақ радардан жоғалып, байланыс үзілген
Түркияның Ішкі істер министрі Али Ерликаяның мәліметінше, 9H-DFJ борттық нөмірлі Falcon 50 ұшағы Анкара әуежайынан 20:10-де Ливия астанасы Триполиге бағыт алған. Ұшу кезінде экипаж Хаймана ауданы маңында шұғыл қонуға сұраныс білдіріп, көп ұзамай байланысқа шықпай қалған. Сағат 20:52-де ұшақпен байланыс толық үзілген.
Кейін жандармерия бөлімшелері әуе кемесінің қалдықтарын Хаймана ауданындағы Кесиккавак ауылынан оңтүстікке қарай 2 шақырым жерден тапқан.
Бортта 8 адам болған
Апат кезінде ұшақта 8 адам, оның ішінде Ливия Бас штабының бастығы Мохаммед Али Ахмед Аль-Хаддад болған. Ол сол күні Анкараға ресми сапармен барған.
Ливия премьер-министрі Абдель Хамид Дбейба Аль-Хаддадтың қаза тапқанын растады. Оның айтуынша, ұшақта сондай-ақ Ливия құрлық әскерлерінің қолбасшысы, әскери өндіріс басқармасының директоры, Бас штаб бастығының кеңесшісі мен фотографы, 3 экипаж мүшесі болған. Барлығы қаза тапқандар қатарында деп есептеліп отыр.
Алдын ала себеп және тергеу
Алдын ала мәліметтерге сәйкес, апатқа техникалық ақау себеп болуы мүмкін. Қазір оқиғаның мән-жайын анықтау үшін тергеу жүргізіліп, іздестіру-құтқару жұмыстары жалғасып жатыр.
Ливияда аза тұту жарияланды
Осы қайғылы оқиғаға байланысты Ливия үкіметі 3 күнге созылатын ресми аза тұту күндерін жариялады. Айта кетелік, 24-25 желтоқсан күндері елде Тәуелсіздік күніне арналған мерекелік іс-шаралар өтпек болған.