Аймақтар • 12 Желтоқсан, 2017

Алыс ауылдағы білім ордасы

779 рет
көрсетілді
5 мин
оқу үшін

Білім беруді жетілдіру, мектептерді қажетті заманауи­ жабдықтармен қамтамасыз етуге мүмкіндік мол, оқытушыға қойылатын талаптар жоғары дегенмен, ауылдың аты – ауыл. Ондағы мектептердің барлығы осы талаптар тұрғысынан көріне алады дей алмаймыз. Осы орайда облыстық білім басқармасы өкілдерінен ауыл мектептерінің ахуалы жайлы сұрағанымызда, олар Маңғыстау ауданына қарасты Ұштаған ауылындағы мектепке барып көруге кеңес берді. 

Алыс ауылдағы білім ордасы

Аталмыш мектеп өз бас­тау­­ын сонау діни сауат­ ашу мектептерінен алған екен. Бұқарадан оқу бітірген Нұр­­­нияз ахунның тәлімін жал­ғастырған шәкірттердің киіз үйдегі мектептері 30-шы жыл­дардың бас кезінде екі бөлмелі мектепке, кейін кол­хоздың төрт жылдық мек­тебіне айналған. Оқу орда­сының бүгінгі басшысы өз мектебінің өткенімен, тарихымен мерейленетіні бай­қалып тұр, бірден мектепті ара­латып, оның кешегісі мен бүгіні туралы ұзақ баяндап бер­ді. Әбіш Кекілбай оқыған ауыл­дың бүгінгі мектебінің бас­шысы мақтанса орынды болар...

1954-55 жылдары Ұшта­ғанда салынған, Ленин атын иемденген алғашқы мектеп арада 20 жылдан астам уа­қыт өткенде жаңарып, ауыл тұр­ғындары екі қабатты мектепке ие болған. Алайда тағы 20 жыл өткенде бұл мек­теп суға кетіп, жарамсыз бо­лып­­ қалады да, 2006 жы­лы­ жаңа мектеп ғимараты бой­ көтереді. Мектебі суға ке­тіп, жаңа мектеп құрылы­сына үлкен үміт еткен ұшта­ғандықтар ескі атауды суға кеткен мектеппен бір­ге тас­тап, жаңа мектепке Ұш­та­ған атын сұрайды. Бұл тілек орындалғанымен, кейін мек­­теп­ке жылдың жел­тоқ­сан айында Ленин, «Ең­бек Қы­зыл Ту», «Қызыл Жұл­дыз» ордендерінің иегері, облыс­тық партия комитетінің пленум мүшесі болған халық қа­­лаулысы, өз ауылының «Алтынсарині» болып, ауыл балаларын оқытуға күш сал­ған, өз қаражаты есебінен қар­­жыландырып, қиын кез­де ауыл тұрғындарын, оқушы­ларды ас-сумен, күш-көлікпен қамтып, біраз балаларды мектепке және бірқатарын Аты­рауға оқытып, ауылға маман дайындап берген, елге қам­қор атымтай азамат Асқар Өтеп­бергенов есімі берілді.

Мектептің бүгінгі бейнесі де жаман емес. 313 балаға лайық­талып салынған ғима­ра­т­та 400-ге тарта бала оқып, 60-қа жуық ұстаз сабақ береді екен.

– Оқушыларымыз да,­­­­­ ұс­­­­таз­­­да­рымыз да түр­л­і­ дең­гей­дегі білім бай­қау­ларына қа­ты­сып, жүлделі орындарға қол­ жет­кізіп келеді. Мек­теп­­­­­тің ішіндегі оқу-тәр­бие­­­­ жұ­­­мысының ең бас­ты көр­­­­­сет­­кішінің бірі осы.­ Біз жүй­­­ріктерімізге, грант ие­гер­леріне, жоғары оқу орын­да­рына түскен түлек­терімізге қарап, өз жұ­мы­сымыз­дың нәтижесін көре­міз және соған қуа­намыз, – дейді мектеп басшысы Қоснияз Әнуарбекұлы.

Мектепте әр жылдары­ ең­­­­бек еткен ұлағатты ұстаз­­дар­­­­дың есімін есте қалды­ру­ мақсатында әр пән каби­не­­­тіне ұстаздардың есімін бе­ріп, төріне суреті мен өмір­бая­нын іліп қоюы әсер­лі. Био­­логия кабинеті Қ.Мұ­қа­жа­новтың, химия кабинеті Ш.Досатовтың, география­ ка­бинеті Т.Ниязмаған­бетов­тің атына берілсе, физика ка­бинеті Б.Сүйесіновтің, ма­те­ма­тика кабинеті С.Әнесов­тің атымен аталады екен. Олар­дың барлығы да мектепте осы пәндер бойынша сабақ беріп, алдынан талай түлекті түлеткен ауыл ұстаздары.

Ауласына ағаш отыр­ғы­з­ыл­ған мектептің шағын жылыжайында бірнеше өсімдік түрлері өсіріліп, қоян, құстар әкелінген. Құм ба­су қаупі туындағандықтан, сек­сеуіл, баялыш сынды бұталы өсім­діктерді өсіру арқылы құм тоқтату ісі жүргізілген Ұш­тағанда мектептің жасылдандырудан тыс қалмағаны байқалады.

Мектептің тағы бір тартымды тұсы – бүкіл ауыл тарихын қамтитын мұражайының болуы. Мектеп мұражайының табалдырығынан аттаға­ным­да бөлмеге емес, ауыл тари­хы жазылған алып кітап­тың ішіне енгендей болға­ным­ды жасырмаймын. Ауыл­­дың айтулы азаматта­ры, әр жыл­дардағы мектеп директорлары, соғысқа кет­­кендер, оралғандар мен орал­мағандар, ауыл молдалары, жазықсыз жала жа­былған боздақтар, зергер-ұс­талар, аң­шылар, ауыл дә­рі­гер­лері, батыр аналар, ең­бек озаттары, ауылдың ал­ғашқы жүргізушілері мен механизатор­лары, әр жыл­дардағы әкімдер, Ұштаған мектебін бітірген түлектерді түгендеген альбомдар, ауыл аумағындағы киелі орындар, тарихи-мәдени ескерткіштер – ауылға қатысты барлығы мәлімет мұражайға жинақ­талған. Қызығушылық таныт­қан жанға ауыл туралы тү­сі­ріл­ген деректі фильмді көр­­сетуге компьютер мен ар­­­­­найы тақта да дайын тұр.

– Жылу бар, балалар ыс­тық тамақпен қамтылған. Мек­тептің спорт залы бар, бұ­­рынғы мектептің спорт залын да қосымша жарыстар, үйірмелер үшін пайдаланып отырмыз, кемшін соғып жатқан мәселе жоқ, – деді ол.

Барды ұқсатып, жұмыс­ты үйлестіруімен үлгі ұш­та­ғандық мектеп заманауи жабдықтармен қамтылса, білім беру ісінде өз әріптес­терімен бәсекеде озық орындардан табыларына сенімді.

Гүлайым ШЫНТЕМІРҚЫЗЫ,
«Егемен Қазақстан»

Маңғыстау облысы,

Маңғыстау ауданы