Театр • 08 Қаңтар, 2018

Жанар апайдың қуыршақ театры

1740 рет
көрсетілді
3 мин
оқу үшін

Ол Жамбыл ауылындағы мектептің кітапханасынан орын алыпты. «Мақта қыз», «Тазша бала», «Мыстан кемпір», «Бауырсақ», «Мақтаншақ бала», «Түлкі мен құмыра», «Бес ешкі» сияқты қазақ және орыс ертегілері, жан-жануарлар бейнесіндегі қуыршақтар – үйірменің басты кейіпкерлері. Шағын театр қорында 50-дей қуыршақ бар. 

Жанар апайдың қуыршақ театры

Үйірме «Ертегілер әлемінде» деп аталады. Кітапханаға кір­ген бетте қуыршақтар қар­сы ала­ды. Кітапханашы Жа­нар Қой­шы­байқызы ертегі кейіп­кер­ле­ріне киімдерді де өзі тігеді екен. Жұмсақ ойыншықтарды са­­тып алады. Оларды сөгіп, қол­­ға ыңғайлап қайта тігіп шы­­ғады. Жұмыс үстелі түрлі-түсті қағаз, картон, маталар, жіптер, мақта, моншақтар, ағаш, тері, бояуларға толы. Ке­­зек­ті ертегі қойылымына дай­­­ындалуда. Сахналық кө­рі­­ністі де өзі декорациялайды. Мақсаты – оқушылардың әде­­биетке құштарлығын ояту, олар­­ды кітап оқуға ынталанды­ру, театр, өнер әлеміне деген қызығушылықтарына мүм­­кіндік беру. Үйірме аудан орталығындағы «Пси­хология-педагогикалық тү­зеу орталығында» тәрбиеленіп жат­қан мүмкіндігі шектеулі ба­лаларға ертегілерін көрсетіп, қуа­нтып қайтыпты.

– Алғашында қуыршақтарды қағаздан жасадым. Қолға кигенде қуыршақ қимылға келетіндей болуы керек. Жіп немесе сым ар­қылы қозғалтатын түрлері де бар. Сахналық қойылымдарға кей­і­пкер ретінде қатысу оқу­шы­ларға, әрине өте қызық, дейді Жанар Қойшыбайқызы.

Сахнаның ертегі маз­мұ­ны­на сай безендірілуі, әсем та­биғатты жандандыра­тын ды­быстарға ерекше үйле­сім­ділік қажет. Үйірмеге То­мирис Абдрахманова, Ма­хаббат Жүнісова, Аяжан Айт­құлова, Мар­гарита және Ка­рина Ки­чигиналар, София Ко­зин­с­кая, Вика Треба сияқты мектеп оқушылары тұрақты түрде қатысады.

Жанар Қойшыбайқызының айтуынша, мектеп кітапханасы жұмысын негізі 3 тілде жүргізіп, жыл мезгілдеріне байланысты оқулар ұйымдастырады. Би­ыл «Неделя детских сказок», «Мир книг в мире детства», «Пу­тешествия в мир сказок», «В гос­тях у Андерсона», «В гостях у Пушкина» және басқа ертегілер бой­ынша да үш тілде оқулар өт­кізеді. Оқушылар қазақ, орыс, ағыл­шын тілдеріндегі өлеңдерді мәнерлеп оқып немесе жатқа айтып, білім-біліктерін дамытады. Үйірмеге қатысушы оқушылар ер­тегілерді де үш тілде сөйлетіп, бейнелейді.

– Ертегіні оқимыз, талдаймыз. Әр оқушының қабілетіне сай кейіпкерлердің рөлін бере­мін. Сахнаға шыққан сайын шы­ғармашылық шабыт, із­де­ніске түседі. Саусақтарды жат­тық­тырамыз. Балалар киім­дер­ді саусақтарына киеді. Ер­те­гінің мәтінін айта отырып сау­сақтарын қимылдатып, сюжет жасайды. Көріністі перденің сыртында тұрып немесе қозғала жүріп көрсетеді. Театрдағыдай дауыс ырғағы, бет әлпетінің өзгеруі, қол қимылдары, де­не бітімінің өзгеруі, жүріс-тұ­рыс қозғалыстағы бейнелер көр­сетіледі, дейді үйірме же­текшісі.

Қазір үйірме оқушылары Е. Елубаевтың «Асар», Қадыр Мырза Әлінің «Қотыр торғай» жә­не «Ұр, тоқпақ!» секілді ер­те­­гілерін оқып дайындалуда. Жыл сайын 30-дай ертегі сахналанады.

Фарида БЫҚАЙ,

«Егемен Қазақстан»

Павлодар облысы,

Лебяжі ауданы

Суретті түсірген

Қанат СҰЛТАНҒАЗИН