Кеше Ақордада Мемлекеттік хатшы Гүлшара Әбдіқалықованың басшылығымен Қазақстан Президенті жанындағы Азаматтық мәселелер жөніндегі комиссияның кезекті отырысы өтті.
Басқосуда Қазақстан азаматтығына қабылдау және шығару мәселелері қаралды. Жиында Мемлекеттік хатшы Г.Әбдіқалықова Тәуелсіздік алған кезден бастап Қазақстанның азаматы болуға талпынған адамдардың саны үнемі өсуде екендігін атап өтті. Оның айтуынша, Тәуелсіздіктің 25 жылында елімізге 983 мың 733 азамат келген. Бұл дерек Мемлекет басшысының парасатты басшылығы арқасында өсіп-өркендеген еліміздің әлеуметтік-экономикалық жетістіктерін, орнықты дамуын, ұлтаралық келісім мен тұрақтылықтың берік орнағанын айқындай түседі.
– Ел Тәуелсіздігінің 25 жылдығы қарсаңында көптеген адам Қазақстан азаматтығын алғалы тұр. Біз оларға бақытты өмір және Отанымыздың игілігі үшін табысты қызмет етуін тілейміз. Олардың тәуелсіз Қазақстанның лайықты азаматы бола отырып, оның әрі қарай дамуына өз үлестерін қосатындығына сенім білдіреміз, – деді Гүлшара Әбдіқалықова.
Айта кетейік, Қазақстан Президенті Нұрсұлтан Назарбаев тиісті Жарлыққа қол қойғаннан кейін жақын және алыс шетелдерден келген әртүрлі ұлттың 622 өкілі Қазақстан азаматы атанатын болады.
Жиын қорытындысында тиісті шешімдер мен ұсынымдар қабылданды.
Жолдыбай БАЗАР,
«Егемен Қазақстан»