Геологиялық барлау саласында «ҚазМұнайГаз» Барлау Өндіру» АҚ көптеген жетістіктерге қол жеткізді. Ең бастысы, өндірістік активтер қызметінің тиімділігін арттыру мақсатында басшылыққа алған ерекше бағдарламалары нәтижесін берді. Қазақстанда мұнай өндіруден көп жылдық тәжірибеге бай және елдің батыс өңіріндегі кеніштердің геологиялық құрылымын қамтамасыз етіп, жаһандық ауқымда бәсекелесуге қабілеттілігін тағы да дәлелдеді.
Кен орындарын игеру тиімділігін арттыру мақсатында ғылыми-зерттеу, талдау және тәжірибе жүзінде тексеру жұмыстарын үздіксіз жүргізіп келе жатқан компания Қазақстанның Каспий теңізі қайраңында ғана емес, құрлықта да мұнай мен газ барлау саласындағы қуатты әлеуетін сақтап келеді.
Тәуелсіздік жылдары экономикалық қиындықтар мен қаржыландырудың жеткіліксіздігі кен орындарында өндіру көлемін едәуір бәсеңдетті. Алайда, дер кезінде өндірістің құлдырауы тоқтатылып, өндіру көлемін ұлғайту мәселесі қолға алынды. Бұл ретте жаңа ұңғымаларды бұрғылау, тұрып қалған ұңғымаларды іске қосу және олардың өнімділігін арттыру жұмыстары жүргізілген еді. Нәтижесінде барлық кен орындарында өндірудің барынша жоғары деңгейі қалыптасты. Бүгінде «ҚазМұнайгаз» Барлау өндіру» АҚ Қазақстанның батысында 41 кен орнын игеруде. Маңызды міндеттерінің бірі – мұнай өндірудің неғұрлым тиімді әдістері мен жаңа технологияларды пайдалана отырып негізгі кен орындарындағы өндіріс деңгейін бірқалыпты ұстап тұру.
Қазіргі таңда компания бірнеше бағытта жұмыс істейді. Мәселен, кен орындарының геологиялық және гидродинамикалық үлгілемесін түзіп, тиянақтаудың өзі үлкен ізденіс. Ұңғыларды геофизикалық-гидродинамикалық тұрғыдан зерттеудің ауқымын белгілеп, сапасын бақылау тағы бар. Сонымен қатар, кен орындарын әзірлеу жайына талдау жасап, олардың қорын есепке алады. Бұған қоса, жер қабаттарының өнімділік қарымын арттырып, мұнай шығару қарқынын еселеу жөніндегі геологиялық-техникалық шаралар мен жаңа технологияларды енгізуге қатысты ұсынбалар береді. Сондай-ақ, геологиялық-кәсіпшілік және геофизикалық ақпараттарды жинап, аумақтық деректер банкінің бірегей жүйесіне реттеп енгізумен, оларды ұдайы толықтырып отырумен айналысады. Ұңғыларды салу және күрделі жөндеу сапасына жедел геологиялық-технологиялық бақылау жасап, қызметкерлердің қажетті санын негізді түрде анықтап, жұмыс өнімділігін арттыру үшін еңбек жағдайының ғылыми сараланған нормативтерін әзірлейді.
2010 жылы қолға алынған жоба аясында Өзен және Қарамандыбас кеніштерінде 3 бұрғылау ұңғымасы бұрғыланып, керн үлгілері түбегейлі зерттелді. Нәтижесінде жер қабаттарының геологиялық-геофизикалық сипаттары туралы ақпараттар қоры біршама толықты. Кен орындарын игеру барысында әлгі ақпарат көздері пайдаға асты. «Ембімұнайгаз» ӨФ-ке қарасты кеніштерде де осындай зерттеу, геологиялық-геофизикалық жай-күйіне байланысты заманауи технологияларды енгізу жұмыстары жүргізілген болатын.
Негізгі инновациялық бағытының бірі – аумақтық-бөліністік деректер банкінің жобасын жасап, реттеп қарастыру. Ол ақпараттарды ұқыпты сақтауды, деректерді уақтылы беруді, түрлі шешімдер қабылдауды тездетіп, сол арқылы кен орындарын басқару ісін жеңілдетуді көздейді. Ал жұмыстың тиімділігін арттыруда өндіріс саласында кен орындарын игеру жүйесін оңтайландыру, жөндеуаралық кезеңді ұзарту, құбыр желілерінің жұмыс істеу мерзімін арттыру бастамасы жүзеге асырылуда. Ол үшін модельдендірудің қазіргі заманғы әдістерін қолдану қажеттігі туды. Неғұрлым жетілдірілген жабдықтар мен материалдарды пайдаланудың автоматтандырылған жүйесі арқылы да біршама қиындықты жеңуге болады. Өндірістік циклдың тиімділігін арттырудың тағы бір бағыты – жер бетіндегі инфрақұрылымдарды, атап айтқанда, мұнай және оны дайындау пункттерін жетілдіру. Осылайша материалдық-техникалық қамтамасыз ету мен үдерістердің басым бөлігі үнемі жетілу үстінде деуге толық негіз бар.
Мереке ТАҢАТАРОВ.