Орталық сайлау комиссиясының кешегі отырысында «2016 жылғы 20 наурызға тағайындалған Қазақстан Республикасы Парламенті Мәжілісі депутаттарының кезектен тыс сайлауына және мәслихаттары депутаттарының кезекті сайлауына халықаралық ұйымның байқаушыларын аккредиттеу туралы» қаулы қабылданды.
ОСК мүшесі Татьяна Охлопкованың хабардар етуінше, аталған қаулыға сәйкес Ортсайлауком Қазақстан Республикасы Сыртқы істер министрлігінің ұсынуы бойынша Тәуелсіз Мемлекеттер Достастығынан байқаушылар миссиясының 12 байқаушысын аккредиттейді. «Тізім қоса беріліп отыр. Бүгін аккредиттейтін байқаушылар қатарында ТМД байқаушылары миссиясының жетекшісі Сергей Лебедев және миссия штабының басшысы Евгений Слобода бар», – деді Комиссия мүшесі.
Осы жылдың 18 ақпанындағы жағдай бойынша Ортсайлауком халықаралық ұйымдардың екі миссиясының (ЕҚЫҰ/ДИАҚБ және ТМД) 52 байқаушысын аккредиттеді. Ал Ортсайлауком шет мемлекеттер мен халықаралық ұйымдардың байқаушыларын аккредиттеуді 2016 жылғы 14 наурызға дейін жүзеге асырады.
Әлисұлтан ҚҰЛАНБАЙ,
«Егемен Қазақстан».