Соңғы айларда Атырауда мүлікті жария етуге ынта танытушылар көбейе бастағаны байқалады. Мәселен, 1 мамырға дейін өңір тұрғындарынан 1313 өтініш түсіпті. Осыған сәйкес 10,3 млрд. теңгені құрайтын мүлік пен 7,9 млрд. теңгенің ақшасы жария етіліпті.
Өңір тұрғындары сонымен бірге, Қазақстан аумағынан тысқары, яғни шетелдердегі мүліктерін де жария етуге ұйғарым жасапты. Атырау облыстық мемлекеттік кірістер департаменті ұсынған нақты дерекке сүйенсек, осыған орай тұрғындардан 18 өтініш түсіп, 207,4 млн. теңгеге бағаланған шетелдегі мүлік жарияланды.
Мынадай да оқиға бар. Өткен аптада бір азамат өзінің 2 миллиард 700 миллион теңгесін жария етуге өтініш беріп, қомақты қаржысын заңдастырып алды.
Жолдасбек ШӨПЕҒҰЛ,
«Егемен Қазақстан»
АТЫРАУ