Мерекелік кешті тамашалауға келген 50 мыңға жуық қала тұрғыны мен қонақтардың басы «Қазақ елі» монументі алаңында тоғысты. Алуан түрлі шығармашылық топ шоғырланған концертке Қайрат Нұртас, Глюкоза, Төреғали Төреәлі, МОТ, Анна Семенович, Джиган, Алексеев, «Винтаж» сияқты ТМД елдерінің танымал эстрада әншілері қатысып, астаналықтарға серпіліс пен көтеріңкі көңіл-күй сыйлады.
Эксцентрикалық образдарымен көпшілікті таңырқатқан ресейлік поп-группа «Винтаж» әдеттегідей электроника, данс-поп сияқты түрлі музыка жанры араласқан әндерін орындап, сахналық шоу ұсынды. Журналистерге берген сұхбатында, олар Астананы 20 жылдық мерейтойымен құттықтап, жылы лебіздерін арнады.
«Музарт» тобының ізбасары «Muzart live» жобасының жеңімпаздары да осы кеште төбе көрсетті. Кезіндегі сыршыл әндерімен халық жүрегін баураған «МузАрт» сияқты бірден қошаметтің астында қалып жатпаса да, кеште алғаш рет көпшілік назарына ұсынған «Астана» атты жаңа әнді орындау барысынан тәжірибелі леп аңғарылғандай. Жуырда «Жүрегім сені аңсаған» атты бейнеклипті көпшілікке ұсынған олар, шығармашылық ізденіс үстінде екенін айтты.
– Жарты жыл көлемінде студияда жатпай-тұрмай оннан астам ән жаздырдық. Алдағы уақытта «МузАРТ» тобындағы ағаларымызбен бірлесіп, ел аумағында гастрольдік сапарға шықпақ ойымыз бар. Ағаларымыз үнемі «бірлікте болыңдар» үндеп отырады, – деген топ әншілерінің бірі Серікболсын Кішкенбаев бокалдан бөлек, би мен сахна әдебі бойынша апталап дайындалып жатқандарын айтады. Топ жігіттерінің айтуынша, шілде айының басында «МузАРТ» тобымен бірге өнер көрсетпек. Сонымен бірге жақын күндері екінші бейнеклиптері отандық телеарналардан көрсетілетін болады.
Көпшілікке Мот есімімен танылған белгілі рэпер Матвей Мельников те осы кеште өнер көрсетті. Өзінің ашық-жарқын болмысымен көпшілікті жатырқамайтын ол, қазақстандықтарды бүгінгі мерекемен құттықтады.
– Мереке құтты болсын. Өзім де бала тәрбиелеп отырған әкемін, барлық балалардың бақытты болуын тілеймін, – деген әнші мүмкіндік болып жатса қазақстандық әншілермен бірлесіп жұмыс істегісі келетінін айтты. – Ресей шоу бизнесінде қазақстандық әншілердің алар орны ерекше. Қазақстандық әншілердің ішінде Қайрат Нұртаспен шығармашылық бірлестікте жұмыс істегім келеді, – дейді ол.
Ая ӨМІРТАЙ,
«Егемен Қазақстан»
Суреттерді түсірген Ерлан ОМАРОВ
