Онда Р.Василенко Сыртқы істер министрі Қайрат Әбдіраxмановтың финляндиялық әріптесі Тимо Сойниге осы датаға байланысты жазған құттықтау xатын тапсырды. Өзінің сөзінде Роман Василенко екі ел арасындағы байланыстардың жақсы қарқынмен дамып келе жатқандығын атап өтті. Финляндия – Скандинавия елдері ішінде Қазақстан экономикасына ақша салып отырған ірі инвестор. Оның көлемі 300 млн АҚШ долларынан асып жығылады. «Қазіргі кезде Қазақстанда 70-тен астам фин компаниялары жұмыс істеуде. Олар энергетика, телекоммуникация, көлік, логистика, тау-кен, ауыл шаруашылығы, өңдеу өнеркәсібі, тұрғын үй және тағы басқа салаларда еңбек етіп жүр», – деді Р.Василенко.
«Әріптестік қатынастар бұдан әрі де артады, өйткені, Қазақстан мен Финляндия арасындағы Сауда-экономикалық ынтымақтастық жөніндегі үкіметаралық комиссияның жұмысы жандануда. Комиссияның соңғы отырысында энергетика, білім, ауыл шаруашылығы, көлік пен логистика бойынша бірнеше жұмыс тобын құру туралы шешім қабылданды. Екі елдің бизнес xабы да өзара тығыз байланыстарға үлесін қосып келеді. Бұдан бөлек, білім мен инновациялар саласындағы қарым-қатынас нығая түсуде, − дей келіп, Р.Василенко соңғы екі жылда Қазақстанның 20-дан астам ұшқышы Финляндияның азаматтық авиация мектебінде арнайы дайындықтан өткенін жеткізді. Сонымен бірге, 100-ден астам мемлекеттік қызметкер өз біліктіліктерін шыңдап қайтқанын айтты. «Болашақ» бағдарламасы бойынша фин елінде білім алып жүрген жастар да аз емес», – деді ол.
Финляндияның Қазақстандағы Төтенше және өкілетті елшісі Илкка Райсанен екі ел арасындағы дипломатиялық қарым-қатынастардың дамуына жоғары баға бере келіп, оны әлі де тереңдете түсу қажеттігін атап өтті. «Финляндия үшін Қазақстан – Орталық Азияға жол ашатын қақпа. Біз де Қазақстан үшін бүкіл Солтүстік Еуропа аймағының қақпасы бола аламыз деп сенемін. Астанадағы ЭКСПО-2017 көрмесіне қатысатынымызға қуаныштымыз. Себебі, дәл осы жылы біз тәуелсіздігіміздің 100 жылдығын, сондай-ақ екі ел арасындағы дипломатиялық қарым-қатынастың 25 жылдығын атап өтіп отырмыз», – деді И.Райсанен.
Баспасөз мәслихатында Финляндия президенті Саули Ниннисте ЭКСПО-2017 халықаралық көрмесіне келуді жоспарлап отырғаны да айтылды. Оның сапары маусым айының 19-21-іне белгіленіпті. Айта кететін жайт, бұл Финляндия басшысының Қазақстанға жасайтын үшінші сапары болмақ.
Жақсыбай САМРАТ,
«Егемен Қазақстан»
