Оңтүстік Қазақстан облысынан азық-түлік өнімдерін және өнеркәсіп тауарларын артқан керуен Ақтөбеге атбасын тіреді. «Қоныс» спорт сарайында ұйымдастырылған екі облыстың өнеркәсіп өнімдерін және ауылшаруашылық тауар өндірушілерінің көрме-жәрмеңкесіне қалалықтар мол жиналды. Көрме-жәрмеңкенің салтанатты ашылуында сөз алған Ақтөбе облысы әкімінің орынбасары Ғали Есқалиев Елбасы Н.Назарбаевтың өңіраралық кооперацияны дамыту, аймақаралық байланысты нығайтуға байланысты берген тапсырмасын орындау мақсатында осындай игі бастама қолға алынғанын жеткізді.
Оңтүстік Қазақстан облысы әкімінің орынбасары Ербол Садыр спорт сарайының ішінде ұйымдастырылған көрмеге өздерінің 36 кәсіпорны өз өнімдерін қойғанын, олардың өнімдеріне ақтөбелік кәсіпкерлер тарапынан қызығушылық болып, келісімшарттар жасасуға үмітті екендігін атап өтті. Ол сондай-ақ, жәрмеңкеде облыстың барлық аудандарынан 170 тонна азық-түлік өнімдері басқа сауда орындарына қарағанда бағасы 15- 20 пайыз арзанға сатылып жатқанын жеткізді. Жалпы сомасы 803 миллион теңгенің өнімдері әкелінгенін айтып өтті.
Көрмеге Кентау трансформатор зауытының трансформаторлары, «Балтекстил» және «Назартекстил» жауапкершілігі шектеулі серіктестіктерінің көздің жауын алатындай кілемдері қойылған. «Ордабасықұс» ЖШС түйетауықтың ет өнімдерін және он түрлі шұжық ұсынды.
Сатыбалды СӘУІРБАЙ,
«Егемен Қазақстан»
Ақтөбе облысы