Кеше Қазақстан Республикасы Президентінің жанындағы Мемлекеттік басқару академиясында жаңа 2010-2011 оқу жылының ашылу салтанатты рәсімі болып өтті.
Оған ҚР Президенті Әкімшілігі, Премьер-Министр Кеңсесі, Сыртқы істер министрлігі, Экономикалық даму және сауда министрлігі, Жоғарғы Сот, Индустрия және жаңа технологиялар министрлігі, “Самұрық-Қазына” ҰӘҚ” АҚ-тың өкілдерімен қоса, Ханс Зайдель қорының Орталық Азиядағы жобасының жетекшісі, доктор Макс Майер, “TOTAL” компаниясының Қазақстандағы өкілдігінің басқарушы директоры Жан-Люк Поршерон, сонымен қатар, ГФР, Франция және Еуропалық Одақ дипломатиялық миссияларының басшылары қатысты.
Еліміздің кәсіби мемлекеттік қызметшілерін даярлайтын және мемлекеттік басқару саласында ғылыми ұсынымдар әзірлеумен айналысатын аталмыш академия жаңа оқу маусымына 234 тыңдаушыны қабылдады. Олардың ішінде Дипломатия институтына 51 адам, Мемлекеттік және жергілікті басқару институтына – 102, Сот төрелігі институтына – 66, Мемлекеттік саясаттың ұлттық мектебіне 16 адам қабылданды.
Салтанатты ашылу рәсімінде академия ректоры Арын Өрсариев Мемлекет басшысының алға қойған міндеттеріне тоқтала келе, бұл бағытта оқу орнының атқаратын қызметі айрықша екендігін атап өтті. Ол сондай-ақ өткен жылы академия “Еуразиялық монитор” агенттігінің рейтингісі бойынша мемлекеттік басқару саласында маманданатын Орталық Азия және Кавказ жоғары оқу орындарының арасында бірінші орынды, сондай-ақ, Білім беру сапасын қамтамасыз ету жөніндегі тәуелсіз қазақстандық агенттігінің нұсқасы бойынша гуманитарлық-экономикалық ЖОО-лардың ұлттық рейтингісінде бірінші орынды иеленгендігіне ерекше тоқталды.
Мемлекеттік қызметшілерді даярлау барысында олардың шетел тілдерін меңгеру деңгейлерін жетілдіру, кәсібиліктерін көтеру үшін шетелдік капитал тарту саласы бойынша жан-жақты толыққанды жұмыстар атқару сынды пікірлер де ашылу салтанаты барысында тілге тиек болды.
Арай ҮЙРЕНІШБЕКҚЫЗЫ.