Италияның Парма қаласы маңындағы мұражайда әлемге әйгілі суретшілердің құнды картиналары ұрланды. Ұрлық қысқа уақыт ішінде, бар болғаны үш минутта жүзеге асқан, деп хабарлайды Egemen.kz.
22 наурыз күні төрт бетперде киген адам Magnani Rocca Foundation ғимаратына басып кіріп, Пьер-Огюст Ренуардың «Les Poissons», Поль Сезаннның «Still Life with Cherries» және Анри Матистің «Odalisque on the Terrace» атты картиналарын алып кеткен.
Полицияның мәліметінше, қылмыскерлер мұражайға күшпен кіріп, ішкі бөлмелердің бірінен өнер туындыларын ұрлаған. Қылмыстық топ өте жылдам әрекет етіп, небәрі 3 минут ішінде ғимараттан шығып кеткен. Алайда олардың жоспары мұражайдың дабыл жүйесі іске қосылғаннан кейін үзіліп, басқа картиналарды алып кету мүмкін болмай қалған.
Мұражай басшылығы ұрылардың әрекеті «жүйелі әрі ұйымдасқан» түрде болғанын атап өтті. Қылмыскерлердің мақсаты тек 3 картинамен шектелмеген, алайда қауіпсіздік жүйесінің іске қосылуы олардың жоспарын тоқтатты.
Картиналардың жалпы құны шамамен 9 млн еуроға (шамамен 7,8 млн фунт стерлинг) бағаланып отыр. Әсіресе, құны 6 млн еуроға жуық Ренуардың туындысы ең қымбат картиналардың бірі саналады.
Қазіргі таңда оқиғаға қатысты Италияның құқық қорғау органдары, соның ішінде Карабинерлер және Болоньядағы мәдени мұраларды қорғау бөлімі тергеу жүргізіп жатыр. Ұрылардың ғимарат қоршауынан асып қашқаны анықталған.
Луврдан құнды жәдігер ұрлағандар қалай құрықталды?
Ұрланған картиналар әлемдік өнер тарихында ерекше орын алады. Пьер-Огюст Ренуар (Pierre-Auguste Renoir) импрессионизм бағытының негізін қалаушылардың бірі болса, Поль Сезан (Paul Cézanne) постимпрессионизмнің көрнекті өкілі саналады. Ал Анри Матис (Henri Matisse) ХХ ғасырдағы модернистік өнердің ірі тұлғаларының бірі ретінде танымал.
Тергеу жалғасып жатыр, ал ұрланған өнер туындыларының тағдыры әзірге белгісіз.
Димаш Құдайберген 70 аспабын музейге тапсырды