Сан-Карлоның алғашқы гастролі

Жұмыр жердегі ең көне де атақты Сан-Карло театры Қазақстанға алғаш рет гастрольмен келеді. Тек екі күн – 5 және 6 шілдеде «Астана Опера» сахнасында Адольф Аданның «Жизель» балеті әлемдік деңгейдегі жұлдыздар – Норвегия ұлттық балетінің прима балеринасы Иоланда Корреаның және премьері Йоэль Карреньоның қатысуымен өтеді. Жизель партиясын орындайтын прима балерина Иоланда Корреа тамаша техникасымен әйгілі, оның билеу мәнерінде мін жоқ, оған керемет үйлесімділік – сахнада жарқырап, жеңіл, әсем әрі сенімді қимылдау, музыкаға деген жоғары қабілет тән. Оның серігі Йоэль Карреньо ханзада Альберттің рөлін сомдайды. Кубалық биші қайталанбас дара әртістік қабілетімен және сахнаға сай тамаша дене бітімімен сүйсіндіреді. Ол күрделі қимылдарды асқан шеберлікпен таза орындауды, би қимылын мәнерлі әдіске салуды жетік меңгерген. 60 адамнан тұратын неаполитандық театрдың балет труппасы «Жизель» балетін КСРО халық әртісі, Мемлекеттік сый­лық иегері Людмила Семеняканың редак­циясында ұсынады. Үлкен театрдың примасы Жизель партиясын дүниежүзінде ең үздік орындайтындардың бірі болға­нын еске салайық. Сюжетке, аңызға айнал­ған қыздар-виллисалар – тойға дейін көз жұмған, алданған қалыңдықтар негіз болған. Олар өмір бақи орман кезіп, түнгі жолаушыларды еліктіріп, әлсіреп өлгенше биге шыр айналдыруға мәжбүр. «Гүлмен әрленген некеқияр көйлектерін киіп... айдың жарығында тоқтаусыз билейтін виллисалар билеуге берілген уақыт аяқталуға жақын қалғанын сезген сайын құмарлана әрі жылдамырақ билей түседі, сосын олар мұздай суық мүрделеріне қайта оралады...» (Г.Гейне).  Жизель есімді ауыл қызы Альбертке – шаруа болып киінген ақсүйекке ғашық болады. Жизель жігіт те оны сүйетініне берік сенімді. Альберттің қалыңдығы бар еке­нінен ол әлі хабарсыз. Көп ұзамай шындық ашылады. Жизель құсадан көз жұмады. О дүниелік болса да, ол өзін сатып кеткен күйеужігітті сүйіп өтеді. Ар-ұяты қинаған Альберт түн ішінде оның қабіріне келгенде, қыз оны виллисалардан құтқарады. Аталған гастроль бір жыл бұрын қол қойылған қос театрдың Серіктестік жөніндегі меморандумы шеңберінде жүзеге асқан алғашқы жоба болмақ. Суретте: «Жизельден» көрініс.