Студенттер арасындағы халықаралық Жазғы универсиада 1923 жылдан бері тұрақты түрде ұйымдастырылып келеді. Студент спортшылардың ірі жарысы саналатын Универсиадаға Қазақстан құрамасы 1993 жылдан бастап ұдайы қатысып келеді. Ал еліміздің құрамасына студенттер ойынының тұңғыш алтын жүлдесі 2003 жылы Оңтүстік Кореяның Тэгу қаласында өткен бәсекеде бұйырды. Сол жылы отандастарымыз екі алтын, төрт күміс медаль олжалап, 174 мемлекет қатысқан сында жүлде қорытындысы бойынша 18-ші орынға тұрақтады. Ал Жазғы универсиада ойындары тарихында спортшыларымыз ең үлкен жетістікке араға 12 жыл салып, Оңтүстік Кореяға қайта оралған байрақты бәсекеде қол жеткізді. 2015 жылы Кванджуда өткен сында Қазақстан құрамасы алты алтын, төрт қола медальмен жалпы есепте 11-ші орыннан көрінді. Кореяның оңтүстігінде өткен жарысқа 94 отандасымыз спорттың 10 түрінен бақ сынаған болатын. Ал Мәдениет және спорт министрлігі Спорт және дене шынықтыру істері комитетінің төрағасы Елсияр Қанағатовтың айтуынша биылғы мақсат – осы межеден асып түсу.
Тайпэйде жалауы желбіреген XXIX Жазғы универсиада ойындары спорттың 21 түрі бойынша өтіп жатыр. Бір айта кетерлігі, халықаралық студенттер ойынының ережесі бойынша баскетбол, су добы, волейбол, дзюдо, жеңіл атлетика, жүзу, суға секіру, үлкен және үстел теннисі, спорттық және көркем гимнастика, таэквондо, футбол және семсерлесу спорт түрі Жазғы универсиада ойындарының міндетті спорт түрлері ретінде саналады. Қалған спорт бәсекелерін Универсиаданы ұйымдастырушы мемлекет таңдап, ұсынады. 2015 жылғы бәсекемен салыстырғанда биылғы жарысқа роллер спорты, ауыр атлетика және у-шу спорты қосымша енгізілді. Ал қазақ спортшыларының оң жамбасына келетін бокс бәсекесі екі Универсиада спортының дәстүрінен түсіп қалған. Бокс спорты соңғы рет 2013 жылы Қазанда өткен Универсиадада жарыстар тізіміне енген болатын.
Биылғы бәсекеге жоғарыда айтып өткен қазақстандық 120 спортшы спорттық гимнастика, дзюдо, садақ ату, ауыр атлетика, семсерлесу, жүзу, таэквондо, теннис, үстел теннисі, жеңіл атлетика, гольф, у-шу, ашық суға жүзу және көркем гимнастика бойынша сынға түсіп жатыр. Халықаралық студенттер жарысының бірінші күнінде ел қоржынына алғашқы медаль түсті. Ауыр атлетикадан 56 килода ерлер арасында бағын сынаған қазақстандық зілтемірші Арлей Чонтей қоссайыс бойынша 258 килоны еңсеріп (115+143), қола жүлдені жеңіп алды. Ал Чонтейден зілтемірді 36 кило ауыр көтерген Солтүстік Корея спортшысы Чол Юн Ом Универсиада чемпионы атанды. Күміс жүлде 263 кило (119+144) көтерген доминикандық Луис Альберто Гарсияға бұйырды.
Жарыстың екінші күнінде спортшыларымыз бір алтын және бір қола медаль иеленді. Ауыр атлетикадан биылғы Азия чемпионы Альберт Линдер Универсиада чемпионы атанды. 69 килоға дейін салмақта сынға түскен Линдер жарыс қорытындысы бойынша 333 кило (148+185) зілтемірді көтеріп, Универсиада рекордын орнатты. Осы салмақтағы солтүстіккореялық зілтемірші Ким Мен Хек 331 килоны (153+178) еңсеріп, Универсиаданың күміс жүлдегері атанды. 325 килоны (145+179) басынан асырған жапон ауыр атлеті Мямото Масонори қола жүлдені қанағат етті. Айта кететіні, Альберт Линдер Азия біріншілігінде 335 кило (148+187) зілтемірді басынан асырған болатын.
Суға жүзуден қола жүлдені Рио-2016 Олимпиадасының чемпионы Дмитрий Баландин иеленді. Ол 100 метрге брасс әдісімен жүзуден 1,17 минут көрсеткішпен үшінші келді. Еске сала кетсек, 2015 жылы Универсиадада Баландин дәл осы брасс әдісімен жүзуден алтын медаль иеленген болатын. Бұл жолы ол екі жыл бұрынғы жетістігін қайталай алмады.
Жазғы универсиаданың үшінші күні де ел спортшылары үшін сәтті болды. Құрама қоржыны бір алтын және бір қоламен толықты. Қазақстандық ауыр атлет Айдар Қазов Универсиада ойындарында Қазақстан құрамасының қоржынына алтын медаль салды. 77 кило салмақта сынға түскен отандасымыз жұлқа көтеруде 145 килоны еңсерсе, серпе көтеру сайысында қарсылас шақ келтірмеді. Ол өзінің үшінші мүмкіндігінде 186 килоны көтеріп, чемпион атанды. Қос сайыс бойынша 331 (145+186) килоны өзіне бағындырды. Ал қола жүлдені дзюдошы Бекәділ Шәймерден иеленді. Бекәділ үшінші орын үшін өткен белдесуде алжирлік балуанды жеңіп, Жазғы универсиаданың қола жүлдегері атанды. Қазақстан құрамасы үш күннің қорытындысы бойынша екі алтын, үш қола медаль жеңіп алды. Екі жыл сайын дәстүрлі түрде ұйымдастырылатын студенттер арасындағы Жазғы универсиада ойындары 30 тамызға дейін жалғасады.
Әли БИТӨРЕ,
«Егемен Қазақстан»