Данэлия даусының ерекшелігімен бұған дейін де 2015 жылы «Аялаған Астана» ұлттық іріктеу сынында бас жүлдені жеңіп алып, халықаралық «Жаңа толқын» балалар байқауына жолдама алған болатын. Сол жолы Қазақстан атынан ән шырқаған кішкентай әнші Халықаралық телевизиялық байқауда «Көрермен көзайымы» жүлдесімен оралғаны есте.
Елдің назарына екі жыл бұрын іліккен Данэлия сегіз жасында Игорь Крутой, Филипп Киркоров, Сергей Лазерев сынды қазылар алқасының қошеметіне бөленіп, әйгілі әншілердің әрқайсысы оған 11 ұпайдан баға беріп, мырзалық танытқан болатын.
Енді биыл 10 жасқа толған Төлешоваға «Голос. Дiти» шоуының әншіні көрмей бағалау кезеңінде қазылар алқасының барлық мүшесі бірдей бұрылуға санаулы секундтар ғана жеткілікті болды. Он жастағы Төлешова 10 секундта төрешілерді өзіне қаратты.
Орайы келіп тұрғанда, украиналық шоудың төртінші маусымына Дима Монатик, «Время и Стекло» тобы мен Наталья Могилевская сынды танымал әншілер тәлімгер болғанын айта кетелік. Байқаудың алдыңғы кезеңдерінен сәтті өткен қазақстандық балақай байқаудың «соқыр тыңдау» турында Дэми Ловатоның «Stone Cold» әнін орындады. Байқау төрешілерін әннің алғашқы ноталарымен-ақ баурап алған балдырғанның орындауындағы бұл әннің композициясы ересек музыканттардың өзіне бағына бермейтін күрделілігі бар.
Данэлияның даусының тұнықтығына тәнті болған Наталья Могилевская «Голос. Дiти» байқауында бұрын-соңды бұл әнді осыншалықты шеберлікпен орындаған балдырғанның болмағандығын атады. Жарыста қазылар алқасының мүшелері түгел Данэлияға тәлімгер болуға ықылас танытса-дағы, талантты жерлесіміз Дима Монатиктің командасында әрі қарайғы әншілік бағын сынауға шешім қабылдады.
Осылайша он жастағы алматылық балғын украиналық шоудың жұлдызына айналып тұр.
Айнаш ЕСАЛИ,
«Егемен Қазақстан»
АЛМАТЫ
