Назарбаев университет Қазақстанның жоғары білім беру саласы үшін мемлекетке жоғары білім беру саласында қазіргі инс-
титуттарды реформалауға және жаңасын құруға мүмкіндік беретін экспериментальды алаң. Стратегиялық міндеттерді іске асырудағы осындай ерекше рөл Назарбаев университеттің академиялық еркіндік, дербестік, білім беруді, ғылым мен өндірісті интеграциялау, халықаралық ынтымақтастық сияқты негізгі қағидаттарының арқасында мүмкін болып отыр. Сарапшылардың пікірі бойынша, университет алдағы уақытта білім берудің ұлттық жүйесінің артықшылықтары мен таңдаулы әлемдік ғылыми-білім беру практикасын оңтайлы үйлестіретін Қазақстанның ұлттық бренді болуы тиіс.
Тәжірибені тарату – тұрақты процесс. Алайда, мамандар мен пікірдің барынша шоғырлануы әртүрлі форумдар мен конференциялардағы тың тұжырымдардан байқалады. Соның ішіндегі аса маңыздысы, алты жылдан бері Назарбаев университет бастамашысы әрі идеялық дем берушісі болып табылатын Жоғары білім беру көшбасшыларының Еуразиялық форумы.
Биылғы форум 31 мамырда өтеді. Білім беру менеджментіне арналған екі күндік пікірсайысқа Қазақстанның жеке және мемлекеттік жоғары оқу орындарының басшылары, оқытушылар мен студенттер, ғылыми қызметкерлер, мемлекеттік органдардың, жұмыс беруші компаниялардың, білім беру саласындағы қауымдастықтар мен бірлестіктердің өкілдері және өз идеясымен, білімімен және тәжірибесімен бөліскісі келетіндер қатысады. Сондай-ақ, білім беру, менеджмент және экономика саласының халықаралық сарапшылары ой бөліскен.
– Тәжірибені тарату – Назарбаев университеттің бес стратегиялық мақсатының бірі, – дейді білім ордасындағы тәжірибені тарату жөніндегі үйлестіруші Мәдина Айтақанова. – Біз өз тәжірибемізді ортаға саламыз, басқа жоғары оқу орындары өздерінің жетістіктерімен бөліседі. Университетіміз шаңырақ көтергелі көп бола қойған жоқ. Біз үйрену мен даму үстіндеміз. 2012 жылы бірінші Еуразиялық форумда біздің мамандарымыз университет бөлімшелерінің қызметі туралы таныстырылым жасаған болатын. Бұл содан бері дәстүрге айналды.
Студенттер туралы барлық деректер сақталатын регистратор офисінің, университеттегі екінші орында тұрған ғылыми және зерттеу қызметі үшін жауапты провост офисінің жұмысы әрдайым үлкен қызығушылық туғызып келеді. Тағы да бір бөлімше, студенттердің мансап және кәсіби бағдарлау орталығының аты да, заты да әдеттегіден ерекше десе болғандай. Ол түлектерге алдағы қызметін жоспарлауға, білім алуын жалғастыруға, кәсіби дағдысын дамытуға кешенді қолдау көрсетеді. Осылайша, заманауи бәсекелі еңбек нарығында, оның ішінде жаһандық нарықта, жұмысқа орналасуға жол ашады.
Креативті жұмыс тәжірибесімен университеттің студенттік істер бойынша энтузиасттар командасы бөлісе алады. Назарбаев университеттің мақтанышы – бірегей кітапхана. Ол әлемдегі жетекші ақпаратты өндірушілердің ғылыми деректеріне негізделген. Сонымен қатар, электронды кітаптар және оқулықтарды «мәңгілік пайдалануға» сатып алады. Оқу процесін біріктіру мақсатында әлемнің жетекші университеттері тарапынан ұсынатын электрондық оқу материалдары мен оқу курстары да молынан жинақталған. Кітапхананың материалдық қорына келсек, 150 мыңнан астам баспа басылымдары, оның ішінде 80 пайыздан астамы ағылшын, 2700 аудио- және бейне материалдарынан, микрофиштар коллекциясынан тұрады.
– Біз тақырыптар бойынша сұранысты қамтамасыз етіп, бар мүмкіндікті жеткізуге тырысамыз. Өйткені, біз алға ұмтылып, даму үстінде келе жатырмыз. Жыл сайын тыңдаушылар саны өсе түсуде. Ал тәжірибе алмасу ісінде қаржылық жағынан ынталандыру да жақсы ұйымдастырылған. Назарбаев Университеттің мәртебесі ерекше – дербестік және академиялық еркіндікке негізделген. Бұл бізге Білім және ғылым министрлігінің шеңберінде қалып қоймай, өз бағдарламамызды әзірлеу және бекіту құқығын береді. Алайда, бұл ретте біз бағдарламалық және институционалдық аккредитация алу үшін академиялық сапа талаптарын сақтауға тиістіміз. Бұдан басқа Болон процесінің қағидаларын да ұстанамыз. Тұтастай алғанда, жетекші университеттермен әріптестік моделіміз таңдаулы әлемдік тәжірибені тікелей зерделеу, оны өзімізге бейімдеу және одан кейін қазақстандық жоғары оқу орындарына ұсыну мүм-
кіндігін береді, – дейді Мәдина Айтақанова.
Сүлеймен МӘМЕТ,
«Егемен Қазақстан»
