Осыған орай Орталық коммуникациялар қызметінің ақпараттық алаңында Жамбыл облысы әкімінің орынбасары Ерқанат Манжуовтың, Ауыл шаруашылығы басқармасының басшысы Нұржан Нұржігітовтің, Мәдениет, архивтер және құжаттама басқармасының басшысы Дүйсенәлі Бықыбаевтың қатысуымен баспасөз мәслихаты болып өтті.
Спикерлердің сөзінше «Ұлы Жібек жолы. Көне Тараздан асқақ Астанаға тарту» керуені 20 мамырда жолға шыққан. Келісті керуен Жамбыл және Қарағанды облыстарындағы 10 елді мекенге аялдап, әр жерде киіз үйлер тігіліп, үлкен сахналарда түрлі шаралар ұйымдастырылған. Екі айлық жол жүрген керуен 26 шілдеде Астана қаласына ат басын тірейді. Керуенді қарсы алу шаралары «Хан Шатыр» ойын сауық орталығының «Ғашықтар саябағында» өтеді.
Д.Бықыбаевтың айтуынша, облыс күндерінің ашылу салтанатына орай ЭКСПО аумағындағы «Амфитеатрда» облыстық филармонияның «Әуені әсем Әулиеата!» атты мерекелік концерті қойылады. Атап айтқанда, бес күн бойы бекітілген кестеге сәйкес «Хан Шатыр» ойын-сауық орталығы жанындағы «Ғашықтар саябағында» облыстық филармонияның, облыстағы жоғары оқу орындарының, аудандар мен Тараз қаласы өнерпаздарының қатысуымен концерттік бағдарламалар, ұлттық салт-дәстүр көріністерінің қойылымдары көрсетіледі.
Ал 29-30 шілде күндері бас қаладағы «Қазанат» ипподромында қала тұрғындары мен қонақтарға ұлттық ат спорты түрлері көкпар, аударыспақ, теңге ілу, жамбы ату ойындарының көрсетілімдері ұйымдастырылып халық назарына ұсынылады. «Этноауыл» қалашығы маңында қазақ күресі, асық ату, бес тас, тоғызқұмалақ, алаңдағы тоғызқұмалақ ойындарының көрсетілімімен қатар құсбегілік және тазы, төбет иттер көрмесі ұйымдастырылады. Ал-
ғаш рет командалық алаңдағы тоғызқұмалақ ойынының тұсаукесер рәсімі өткізіледі.
«Сонымен бірге облыстық филармонияның «Әулиеатадан ән шашу», облыстық қазақ драма театрының «Қыз Жібек» саундтрегі, «Алатау» фольклорлық ансамблінің «Ғасырлар әуені» атты концерті және елімізге танымал ақындар мен әншілердің бірлескен «Бір әуен, бір өлең» атты ән-жыр кеші өткізіледі. 30 шілдеде «Хан Шатыр» ойын-сауық орталығы жанындағы алаңда «Жамбылым қандай тамаша!» атты шығармашылық концерт беріліп, Жамбыл облысы күндерінің жабылуына арналған облыс өнерпаздары мен Жамбыл өңірінен шыққан белгілі эстрада жұлдыздарының қатысуымен Гала-концерт ұйымдастырылады», деді Мәдениет, архивтер және құжаттама басқармасының басшысы Дүйсенәлі Бықыбаев.
Сондай-ақ ЭКСПО-2017 халықаралық көрмесі аясында Астана қаласындағы Жамбыл облысының күндеріне орай шілде айының 29-30 жұлдызында ауылшаруашылық өнімдерінің көрме-жәрмеңкесі өтетін болады.
Рауан ҚАЙДАР,
«Егемен Қазақстан»
