«Нұр Отан» партиясы Төрағасының бірінші орынбасарының қаулысымен Парламент Мәжілісінің депутаты Мейрам Пішембаев «Нұр Отан» партиясы жанындағы Кәсіпкерлікті қолдау жөніндегі республикалық қоғамдық кеңестің төрағасы болып тағайындалды.
Мейрам Пішембаев Семей зоотехникалық-малдәрігерлік институтын бітірген, экономика ғылымдарының докторы.
1989-2004 жылдар аралығында «Ақсу» АҚ басқармасының төрағасы, Қазақстандағы «Роснефть» компаниясының өкілдігі басқармасының басшысы, «Қазмұнайком» ЖШС-нің вице-президенті, Павлодар МӨЗ-інде «Қазақойл» ҰК» ЖАҚ-тың бас менеджері қызметтерін атқарды.
2004-2006 жылдары «Қазақсельмаш» корпорациясы ЖШС директорлар кеңесінің төрағасы, «Қазақстан мәшине жасаушылар одағы» ЗТБ басқармасының төрағасы болды. 2007 жылдан бері Парламент Мәжілісінің депутаты.
Айта кетейік, Республикалық кеңестің міндеті – отандық кәсіпкерлікке бәсекелестікті арттыру жөніндегі партияның, Ұлттық кәсіпкерлер палатасының, бизнестің, қоғамдық бірлестіктер мен меморгандардың күш-жігерін жұмылдыру. Кеңес тұжырымдамалық ұсыныстарды, отандық бизнестің бәсекеге қабілеттілігін арттыру жөніндегі нақты кәсіби шешімдерді пысықтайтын қоғамдық үнқатысу алаңына айналуды көздейді.
«Егемен-ақпарат».