«Тбилиси» крейсерінен жаңа әдіспен ұшақты көкке көтеру оқиғасына сол кезде бүкіл әлем көз тіккен еді. Бұл әдістің ерекшелігі – ұшақ трамплиннен түскендей төмен құлдилап келіп, бірден көтеріліп кетуі керек. Ол, әрине, ұшақтың моторына байланысты. Барлық мәселе бірнеше секундта шешілмесе, сәл іркіліс болса, ұшақ судың астына кіріп кетеді. Сынақшы-ұшқыш Тоқтар Әубәкіров құлдилап та, көтеріліп те үлгерді. Авиация тарихында бірінші рет мұндай әдіспен ұшуды жүзеге асырған ерлік Гиннестің рекордтар кітабына енгізілді.
1111 метр қазы
Шыңжаң-Ұйғыр автономиялық өлкесі Тарбағатайда «Қазақ ұлтының дәстүрлі тағамдары» жәрмеңкесінде Гиннестің рекордына қазақтың қазысы ұсынылған.
Бұл қазыны жасаған – Жарқын Бармақұлы. Қазының жалпы ұзындығы – 1 111 метр. Ал салмағы – 4 572 кг. Диаметрі 6,5 метр алып табаққа қойылған кезде айналма қабаты 71 қатар, ал биіктігі 4 метрге жеткен. Қазыны жасауға 44 жылқының еті кеткен деседі.
Бір қызығы, осы қазының тек он метрі сатылған. Қызу бәсеке барысында 10 метрлік қазыға бір кәсіпкер ұйғыр азаматы 12 700 долларға дейін ұсынса, «Жібек жолы» компаниясының директоры Майра есімді қазақ қызы 14 200 долларға дейін, ал тағы бір қытай азаматы 16 000 доллар беретінін айтқан. Ең соңында «Сая» өнер мектебінің директоры, жас ағартушы Бағдана Әділқанқызы 20 000 долларға жуық бағамен сатып алған.
Биік нысан
Қазақстаннан рекордтар кітабына енген біршама жетістік бар. Еліміз «әлемдегі теңізге тіке шыға алмайтын аумағы ең үлкен мемлекет» ретінде ғажайып кітапқа тіркелген.
Екібастұз қаласындағы «ГРЭС-2» – әлемдегі ең ұзын түтін шығаратын құбыр. Оның ұзындығы – 419,7 м. Мұнараның ең биік шыңына жаяу көтерілу үшін 4 сағаттай уақыт жұмсау керек. Әйгілі Эйфель мұнарасының биіктігімен салыстырар болсақ, «ГРЭС-2» одан 100 метрге биік. «ГРЭС-2» кешенінің қуаттылығы мен мүмкіншілігі Байқоңыр сынды ірі космодром мен өзге де стратегиялық маңызды нысандарды қамтамасыз етуге қауқарлы.
Гиннес рекордтар кітабына Қазақстанның атынан енген тағы бір жетістік – Астанада орналасқан «Ханшатыр» ойын-сауық кешені. Биіктігі 150 метрден асатын бұл ғимарат «әлемдегі ең биік шатыр құрылыс» ретінде танылған.
