Талдықорғандықтар өнер мен руханияттың мерейін асырып, мәртебесін көтеруді көздейді. «Жер жаннаты – Жетісу» телевизиялық байқау-бағдарламасының финалдық кезеңі түйінделгенде, аудандар мен қалалардан қатысқан ұжымдардың өнерін тамашалап қана қоймай, оларға деген ерекше қолдаудың куәсі болдық.
Әуелі І.Жансүгіров атындағы мәдениет сарайының алдында тұрған 14 аппақ «темір тұлпар» көптің назарын өзіне аударды. Бұл жолғы құрмет өнер майталмандарының төбесін көкке тигізгендей әсер етті. Себебі бір күнде мәдениет қызметкерлеріне осынша көліктің кілтін табыстау аймақ тарихында алғаш рет жасалып отыр десек, асыра айтқандығымыз емес.
Облыс әкімінің орынбасары Диас Есдәулетов өнер саласында жүрген әрбір жанның еңбегі ерекше екенін айта отырып, сала қызметкерлерін құттықтады.
«Мәдениет саласының техникалық базасы бүгін шағын автобустармен және жүк көліктерімен толыққалы отыр. Өнер адамдары үнемі халық арасында, көптің алдында жүреді, әрдайым ізденісте болып, ел-жер аралайды. Сондықтан бұл көліктер мәдениет ұжымдарының гастрольдік сапарларға шығуына, қажетті құрал-жабдықтар мен декорацияларды тасымалдауына, түрлі фестиваль, байқауға қатысуына мүмкіндік туғызып, жұмыс сапасына оң әсер етеді деп сенеміз», деген Диас Рахметұлы салтанатты іс-шарада тек көліктер берумен ғана шектелмей, екінші жыл қатарынан өткізіліп келетін «Жер жәннаты – Жетісу» тележоба байқауына белсене қатысып, өнер көрсеткен өңірлер де марапатталатынын тілге тиек етті.
Жетісу облысының 8 аудандық және 2 қалалық Мәдениет үйлеріне, сондай-ақ Сәкен Сейфуллин атындағы әмбебап кітапханасына, Көркемсурет галереясына, облыстық мемлекеттік архивке және Халық шығарма- шылығы орталығына тиесілі көліктердің кілті табыс етілді.
Жаңа көлікке ие болған мекеме ұжымдарының атынан Алакөл аудандық Зейнеп Қойшыбаева атындағы мәдениет үйінің директоры Отан Смағұлов сөз сөйлеп, ризашылығын білдірді.
«Сала нысандарына бір күнде осынша көлік беру оқиғасы алғаш рет болып тұр. Бұл – ұлттық құндылықтарды насихаттап жүрген азаматтарға көрсетіліп отырған қамқорлық, бізге шығармашылық серпіліс беретін игілікті іс. Бір ғана біздің Алакөл ауданында 4 жаңа мәдениет нысаны салынып жатыр, соның біреуі жуырда пайдалануға беріледі, 3-еуі келесі жылдың үлесінде. Алдағы уақытта да мәдениет үшін еселі еңбек ете береміз», деді ол.
Сап түзеген «темір тұлпарларды» шығарып салған жұрт І.Жансүгіров атындағы мәдениет сарайына кірді. «Жер жәннаты – Жетісу» тележоба байқауының жеңімпаздары диплом және қаржылай сыйлықтармен марапатталды.
Атап айтсақ, арнайы жүлде және 300 мың теңге ақшалай сыйлық Қаратал ауданына, III орын және 500 мың теңге ақшалай сыйлық Сарқан ауданына, II орын және 700 мың теңге ақшалай сыйлық Ақсу ауданына бұйырды. Ал I орын және 1 млн теңге ақшалай сыйлыққа Кербұлақ ауданы лайық деп табылды. Тележоба байқауының бас жүлдесін және 5 млн теңге қаржылай сыйлықты Көксу ауданы жеңіп алды.
«Бұл дәстүрлі дода әлі де жалғасады. Біз өңірдегі мәдениеттің өркендеуіне бар күш-жігерімізді саламыз. Әсіресе шалғай ауылдардың рухани өмірінде үлкен өзгерістер болып жатыр. Баба дәстүрін жалғастыруға бейіл жастар көп», деді облыстық мәдениет, архивтер және құжаттама басқармасының басшысы Қуаныш Сүлейменов.
Марапаттан кейін рухани шараның гала-концерті басталды. Жоба ережесіне сай әр номинация бойынша жеңімпаздар өнер көрсетті. Халық әндері мен заманауи эстрада жанрындағы әуезді әндер, термешілердің тағылымды толғауы, ұлттық би әлемі, айтыс ақындарының арнауы алма-кезек ауысып отырып көрерменнің көңіл көкжиегін кеңіткен әдемі кешке ұласты.
Жетісу облысы