Білім • 09 Қаңтар, 2018

Ұлағат

570 рет
көрсетілді
4 мин
оқу үшін

Білім беру ісі – күрделі сала­ның бірі. Әсіресе бастауыш сы­нып­тарға сабақ беру, оны ұлт­тық педагогикалық тәр­бие­мен үйлестіріп дамыту әрбір ұстаздан білім мен парасатты талап ететіні сөзсіз. Қазіргі таңда білім ошақтарында зама­­науи инновациялық-әдіс­темелік кешендермен білім беру мол ізденісті қажет етеді. Әрине ұстаздың бәрі бір­дей ізде­німпаз болса, елімізде білім мен тәрбие беру деңгейі жоғары көрсеткішке көтерілер еді. Дегенмен мектептердегі балалардың білімі төмен деп айта алмаймын.

Ұлағат

Көптеген талантты балалар пән­дік олимпиадаларда топ жарып, ұстаз­дарынан терең тағылым мен тәлім-тәрбие алғанын көрсетіп жүр. Ал балаларды мұндай жетістіктерге жеткізу ұстаздардың тынымсыз еңбегінің арқасында ғана іске асатыны белгілі.

Ұрпақ тәрбиесінде ізденімпаз ісімен әріптестеріне үлгі болып жүрген ұстаздың бірі – Шымкент қаласындағы № 75 мектептің бастауыш сынып мұғалімі Қалбибі Алиева. Қалбибінің ұстаздық еткеніне 34 жылдың жүзі болыпты. Ұлттық тәрбиенің қайнар бұлағы болып саналатын мектепте білім беруді үлкен мәртебе санайтын ұстаз, бас­тауыш сынып тәрбиесінің жо­ғары сыныптардан ерекшеліктерін же­тік меңгерген. Мұғалім мектептің жү­регі болса, бала мектептің айнасы. Ұс­таздар өз еңбегінің жемісін айна­дан көргендей бала бойынан көре ала­ды. Осы қағиданы терең ұстанған Қалбибі әр баланың психологиясымен жеке жұмыс істейді. Қазіргі балалар өт­кен ғасырдың балаларына мүлде ұқса­м­айды. Ойларын ашық айтады, тіпті қай­­мықпай мұғалімге сын да айта алады. Сондай сәтте ұстаз бала жүре­гі­нен орын алатын өнеге көрсете білуі керек. Әйт­песе баланы тәрбиесіне ба­ғын­­дыра алмайды. Қалбибі осындай әдіс­­те­мелерді жетік меңгергендіктен бүгінде әріптестеріне үлгі болып келеді. Бір қы­зығы, Қал­бибі сабаққа қажетті көрнекі құрал­дың бәрін өз қолымен жасайды.

Әдістеме дегеніміз ұстаз бойына бірден орнай қоймайды. Жылдар бойғы іс-тәжірибенің арқасында ұстаздық болмысқа сіңеді. Қ.Алиеваның ұс­таздық бет-бейнесі ұзақ жылғы ең­бек­тің арқасында қалыптасты. 34 жылғы ұстаздық қызметте көптеген шәкірттері пәндік олимпиадалық байқауларға қатысып, жүлделі орындар алып, мерейін асқақтатты. Өзі де 2011 жылы Шымкент қалалық «Кемеңгер Елбасы – ырысы елімнің» педагогикалық марафонына, 2012 жылы республикалық «Үздік педагог зерттеуші» атты ғылыми-әдісте­мелік байқауына, 2016 жылы халық­аралық монопәндік жарыс­қа сол жылы республикалық «Просвещение» ақпараттық-әдіс­темелік орталығының жүлделі дипломдарына ие болған. Авторлық бағдарламасы, әдістемелік материалдары республикалық журналдарда жарық көрген. Бастауыш сынып мұғалімі Қаламқас Керімбекова екеуі бірігіп, тіл дамыту курсы бо­йынша 2-4-сыныптарға арнап шығарған әдістемелік құрал Шымкент қалалық білім бөлімінің ғылыми-әдістемелік орталығында бекітіліп, қолданысқа енгізілген. «Ұлағатты ұстаз» төсбел­гісінің иесі.

Қалбибі «Мектепте балаларға сабақ беруден рухани ләззат аламын», дейді. Мектеп табалдырығын түрлі деңгейде аттайтын балаларды сапалы біліммен сусындату оңай жұмыс емес. Мұғалім өз ісіне жан-тәнімен беріліп еңбек етсе ғана, жақсы нәтижеге қол жеткізетініне күмән жоқ.

Ұстаздардың түрлі реформаларды, инновациялық әдістемелерді қабылдай отырып, заман талабына сай білім беруі де күрделі үрдіске айналып отыр. Бала ұстазды сынайтын дәрежеге жеткен заманда білім мен тәрбие беру сабақ сайын ұстараның жүзімен жүріп өтумен тең. Әйтсе де өткір психологиялық қарым-қатынасты бастан өткеріп білім беретін Қалбибінің өмірі балалармен біте қайнасып кеткен. Оған баланың жеке басына айтқан сыны да, сабақ барысындағы логикалық тапқырлығы да қызық. Баланы «досым», мектепті «рухани үйім» деп санайтын парасатты ұстаздың рухани бейнесі осыдай.

Ділдәгүл НҰРМАХАНБЕТ,
журналист

Шымкент