Даулар құқықтық негізде шешілмек

Алматыда экономика сала­сын­дағы дауларға байланысты істерді қарайтын жоғары арбитраж, экономикалық, шаруа­шы­лық және басқа да соттар төр­аға­ларының кезекті VІІІ мәжілісі өз жұмысын аяқтады. Халықаралық деңгейдегі жиынды кіріспе сөз сөйлеп ашқан Жоғарғы Сот төрағасы Бектас Бекназаров сот төрағаларының кезекті сегізінші мәжілісінің, сонымен бірге ал­дағы басқосулардың да табысты бо­ла­тын­дығына сенім білдірді. Жоғары арбитраж, экономи­ка­лық және шаруашылық соттар төрағаларының басқосуына қа­тыс­қан Ресей, Беларусь, Тә­жік­стан, Қырғызстан және Қазақ­стан мемлекеттерінің өкілдері жи­ында негізінен интеграция жағ­дайындағы ТМД елдері кедендік заңнамасы, көліктік қаты­нас, мемлекеттік баж салығын қайтару төңірегіндегі мәселе­лер­ді жан-жақты талқылап, пікір ал­масты. ТМД елдері арасында эко­номикалық, шаруашылық және өзге де салаларда тығыз байла­ныс орнатылғаннан кейін бұл мемлекеттер арасында туындай­тын түйткілдерді бірлесе отырып шешудің маңызы зор. Жаңа жыл­дың 1 қаңтарынан бастап өз жұ­мы­сын бастайтын ЕурАзЭҚ со­тын құру және өзге де ауқымды істердің көпке ортақ екендігі айдай ақиқат. Тәуелсіз Мемлекеттер Достас­ты­ғы аясында құрылып, бірнеше жылдан бері жұмыс атқарып келе жатқан экономикалық соттың ЕурАзЭҚ сотының құрылуына орай келешекте бір-бірінің құзы­ретіне араласып кетуі мүмкін бе, әлде экономикалық сот өз жұ­мысын тоқтата ма? ТМД елдері сот төрағалары бұл түйіннің көп­шілікке тиімді әрі ортақ шешімін табу төңірегінде де ой бөлісті. Ең бастысы, бұл сот­тардың өз қыз­меттерінде бірін-бірі қайтала­ма­ғаны жөн. Кеден одағына мүше мем­ле­кет­тердің экономикалық ынты­мақ­тастығының аясы кеңейіп, те­рең­дей түскен кезеңде халық­аралық келісімді түсіндіруге бай­ланысты даулы мәселелердің орын алуы әбден мүмкін. Сала бас­шыларының пікірінше, соған орай кеден саясатын іске асы­румен және кедендік реттеу іс-шараларымен байланысты келі­сім-шарттардың құқықтық негізін одан әрі жетілдірудің тиімділігі де, қажеттілігі де орасан. Бақыт БАЛҒАРИНА, Алматы.