Тарих • 20 Ақпан, 2018

Ақ тарының атасы

908 рет
көрсетілді
1 мин
оқу үшін

Бұл сурет бұдан 75 жыл бұрын түсірілген екен. 

Ақ тарының атасы

Ұлы Отан со­ғысының қайнап жатқан 1941 жылдың күзінде Ленинград қаласы жау қоршауында қалып, халқы аштықтан қиналған шақта бір эшелон (23 вагон) азық-түлікті сыйға тартқан қазақстандық делегацияның құрамында ақ тарының атасы, гектарынан 201 центнер дән өсіріп, әлемдік рекорд жасаған ақтөбелік Шығанақ Берсиев те бар болатын. Озат ақсақал қайтарында Мәскеуде кідіріп, оған жазушы Сәбит Мұқанов астананың көрікті жер­лерін аралатыпты. Кешкісін сол кезде атағы жер жарған академик Лысенконың үйінде мейман болып, елге бір жасап оралады. Кейін­нен Ғабиден Мұстафин әйгі­лі «Шығанақ» романын жазады.

Енді ел назарына ұсынып отырған суретімізді сөйлетер бол­сақ, оның басты кейіпкері біз айтып отырған Ақтөбе облы­сындағы «Құрман» колхо­зының Ленин орденді тары өсірушісі Ш.Бер­сиев пен колхоз басшысы Ш.Рах­метжан.

Сол кезеңдерде қазақ телевизиясы да «Ақ тары неге азайып кетті?», «Ақ тарының атасы» хабарларын және «Үш бәйте­рек» телеповесін жарыққа шыға­рып, Шығанақ шыңын дәріп­теген еді. Бағдарлама барысында даңқты диқанның еңбегі түбегейлі зерттеліп, оның іс-тәжірибесі кеңінен насихатталды. 1943 жылы түсірілген сурет телевизия мұрағатына сол портреттік бағдарламаны жұрт­­­шылыққа жариялап жатқан кезең­дерде келсе керек. Биыл қа­зақ телевизиясының 60 жылды­ғына орай оңтайлы сәтте осы сурет оқырман назарына жол тарт­са дедік.

Қажы ҚОРҒАНҰЛЫ,
ардагер-журналист