АСТАНА. 16 мамыр. Түріктің белгілі кино актері Бурак Өзчивит Астанаға келеді. Кино «жұлдызының» Қазақстанға сапары «Махаббатым саған ұқсайды» фильмінің тұсаукесері аясында ұйымдастырылуда. Бұл туралы «Қазақстан» телерадиокорпорациясының баспасөз қызметі хабарлады.
Бурак Өзчивит қазақстандық көрермендерге «Сүлеймен сұлтан» телехикаясындағы Малкочоглу Бали бей рөлі арқылы танымал.
Сапар аясында ол 23 мамыр күні «Арман 3D Азия парк Астана» кинотеатрындағы гала-кешке қатысады. Сондай-ақ, «Қазақстан» телеарнасының түсірілім алаңына келіп, белгілі «Түнгі студияда Нұрлан Қоянбаев» түнгі шоуының қонағы болады деп жоспарлануда. Аталған бағдарлама «Қазақстан» телеарнасының эфирінде 26 мамыр күні сағат 23:30-да көрсетіледі.
Бурак – актерліктен бұрын модель болған. 2005 жылы түріктің ұлттық Best Model of Turkey атты сұлулық сайысының жеңімпазы атанды. Ал әлем бойынша өткізілген Best Model of the World сайысында 2-орынға ие болды.
Шығармашылық жолын Еуропаның танымал брендтерін жарнамалаумен бастады. 2014 жылы Ыстамбұл қаласында өзінің Balibey Döner атты жеке мейрамханасын ашқанын айта кетейік.
Еламан Қоңыр.
Дерек, сурет: «Қазақстан» телерадиокорпорациясының баспасөз қызметі.