соғыс ардагерлерінің сапарларына сәттілік тілейді
Еліміздегі Ұлы Отан соғысының ардагерлері осы жылдың мамыр айында ТМД елдеріне бару үшін кез келген пойызға тегін отыра алады. Бұл – кешегі сұрапыл соғыста ерліктің ерен үлгісін көрсеткен майдангерлерге мемлекеттің көрсетіп отырған қамқорлығы мен құрметі.
Өткен жылы дәл осындай мүмкіндік 688 ардагерге берілген еді. Биыл мұндай шектеу болмайды, дейді мамандар. Ол үшін қариялар өзін ҰОС ардагері екенін анықтайтын құжатты пайдалануы тиіс.
Айта кетейік, қазіргі таңда елімізде 3917 Ұлы Отан соғысына қатысушылар мен мүгедектер бар болса, оларға теңестірілген тыл және еңбек ардагерлері қатары 22 867 адамды құрайды. Жыл сайын Жеңіс күні қарсаңында оларға осындай құрмет пен қызмет көрсетіп тұру елімізде берік дәстүрге айналып келеді. Мәселен, биыл Жеңістің 71 жылдығына орай ардагерлерге біржолғы материалдық көмек көрсету үшін жергілікті бюджеттерден 2,6 миллиард теңге қарастырылып отыр.
Талғат РАЙЫМБЕК,
«Егемен Қазақстан»