Иә, қазақ «орамал тон болмайды, жол болады» деп ырымдайды. Әнші Роза Әлқожа қалыптастырған бренд – «Мен сыйға тартқан орамалдың» оюмен өрнектелген орамалдарын, «Мәдени мұра» орталығы жасаған былғары қол сөмкелер мен әмияндарды, «Кербез» фирмасының сағаттарын, «Мерхат» зергерлік шеберханасының күміс сырға-сақиналарын енді бір жерден – «ҚазӨнерден» сатып алуға болады.
– Қазір орамалдарға сұраныс та аз емес. Солтүстік өңірлерде орамал тағатын қыз-келіншектердің көбейіп келе жатқаны қуантады. Аналарымыздың басынан ақ жаулық түспеген ғой. Алғаш рет «Мен сыйға тартқан орамал» дүкені Алматыда ашылды. Қазақтың да брендтік бұйымы болсын деп, «Әлқожа» деген атпен орамалдар шығаруды қолға алдық. Енді міне, Павлодарда 20-шы дүкен есік ашып отыр. Бұл орамалдар ұлттық нақышта өрнектелген. Қытайдан, Кореядан жеткізілген маталар өзіміздің цехта боялады, шеті көмкеріледі, моншақтар тағылады. Біз тігетін әртүрлі түсті орамалдар әйелдерге, қыз-келіншектер, апаларға ұнайды деп ойлаймыз, – дейді әнші.
Жергілікті жас кәсіпкер Әсет Сейітахметтің айтуынша, ұлттық нақыштағы бұйымдарға қазір сұраныс жоғары. Ендігі мақсат – қазір заманауи үлгіде киінсек те ұлттық болмысымызды айқындайтын киімдерді, бұйымдарды қолжетімді ету. Сондықтан әнші Роза Әлқожаға жасалған ұлттық бұйымдарды бір жерге біріктіру туралы ұсыныс қолдау тапты.
– Роза қызымызға өте ризамыз. Орындайтын әндері де сондай әсерлі, әр жүректен орын алады. Кереку өңіріне көктем, күз айларында келіп, бізге жақсы әндер сыйлайды. Өзім де, ансамбльдің мүшелері де енді ылғи да «Мен сыйға тартқан орамалдың» бұйымдарын, күмістерін сатып алмақпыз, – дейді облыс орталығындағы «Сағым жылдар» әжелер ансамблінің жетекшісі Бақытжамал апа. – Біз қазақ әйелдері қонаққа бара қалсақ та, туған күн, мерекелерге сый-сияпатқа орамал сатып аламыз. Келін болып түскен кезде басына орамал жауып, әулеттің аманаты тапсырылады. Орамал тағу – әйелге парыз. Сондықтан орамалды қастерлей білейік.
Фарида Бықай,
«Егемен Қазақстан»
ПАВЛОДАР
Суретті түсірген Дархан Өмірзақ
