Алтайбаевтар 50 миллион теңгеге «Gold King» спорт клубын салып берді
Қаланың күншығыс бетінде айтулы азамат, пауерлифтингтен Азия чемпионы, бірнеше халықаралық жарыстардың жеңімпазы, меценат, кәсіпкер Андрей Алтайбаевтың бастамасымен тұрғызылған, өз қаржысына салдырған «Gold King» спорт клубының жаттығу залы салтанатты жағдайда ашылып, оған қала әкімі Е. Сәлімов, осында тегін жаттығатын мүмкіндігі шектеулі жандар, қала жұртшылығы қатысты.
– Елбасының Қазақстан халқына Жолдауында саламатты өмір салтын сақтау, адамдардың бос уақыттарын мазмұнды да көңілді өткізу, спортпен шұғылдануы жайлы айтылғаны белгілі. Қазіргі таңда Семей шаһарында 100 мың адам бұқаралық спортпен шұғылданады. Оларға 379 спорт ғимараттары қызмет көрсетеді. Енді, міне, Андрей Алтайбаев заман талаптарына сай жабдықталған жаңа пауерлифтинг жаттығу залын іске қосты. Бұл жерде қаланың 700-ден астам тұрғыны жаттығу жасайды, ал отыздан астам мүмкіндігі шектеулі жанға тегін қызмет көрсетіледі. «Gold King» спорт клубында әлем, Азия чемпиондары тәрбиеленіп жатыр, бұдан былай олардың қатары толыға түсетіні сөзсіз, – дей келе қала әкімі Ермак Бидахметұлы жиналғандарды құттықтады.
Андрейдің әкесі қазақ, Виктор Ахметович Алтайбаевтың мамандығы балетмейстр. Беларусьтің Витевск қаласында оқып жүргенде орыстың ару қызы Тамара Владимировнамен танысып, оның соңы махаббатқа ұласып, екеуі тұрмыс құрады. Араға жылдар салып Отанына оралады. Андрей бала кезінен спорт десе ішкен асын жерге қоятын. 1992 жылы елге оралған соң коммерциямен шұғылданды. Қала орталығында жаттығу залын салсам деген арманына бір қадам жақындаған Андрей жинаған қаржысына Ресейден зілтемір, жаттығуға қажет гантель, арнайы құралдар сатып алды. Оған 20 миллион теңге шығындапты.
Андрейдің спорт залында болғанымызда ең алдымен көзге түскен кең әрі жарық бөлмелерде ақ тер, көк тер болып жаттығып жатқан бір топ адамды кездестірдік. Мұнда жаттығатын бірнеше үлкен секциялар бар екен. Өткен жылдың 13-20 желтоқсанында аталмыш клубта жаттығатын бір топ азамат Ташкентте өткен Азия және Мұхит аймағы елдері чемпионатынан 1 алтын, 4 күміс және бірнеше қола медальмен оралыпты. Атап айтқанда, Андрейдің жұбайы Марина Васильевна Алтайбаева пауерлифтингтен сығымдай көтеруде алтын медальді иеленсе, отағасы Андрей күміс жүлдеге қол жеткізген. Серғали Қайырбаев, Серікқали Әзілханов, Яков Ионин Азия чемпионатының күміс жүлдегері атанды. Реті келгенде айта кету керек, Андрей Алтайбаев әлем және Азия чемпионаттарында бірнеше мәрте топ жарған және жүлделі орындарға қол жеткізген атан жілікті, зілтемірді көтерудің асқан шебері. 2014 жылы Бішкекте өткен Азия чемпионатында 120 келі салмақта пауерлифтингтен қарсыластарын айқын басымдықпен жеңгені бар. Ол 260 келі салмақты сығымдай көтерді.
Қазір жаттығу залында отызға тарта мүмкіндігі шектеулі жандар жаттығады. Біз солардың бірнешеуімен тілдестік. Кембағал жандар Алтайбаевтың қайырымдылығына ерекше разы.
– Бұрын да атымтай жомарт азамат біздің тегін, алаңсыз жаттығуымызға жағдай жасап келген. Жаңа спорт залында екі-үш сағат жаттығу жасаған кезде бір жасап қаламыз. Қайырымды азаматқа алғыстан басқа айтарымыз жоқ, – дейді Ольга Любимова деген әйел.
Семей қалалық дене шынықтыру және спорт бөлімінің басшысы Мұрат Мұрсаханұлы Андрей Алтайбаевтың жаттығу залында спорт шеберлері мен халықаралық жарыстарда жақсы нәтижеге жеткен өрендерге жеңілдік жасайтынын, тіпті, тегін қызмет көрсететінін айта кетті. Осы клубта жаттығып жүрген В.Пряхин, В.Фольман, Я.Ионин, С.Шишкин, Закир Найманбаев, басқа да саңлақтар әлем, Азия біріншіліктерінде бірнеше мәрте топ жарған, жүлделерді бөліскен. Облыстық мәслихатты ұзақ жылдар басқарған Г.Пинчук, кезінде ауыр атлетикадан Қазақстанның үш дүркін чемпионы болған, Азияның алтынын олжалаған 67 жастағы В.Г.Бабичев, халықаралық дәрежедегі спорт шебері, 2015 жылы Новосібірде өткен Әлем чемпионатында алтын медальді иеленген Григорий Кобрин, басқа да атағы алысқа кеткен сом білекті, зілтемірді тулақша илеген азаматтарды жаттығу залынан кездестіргенде ел ертеңінің қазіргіден де жарқын болатынына көз жеткіздік.
Оңдасын ЕЛУБАЙ, журналист.
СЕМЕЙ.