Астана хабы аясында альянс құрылды

Астанадағы Мемлекеттік қызмет сала­сындағы өңірлік хаб «Мемлекеттік қыз­­мет көрсету мәселелері бойынша «тең-теңімен» қағидасына сай тәжіри­бе алмасу» атты семинар өткізді. Оған Ка­нада, Әзербайжан, Грузия, Қазақстан­ның мемлекеттік қызмет көрсету орталық­тары­ның өкілдері мен халықаралық сарапшылар қатысты. Семинарды Астанадағы Мемлекеттік қызмет саласындағы өңірлік хаб басқарушы комитетінің төрағасы Әлихан Байменов, Қазақстан Президенті жанындағы Мемлекеттік басқару академиясының ректоры Болатбек Әбдірәсілов, Ақпарат және коммуникациялар вице-министрі Сәкен Сәрсенов сөз сөйлеп ашты. Жиында Экономикалық ынтымақтастық және даму ұйымы (ЭЫДҰ) даму мәселелеріндегі ынтымақтастық жөніндегі директоратының мемлекеттік басқару жөніндегі кеңесшісі Анна Пичинни «тең-теңімен» пішіміндегі тиімді институттар платформасының әдістемесінің мақсаттары жөнінде әңгімелеп берді. Іс-шара барысында Әзербайжан («ASAN» қызмет көрсету орталығы), Грузия (Public Service Halls), Қазақстан («Үкімет азаматтар үшін» мемлекеттік корпорациясы) және Канада (Азаматтарға бағытталған қызмет көрсету институты (ICCS) мемлекеттік қызмет көрсету орталықтарының даму тәжірибелері таныстырылды. Қатысушылар халыққа қызмет көрсету кезінде туындайтын мәселелерді және оларды шешудің инновациялық жолдарын талқылады. Жиында, сондай-ақ, хабтың қатысушы елдер арасындағы тәжірибе алмасу жолдары анықталды. Шара хабқа мүше елдердің сарапшылары «тең-теңімен» қағидасына сай тәжірибе мен білім алмасу үшін платформа жасау мақсатында өткізілді. Бұл платформа халыққа қызмет көрсету саласындағы өзекті мәселелерді, инновациялық тәсілдер мен трендтерді және одан әрі тәжірибе мен білім алмасу мақсатында практиктердің альянсының құру мүмкіндіктерін талқылауға жол ашады. Әріптестер желісі ретінде альянсты енгізу «бір терезе» реформасын жүзеге асыруды жақсартып, хабтың мүше елдерінің арасындағы ынтымақтастықты нығайтады. Хаб Қазақстан бастамасымен БҰҰ Даму бағдарламасымен бірлесе отырып, 25 мүше ел және 5 халықаралық ұйым арқылы құрылды. Қазіргі таңда Хаб 34 мүше елден тұрады, ұйым географиясының Солтүстік Америка мен Еуропа, ТМД елдері, Кавказ бен Орталық Азия мемлекеттерінен ASEAN елдеріне дейін кеңеюі мемлекеттік қызметті жетілдірудегі әріптестік аса қажет екенін көрсетеді. «Егемен-ақпарат»