Қазақстан • 05 Ақпан, 2018

Алыстағы ауылдарға байланыс қашан жетеді?

391 рет
көрсетілді
3 мин
оқу үшін

Бүгінде жұрт әлемнің әр түкпірінен бір-бірімен ұялы байланысқа шығып, телефоннан тіпті бір-бірін көріп отыр. Ал Баянауыл тауының баурайындағы ауылдар байланыс аясынан тыс жерде қалып барады.  

Алыстағы ауылдарға байланыс қашан жетеді?

Бүгінде Баянауылдың жаз­­ғы-қысқы туризм әлеуеті таң­ғаларлықтай. Шағын авиа­ция­ға арналған аэродром да салынып жатыр. Инфрақұрылым дегеніңіз керемет, аудан бойын­ша 45 шақырымға жарық­тандыру желісі тартылып, 1700 жарық бағана орнатылып, 2000-нан астам шам қойылыпты. Турис­терді қарсы алуға дайын. Алайда ұялы байланыс аясынан тыс қалған ауылдар ренішті.

Көзбен көргенімізді айтайық. Біз жолсапармен барғанымызда Ақсаң ауылы ұялы бай­­ланысқа да, кең жолақты интернетке­ де қосылмағанына куә болдық. Ауыл аудан орталығының ірге­сінде орналасқан, 1 мың­­ға жуық халық тұрады. Дәл жа­нында Мыр­за­шоқы деген шаң­ғы кешені салынып жатыр. Бұл құрылысқа 350 миллион теңге жұм­салған көрінеді. Ауылдықтардың айтуынша, Мырзашоқы тауына дейін қосымша электр жүйесі тартылыпты. Ал Ақсаңда қыс ай­ла­рында, тіпті жазда да электр жарығы тәу­ліктеп сөніп қала береді. Сондықтан тұр­ғындар биліктен қосалқы станса орнатып беруд­і сұрап отыр.

Аудандық тұрғын үй-ком­­му­­налдық ша­руа­шылық бө­лімінің мәліметінше, ұялы байланыстың тартылмауына себеп – ауыл­дардағы тұрғындар санының азаюы. Халық саны 500-ден асқанда ұялы байланыс желісі орнатылады.

– Байланыс жоқ емес, бар. Барлық ауылда­ бұ­рыннан бері тартыл­ған үй телефондары қосылулы,– дейді олар.

Ауылдардың халқы ұялы байланысқа қосылу жайлы өті­ні­штерін Ақпарат және коммуникациялар министрлігіне де жолдаған. Облыстық «Сарыарқа самалы» газетінің тілшілері де мәселе көтерген. Нәтижесінде өткен жылы ауданда «КаР-Тел» ЖШС Beeline ұялы байланыс желісін тартуды бас­тапты. Қазір аудандағы 38 ауылдың 31-і ұялы байланысқа қосылыпты. Шалғайдағы Құндыкөл және Жұмат Шанин ауылдарына енді ұялы телефон арқылы ха­бар­ласа аласыз. Қаражар, Бір­жанкөл, Көкдомбақ, Қойтас, Ақши, Ұзынбұлақтың Ақшиі, Мыңбұлақ ауылдарын байланысқа қосу үшін ұя­лы телефон операторларына қосымша хат жолданыпты. Жаңажол, Желтау, Күркелі ауылдық округтері де ұялы байланыстың қосылуын асыға күтуде. Бұл жерлерде аудан бойынша мал бағатын 444 шаруа қожалығы, 25 отарлы мал фермасы бар.

Ауыл халқы алыстағы ағайын, студент­ балаларымен байланысу үшін ұялы теле­фонның қолайлы екенін айтады. Заманға сай өзге елдерден қал­ғылары келмейді. Озық уақыттың озық жаңалығы ауыл­ға да қолжетімді болса дейді. Ал билік қарапайым ауыл хал­қының туған жердің тау-тасын, көлдерін сақтап, туризм өркен­дейтін аумақта тұрып жатқанын ескерсе игі.

Фарида БЫҚАЙ,

«Егемен Қазақстан»

Павлодар облысы,

Баянауыл ауданы