![301111-21](http://old.egemen.kz/2011img/301111-21.jpg)
Ұзын бойлы, өткір көзді, өзі де, сөзі де, тіпті ісі де ірі сияқты көрінген Жұлдызай Бисенбаевамен бізді Желтоқсан қозғалысының белсенділері таныстырды. 1986 жылғы оқиғалар кезінде «ақ етікті апай» атанған, жастарға мұздай су шашып жатқан өрт сөндіргіш мәшиненің шлангасын жұлып алмақ болып, алға ұмтылған қазақтың жанкешті қызын алаңға шыққан жастар ұмытпапты.
Жұлдызай Қанапияқызы 1946 жылы Қостанай облысының Қамысты ауданында дүниеге келген. Өмір талқысы оны алақанға салған жоқ, төрт жасынан анасынан айырылып, жаутаңкөз болып, аңырап қалды. Әкесі Қанапия белсенді коммунистердің бірі болған. Ол кісі «партияның шақыруымен» 1954 жылы «Алтынсарин» есімі берілген тың кеңшарына алғашқылардың бірі болып көшіп келіп, жұмысқа тұрады. Қазір бұл өңір «Алтынсарин стансасы» деп аталады.
Кент тұрғындары негізінен тың көтеруге келгендер, қазақтар жоқтың қасы. Осы жерде Жұлдызай орысша орта мектеп бітіреді. Әкесінің соңынан қалмай жүріп, мәшинеден бастап барлығын жүргізуді әбден үйреніп, техника құлағында ойнайтын болады.
Жасынан алғыр, өткір, әрі белсенді болған оны мектеп бітірген соң-ақ жастар ұйымының көшбасшылығына сайлайды. 1968 жылы Қостанай пединститутының физика-математика факультетін де аяқтайды. Тапсырған істі ұршықтай иіріп, жалындап тұрған жасты 1969 жылы аудандық комсомол комитетінің хатшылығына сайламақ болады. Бірақ ауыл шаруашылығымен ғана айналысатын аудан болғандықтан, комсомолдың хатшысы да осы саланы жақсы білуі керек, мұғалімдік білім бұл жерге жарамайды деген сылтаумен оны өткізбей тастайды. Бұл намысты қыздың жігерін жанып, сендерге ауыл шаруашылығы білімі керек болса, мен оны Мәскеуіңнің өзінен аламын деп 1970 жылы Тимирязев атындағы ауыл шаруашылығы академиясы экономика факультетінің күндізгі бөліміне оқуға түседі.
Мұнда да белсенді коммунист жас бірден көзге түсіп, қоғамдық жұмыстарға қызу араласып кетеді. Қазақ елінің бір түкпірінен келген қыз Одақ астанасындағы аудандық кеңестің депутаты болып сайланып, факультет комсомол ұйымының хатшысы сияқты қызметтерді атқарады. Тәжірибе алмасу бағдарламасы бойынша Болгария, Чехословакия, ГДР сияқты социалистік елдерге де барып қайтады. Көңілі жарасып, осындағы агрофакта оқып жүрген Нұрайдар Салдаров деген қазақ жігітіне тұрмысқа шығады.
Жұлдызай 1976 жылы академияны ойдағыдай бітіріп, Қарлығаш есімді тұңғыш қызын көтеріп, жолдамамен Алматыға келеді. Ол кезде бір ауыз қазақша білмейтін, өзі де, сөзі де адуынды қазақ қызы ешкімге ұнай қоймайды. Сөйтіп, оған мұнда орын табылмай, Күрті ауданындағы Күрті кеңшарына бас бухгалтердің орынбасары, ал жұбайын бөлімшенің агрономы етіп жібереді.
Бұл кезең Кеңес Одағындағы айтулы жылдардың бірі еді. Өйткені, КОКП ХХVІ съезіне дайындық жыл бойы қызу жүріп жатқан-тын. Жұлдызайдың бірге оқыған Женя деген жолдасы сол кезде «Правда» газетінің ауыл шаруашылығы бөлімінде істейді екен. Сол Салдаровтар отбасына «съездің қонағы» болуға арнайы шақырту жібереді. Оған екінші қызына таяуда босанған Жұлдызай бара алмай, Нұрайдар кетеді. Мәскеудегі жолдастары оның әлі күнге бөлімше агрономы болып жүргеніне қайран қалады. Сөйтіп, намысшыл курстастарының көмегімен ол Мәскеуде съезді қызықтап жүргенде мұнда қалған зайыбына Салдаровтың ВАСХНИИЛ-дің Қазақстандағы филиалынан «Первомай» өндірістік-тәжірибе шаруашылығына директор болып тағайындалғаны жөнінде бұйрық әкеліп береді. Бұл да қызық факт. Қазақстанда шаруашылық басшысы болу үшін неше түрлі кедергілерден өтіп жатса, Мәскеуге тікелей бағынатын шаруашылыққа оның түкке де керегі жоқ екен...
Жұлдызайдың отбасы осы жерде екі жылға таяу болып, одан күйеуін Қаскелең ауданындағы «Шамалған» стансасында орналасқан «Дружба» кеңшарына ауыстырады. Бұл аудан ғана емес, облыс, республикаға белгілі аса ірі көкөніс тұқымын дайындайтын кеңшар болатын. Осында Нұрайдар 1986 жылға дейін директор болып қызмет істейді. Ал Жұлдызай өзі осындағы өнеркәсіптік кәсіпорынның бастығы болады. Осында қызмет етіп жүргенде кейіпкеріміз кандидаттық диссертациясын да қорғайды.
1986 жылы Нұрайдар ауырып қалып, Алматыдағы ауруханаға жатқызылады. Жансақтау бөліміндегі оған Жұлдызай таңертең бір рет, кешке бір рет келіп тұрады. Сөйтіп жүргенде 16 желтоқсан болады...
Сол күні Нұрайдар келіншегіне бір шаруамен Брежнев алаңында орналасқан Ауыл шаруашылығы министрлігіне соғып шығуды тапсырған екен. Ойында ештеңе жоқ Жұлдызай министрлікке барса, керек адамын таба алмайды. Есесіне: «Қонаевты орнынан алып тастапты», деген көңілсіз хабарды естиді. Дәлізде ерсілі-қарсылы сенделгендер оның орнына Мәскеуден біреуді әкеліпті дегенді де күңкілдеп айтып қалады. Бұл жаңалық Жұлдызайдың төбесінен жай түсіргендей болады. Есіне Мәскеуде, «Правда» газетінде істейтін, бұларды съезге шақырған жолдастары Женяның 1985 жылы кездескенде: «Жақында Қазақстанның мұнай, газ өндіретін аймағын түгелімен Орынборға қосады. Өйткені, Горбачев Қазақстанда мұнай мен газ өңдеу зауыттары салынбайды, сондықтан олар шикізатты игере алмайды депті-мыс» деген сөзі ойға оралады. Бұл әңгіме Жұлдызайдың намысына қатты тиіп, қазақ жерінің Ресейге кетпегі іштей ширықтырған болатын. Енді мына ауыс-түйіс сол жоспардың іске аса бастағанындай көрінеді. Қазақ жерін бөлшектеуге көнбеген Қонаевты алып тастап, айтқанынан шықпайтын өз адамдарын әкелген ғой деген ой оның қанын басына шаптырады.
Ішіне көп нәрсе жимай, орысша мінезбен өскен Жұлдызай сол жерде өзімен сөйлескендердің бәріне жоғарыдағы жайды жайып салады. Бұл олардың зығырданын қайнатады. Кейбіреулері мұндайдың шет жағасын естіген де болып шығады. Көптің арасынан Қонаевқа барып жолығуымыз керек, біз – бәріміз де коммуниспіз, бәріміз де оны әрқашан қолдадық, енді неге ол күтпеген жерден кетіп отыр. Қазақстанның бөлшектенетіні рас па? Бізге себебін айтсын деген ұсыныстар шығады. «Давайте, завтра с утра все пойдем в ЦК, встретимся с ним», деген ұсынысты орыс, қазақтың бәрі бірауыздан қолдайды.
Кеудесін намыс қысқан Жұлдызай осы сөзге тоқтап, әріптестерімен бірге министрліктен шықса, Брежнев алаңына сол кездің өзінде көптеген адамдар жиналып қалған екен. Келіншекке жұрттың бәрі де ашулы, бәрі де наразы сияқты болып көрінеді. Бұл қалып Жұлдызайдың намысын қайрай түседі. Ол ертең міндетті түрде келемін деп шешеді.
Осы жерден әрі біз жұртқа белгілі болған фактілерді емес, тек Жұлдызайдың өзінің бастан кешкенін ғана баяндаймыз.
«Ертесіне алаңға келсем, біраз адам жиналып қалған екен. Сол жерде ОК-ның бұл шешімі дұрыс емес, Қонаевты бұлай шығармау керек еді, орнына ел жағдайын жақсы білетін өзіміздің республиканың адамын қою керек деген сияқты сөздер ақырын да, қатты да айтылып жатты. Осы күндері алаңда тек жастар ғана болды десіп жүр. Ол дұрыс емес, мен қатарлы адамдар да, тіпті бізден үлкен кісілер де сол жерде болды. Орыс халқының өкілдері де аз болған жоқ. Бірақ ереуілдеген наразылықтар негізінен бірінші басшылыққа басқа жерден келген орыс өкілінің тұрғанына деген қарсылыққа ойыса түсті. Бір кезде «көшелерге шығып, барлық қазақ азаматтарын қатарымызға қосып алайық» деген идея айтылып, оны бәрі қолдап кетті. Сол уақытта «қайта құру», «демократия» деген ұрандар да шығып, халық өзінен өзі күшейе бастаған жоқ па, сол бізге де күш бітірген еді. Содан көше-көшені аралап кеттік. Ол сапарларды қазір жұрттың бәрі біледі. Жазушылар одағының алдына барып, Олжасқа айғайлағанымыз – бәр-бәрі белгілі. Халық бірлесіп, осылай қосылып сөйлегенде, бір-біріне қуаты дарып, өзінен-өзі күшейе береді екен.
Содан алаңға қайтып келсек, төңіректі қолдарына шүберек байлаған халық жасақшылары мен милиция екі қатар қылып қоршап алыпты. Сырттан келген бізді кіргізбейді, іштегі қалған топты сыртқа шығармайды. Тағы бір ұрандар көтерген қалың топтар да келді. Сол жерде мен жүгіріп алға шығып, Лениннің портретін ұстайық және «Да здравствует ленинская национальная политика» деген ұранды алға қояйық, сонда бізге ешкім тимейді деп айғайладым. Солай етсек те бізді кіргізбеді. Сонсоң «Береке» дүкенінің маңынан бір ақ халатты қыз жүгіріп шығып, бізге мына жерден өтіңдер деп айғайлады. Дүкеннің алдында қазылып қалған шұңқыр бар екен, біз сол жердегі саңылаумен алаңға күшпен кірдік. Ал сол ақ халатты қызды артынан, 20 жыл өткен соң тауып алдық. Ол Гүлнәр Ыстықбаева екен.
Төбелес болады деп ешкім де ойлаған жоқ, бәрі күліп-ойнап жүрді. Әркім өзінше айғайлап жатыр, бәріміз өлең де айттық. Біздің мақсатымыз Қонаевты шығарып, сөзін есту еді. Арамыздағы орыстар: «Он нам как отец родной, пусть с нами попращается», дейді. «Кунаев, Кунаев!» деп айғайладық. Мен мінберге үш рет шығып сөйледім. Бізге Қонаев шықпайды, тараңдар, жұмыс орындарыңа барыңдар деп сөйлегендер көп болды. Бірақ оларды ешкім тыңдаған жоқ. Біреулер оларға тас лақтыруды бастады. Оған себеп бір қазақ бастықтың орысша сөйлегені болды. Ысқырған топ оған қазақша сөйле десе, анау мән бермеді, сонсоң тас лақтыру басталды. Мен өзімнің сөздерімде балаларды тыныш тұруға, арандатуға ермеуге, төбелеске шықпауға шақырдым.
Арамыздан делегация жіберіңдер, біз Қонаевпен ауызба-ауыз сөйлесейік десек, құлақтарына ілмейді. Талап етіп қоймаған соң, бір жас балаларды жіберді. Мен секілді үлкен кісілерді жолатпайды. Ересектер мені барсын деп итереді, ал милиция бізді кіргізбейді. Сөйтіп, жауапқа жарымадық. Әйтеуір, екінші жіберген делегацияның арасына елулер шамасындағы бір кісі еніп кетті. Сол ағамыз шығып, Қонаев өзі арыз жазып кетіпті, деді.
Кешке қарай әскер қаптап келіп, алаңды тығыз шеңбермен қоршап алды. Арандату солардың жағынан басталды. Мен шырылдап, балаларға төбелеспеңдер, тыныш тұрыңдар деп жүрген едім. Сол кезде бір әйелдің: «Ана қызды өлтірді ғой, азаматтар болыспайсыңдар ма?» деп жанұшыра шыңғырған дауысы естілді. Жастар сол жаққа қарай ойысты. Сол кезде төбелес басталып кетті», дейді Жұлдызай.
Бізбен кездесуге Жұлдызай Бисенбаеваның қасына еріп тағы бір апай келген еді. Шырынкүл Өсер есімді бұл жан да желтоқсанға қатысушы екен. «Ана қызға болыссаңдаршы», деп айғайлаған мен едім, – деді ол. – Көз алдымда өрімдей бір жас қызды милиция формасындағы еңгезердей орыс теуіп құлатты да, төмпештей бастады. Шыдамаған мен жүгіріп барып, арашаламақ болған едім, ұшырып түсірді. Сол кезде мен жігіттерден көмек сұрап айғайладым», деді ол.
Өсер Әжіқызының да әңгімесі адамның төбе шашын тік тұрғызады. Оны Қылмыстық кодекстің «қасақана кісі өлтірді» деген 88-ші бабымен соттамақшы болған екен. Бірақ бұл жерде біз оның әңгімесін айтып беруді басқа жолға қалдырып, Жұлдызайдың кейінгі тағдырына оралайық.
Сол күні кеш бата алаңның барлық жағы қоршауға алынады. Жалғыз милиция емес, солдаттар да, курсанттар да бар – бәрі алаңды қоршайды. Тым-тырақай төбелес басталып кетеді. Арматура кесіндісі, сапер күрекшелерімен қаруланған жасақшылар мен солдаттар жастарды аямай, соғып жатты. Жұлдызайдың да басына сілтенген темір шекесі мен мұрнын жырып кетіп, қызыл қанға бояйды.
Осы жерге дейін әңгімесін бір деммен айтқан Жұлдызай апай әрі қарай ауыр күрсініп, біршама уақыт үнсіз қалды. Сол кездің суреттері көзіне елестеп, жүрегі ауырып кеткен сияқты. Жаңа ғана жалын атып тұрған оның көздері де боталап кетіпті.
Кешке қарай алаң тегіс қанға боялды. Жарасы жанына батып, қозғала алмай қалғандар, шашылған киім, түсіп қалған шәлі – бәрі-бәрі тротуарды толтырып тастады. Жастардың шыңғырған дауысы естілмесін деген болуы керек, бір қатты музыкаларды жіберіп қойыпты. Олардың үнінен құлақ тұнады. Алаңға келген «жедел жәрдем» мәшинелері құлап жатқан жастарды алған жоқ, тек солдаттар мен жасақшыларға көмек берумен болды. Бұған ызаланған жастар кейбір «жедел жәрдем» мәшинелерін төңкеріп тастады. Өрт сөндіргіш мәшинелер де өкіре кіріп, мұздай суды шаша бастады. Мен сондайдың бірінің шлангасына жармасып, ағытып тастамақ болған едім. Жастардың есінде сол сурет қалып қойыпты. Артынан Тоқтар, Ертас және тағы басқа жігіттер: «Сіздің аяғыңыздағы ақ етік есімізде қалды дегендер көп болды», деді.
Сол түні қоршаудағы алаңнан Жұлдызай зорға қашып құтылады. Жалғыз-ақ Сәтбаев көшесі арқылы қазіргі «Достық» даңғылына дейінгі жол ашық екен, қалған ел сонымен жөңкіле қашады. Әйтеуір бір үйдің кіреберісіне (ол кезде подъездер жабылмайтын еді ғой) еніп кетіп, аман қалдық. Өзге жұртты темірмен, күрекпен соққылап, итпен қуып бара жатты, дейді ол.
Бір қызығы демонстранттардың арасында қыздар көп таяқ жеген екен. Өйткені, балаларды ұрғызбайық, қыздарға тие қоймас деп алдыңғы лекке кілең соларды қойған едік, дейді ол. Бірақ солдаттар мен жасақшылар оларды да еш шімірікпестен, бастан ұра беріпті.
Тығылған жерден шығуға да қорқып, қыздар көп жатады. Тек сырттан қазақ жігіттерінің дауыстары шыққанда ғана бәрі далаға шығады. Бұл жерден алаң алақандағыдай көрінеді екен. Өйткені, оған жарық самаладай болып түсіп тұрады. «Сол жерде құлап қалған, жатып қалған жастарды автобустарға, жүк мәшинелеріне аяқ-қолдарынан ұстап лақтырып жатқанын көзіммен көрдім. Одан әрі мәшинелер тау жаққа бет алды. Мен өзім ғана солай жүрген сегіз мәшинені санадым», – дейді Жұлдызай апай.
Сол түні кейіпкеріміз таныстарының үйіне түнгі сағат 3-те жетіп, қонады. Ал ертесіне не болғанын білмек болып, көшеге шығып, Абай даңғылында қалың топ болып келе жатқан жастармен жолығады. Оларға өзінің кешегі көргенін, яғни сегіз автобуспен адамдарды тиеп әкеткенін айтады. Милицияға да мыңдаған жастар қамалғаны белгілі болады. Сол жерде: оларды қамаудан босатсын деп талап етейік дегенге уағдаласады. Бірақ осы кезде бұлардың қасына тоқтаған ақ «Волгадағы» милицияның үлкен шенді адамы бұған: «Женщина, садитесь, мы с вами со вчерашнего дня знакомы», дейді. Бірақ Жұлдызай отырмайды және жанына топталып қалған жастар да жібергісі жоқ-ты. Сол кезде басқа жақтан милиция қызметкерлері жүгіріп келіп, оны жанындағы үш жігітпен бірге мәшинеге күштеп отырғызып, аудандық милиция бөліміне жеткізеді.
Одан КГБ-ның түрмесіне апарады. «Артық айтпаймын, мені ешкім ұрған жоқ, бірақ барынша қорқытты. ОК-дағы ұйымдастырушының атын ата, сен оның адамы екеніңді білеміз. Осыны ұйымдастырушылардың бірі сенсің, ату жазасын алатын боласың, деген қоқан-лоқылар көп болды. Қабырғаға қойып, екі жағымнан пистолеттен оқ атып та қорқытты. Бір сәт көзім көрмей қалған да кездер болды. Ең қызығы халық ешкім ұйымдастырмай-ақ өздері жиналды деген шын сөзімнің біріне сенбейді. Мені ОК-мен тікелей байланыстағы адам деп қана ұғып тұрды. Бірнеше рет ауысқан тергеушілердің бәрі де солай ойлады», дейді Жұлдызай апай.
Ақыры менің ауылдан келгенімді тексеріп көрмек болып, Қаскелең аудандық партия комитетіне телефон шалды. Ондағылар кім екенімді айтумен қатар, барынша жамандап, ол партия мүшесі болса да принципшіл, айтқанға көнбейді деп зарлап қоя бергендерін құлағыммен естідім, дейді.
Сонымен, алдымен партия қатарынан шығару үшін оны Қаскелең ауданына алып барады. Сол күні бір Жұлдызайды партиядан шығару үшін аудандық активті түнгі сағат 2-ден әкеліп отырғызып қойған екен. Партия мүшелері бірауыздан Жұлдызайды партиядан шығаруға қол көтереді. Бәрі де кешегі достары, таныстары. Әрқайсымен қалжыңдасып, әзілі жарасып жүретін жандар. Колесников деген КГБ қызметкерінен басқа бірде-бір адам ара түсіп, жанашырлық білдірмейді.
Бұл үлкен соққы болатын. Бұдан кейін ешқандай жерге жұмысқа тұру, қызмет бабында өсу деген атымен жоқ-тын. Әйтеуір сол күні қайта алып кетпек болғандардан аудандық КГБ бастығы П.Колесников, кеңшар партия ұйымының хатшысы И.Лобарь, аудандық атқару комитетінен А.Горкопенко деген азаматтар жас баласы бар, оның ешқайда қашпайтынына біз кепіл боламыз деп ара түсіп, оны жендеттің тырнағынан құтқарып, үйіне қайтарады. Бірақ әрбір он күн сайын келіп, белгіленіп тұруға мәжбүр етеді.
Зайыбының осындай жағдайға тап болғанын естігенде көптен жансақтау бөлімінде жатқан Нұрайдар қайтыс болады.
«Басыма іс түскен сондай қысылтаяң кезде мен жақсылықты көбінесе басқа ұлт өкілдерінен көрдім», дейді апай. Күйеуінің орнына тұрған кеңшар директоры болған В.Сайкин бұған: «Сені заңның бабымен шығаруға қолым бармай тұр, бұрынғы күнмен «өз еркімен кетті» деп шығарамын», деген көмек жасайды.
Ешқандай жер жұмысқа алмайды. Кеше ғана үйін сыпырып, отын жағып беріп жүретін көршілеріне дейін теріс айналып, амандасуға жарамағанда Сулейман деген түрік азаматы мұның өтінішімен өзінің бұрынғы кәсіпорнынан материалдар әкеліп, қолғап тіккізеді және оны өз әйелінің атынан өткізіп, ақшасын Жұлдызайға беріп отырады.
Бір күні кеңшар директоры В.Сайкин үйді босатуды талап етеді. Өйткені, директорға арнап салынған, аумағы атшаптырым үйге қызығушылар көп болған екен. Соның ішінде астық қабылдау кәсіпорнына (АҚК) жаңадан тағайындалған Данабай деген азаматқа үйді алып бермек болады.
Бұл талапты орынды көрген Жұлдызай басында көніп қалса да, кеше ғана өмірден өткен күйеуінің қолының ыстық табы қалған қарашаңырақтан айырылғысы келмейді. Түнімен жылап, көз ілмей шығады. Ертесіне үйдің жанына мәшине тоқтап, директор бастаған 3-4 адам аулаға беттегенде Жұлдызай үйдегі қосауыз мылтықты алып шығып: «Мен ешкімге зиян қылған жан емеспін, халық жауы атанған жоқпын, бар жазығым халқымның намысын қорғадым. Кеше күйеуімнің денесі осы үйден шықты. Сондықтан мен бұл үйді бере алмаймын. Ал күшпен аламын десеңдер, мен қаным бұзылған адаммын. Маған бәрібір, бесеуіңді де жайратамын, сосын екі баламды, өзімді атып өлтіремін. Осыған тұрсаңдар тағы бір қадам аттаңдар», депті.
Әйелдің әбден ашынған түрін көрген Сайкин: «Ну, ее к черту», деп қолды бір сілтеп, кетіп қалады. Содан кейін үйді аламын деп ешкім келмейді. Бірақ бірде Данабайдың өзі келеді. Ол отбасы үлкен екенін айтып, Жұлдызайға басқа жерден кішірек пәтер беруге, гараж да салып беруге уәде етеді. Ең бастысы – АҚК-ге жұмысқа алуына болатынын да айтады. Осы соңғы сөзге елп еткен Жұлдызай көніп қалады. Ертесіне одан хабар болмаған соң, екі күн өткен соң үйді қашан босату керек екенін білмек болып өзі барады.
Сөйтсе... Данабайдың әкесі, қазақтың ақылгөй ақсақалы: «Өзі де басына іс түсіп жүрген жесір әйелдің үйін тартып алғанымыз обал болады, ол саған құт болмайды», – деп баласын тоқтатқан екен. Содан қайтып Жұлдызайдың үйіне қызығушылар болмапты.
Күндер өте береді. Қайғыға «қарағайдың қарсы бұтағындай қарсы тұрған» Жұлдызай жасымай, екі қызын жеткізуді ойлап, жасырын қолғап тігіп, тамағын асырап жатады. Бір күні үйіне Володя Быков деген жігіт келеді. Бұл кезінде прораб болып істеген, кейін ішіп кетіп, қара жұмыс істейтін жан екен. Әлгі даладан айғайлаған бойы: «Канапиевна, дай трояк, умираю», деп келеді. Неге екенін білмеймін, осынау, өзімсіне айтылған сөздер менің жүйкемді босатып жібергені ғой», дейді апай. Сол жерде еңкілдеп, ботадай боздадым. Ағыл-тегіл кеткен көз жасыма ие бола алсамшы. Араққа ақша сұрай келген мас адамның өзі қатты сасып қалды. Сөйтсем, жүйкемнің бәрі тек шабуыл жасаған жандарға, тек жамандық атаулыға домбыраның шегіндей әбден қатып, өзімсіне, жақын тартып сөйлеген дауысты естігенде бірден босап кеткен сияқты, деп күледі ол қазір. Артынан сол В.Быковпен бірге бірнеше адамды біріктіріп, кеңшардан техника алып, жалгерлік бригада құрып жеке кәсіпкер болып кетеді. Кейін көшіп кеткендердің жер пайларын да сатып алып, 12 гектар суармалы алқапқа ие болып, қант қызылшасын өсіреді. Әрі іскер, әрі білгір жанның шаруасы дөңгеленіп, аудан басшыларының өзі мұның алдына келіп, көмек сұрайтын халге жетеді. Ол ол ма, оңынан тұрған жел оны жебей түсіп, халықаралық қорлармен байланыстар жасап, жаңа техникалар алып, озық технологиялармен жұмыс істеуге қол жеткізеді. Жұлдызай апайдың бұл істегі жетістіктерін айтсақ, бір мақаланың шеңберінен шығып кетер едік. Тек енді оның қалай алданғанын ғана бір ауыз сөзбен айтып кетейік.
Бірде аудан басшыларының бірі келіп, Шамалғаннан қазақ мектебін салғалы жатырмыз, соған сіздің жерден 1,8 га алайық деп едік, есесіне сізге басқа жерден 5 га үлес береміз деп жер актісін сұрайды. Қазақ мектебі деген соң жан бар ма, барлық қағаздарымды қолына ұстата бердім, дейді апай. Сонымен, біраз уақыт өткен соң ауданға барса, өзінің өзгертілген жер актісін түрлі себептермен қайтып ала алмайды. Сабылып бірнеше барады, құжат жоқ. Ақырында ауысып жатқан әкім-қарарлардың мұның жерін сатып жібергені белгілі болады... Сөйтіп, аңырап-боздап апамыз қала береді. Әуелгі жермен келген құт апай заң қуып, есік-тесіктерді жағалап жүргенде ғайып болып, техникалары да, малдары да талан-тараж болады. Қазір желтоқсаншы апайымыз әділет іздеп Бас прокуратураның есігін тоздыруда. Біреулер желтоқсаншы ретінде ақталуыңыз керек деген соң Президенттің мұрағатынан Қаскелең аупарткомы жиналысының 1986 жылғы 21 желтоқсандағы мұны желтоқсаншы ретінде партиядан шығарған хаттамасының көшірмесін алады. Оны Бас прокуратураға әкеліп берсе, ондағы бір бастықсымақ сөзбұйдаға салып, тағы да зығырданын қайнатады.
Сөйтіп, бір кезде туған халқы үшін алып империяға қарсы белдесуге жараған жүрек жұтқан, адуынды жан бұл күндері ешкімнің қадірін білмейтін ұсақ шенеуніктердің жемі болып, жүнжіп кетудің аз-ақ алдында жүріп жатыр.
РS: Желтоқсан оқиғасын көптен бері тереңнен зерттеген адамдардың еңбектерінен де Колбиннің келу себептерін түгел біле бермейміз. Жұлдызай Бисенбаеваның әңгімесінен бір себептің ұшы қылтиып қалғанын зер салып оқығандар аңғарған болар. Ол – Горбачевтің мұнай мен газ шығатын Қазақстанның батыс аймақтарын Орынборға қосқысы келгені туралы әңгіме. Осының шындығын анықтау да Желтоқсан оқиғасының маңызын аша түсер еді.
Жақсыбай САМРАТ.