«Газель Next»

Семейде құрастырылып шығарылды Семей қаласындағы авто­құ­растыру зауытының кон­вейе­рінен тұңғыш рет қазақ­стан­дық «Газель Next» көлігі шы­ғарылды. Жыл соңына дейін «СемАЗ» жауапкершілігі шек­теулі серіктестігі осы сияқты 300 шағын автобус құрастыруды жоспарлап отыр. Бұл – отандық нарықта үлкен сұранысқа ие модельдердің бірі. «Газель» көптеген елдерде негізгі қоғамдық көліктердің бірі ретінде пайдаланылады. Ша­ғын автобустардың өзге түр­лерімен салыстырғанда, бұл модель жолаушылардың ең­кеймей, тік тұра беруіне қо­лайлы, яғни салонның биіктігі 2 метрге жетеғабыл. Сондай-ақ, қарапайым автобустармен салыстырғанда, жолаушыларға арналған орын да мол. «Газельді» жинаған құрастырушылардың бірі – Дидархан Қубаев. Жаңа модельді жетік білетін жас маман шағын автобустың кез келген жолда жүре алатынын айтады. Көліктің жарық шамы – 170 миллиметр, биіктігі – 2,7 метр, ұзындығы – 6 метр, бір өзінде 120 аттың күші бар. Қазір зауытта жаңа «Газель­ді» жетілдірудің жолдары қарас­тырылуда. Мамандар оны екі есікті етіп жасауды ойластырып отыр. Бұл жолаушылардың кіруі мен шығуына қолайлы болады. Бұл ретте шағын автобусты жаңғыртуға арналған қаңқа құ­рылымын Қазақстанда жасау туралы шешім қабылданды. Осы арқылы кәсіпорын өз өнімінің сапасына жеті жылға дейін кепілдік береді. – Елімізде біздің конвейері­мізде құрастырылған 800-ден астам автобус бар. Барлығы әлі де жұмыс істеп жүр. Ешқандай шағым болған жоқ. Біздің мақсатымыз – сапалы өнімді ресейліктерден де, кореялықтардан да кем шығармау, – деді «СемАЗ» жауапкершілігі шектеулі серіктестігінің бас директоры Әсемқан Досқожанов. Келесі айда аталған өнімдердің барлығы Алматы қаласына жө­нелтіледі. Жыл соңына дейін кәсіпорында 200 автобус пен 300 «Газельді» құрастыру жоспар­ланған. Думан АНАШ, «Егемен Қазақстан». СЕМЕЙ.