Амантай Дәулетбеков 1917 жылы Қарағанды облысының Жаңаарқа ауданында туған. 1943 жылы Поныри қалашығы маңында болған қиян-кескі ұрыста ішінде жаңаарқалық жауынгер де бар шағын әскер жау қоршауында қалады. Бар күшімен лап қойған жауға ақтық деміне дейін қарсы тұрып, табандылық танытқан ерлер өңмеңдеген басқыншылардың бетін қайтарды. Ерлікпен қаза тапқан Амантай Дәулетбековке Кеңес Одағының Батыры атағы беріледі.
«Дала сахнасындағы» көріністі соғыс уақытындағыдай әсерлі ету үшін «Астана» өңірлік қолбасшылығы шараға қатысушыларды полигонмен қатар, әскери техникамен, артиллериялық қарулармен, дала асханасымен, медициналық палаткалармен қамтамасыз етті. Ал жау әскерлерінің рөлін ойнау үшін «Орталық» өңірлік қолбасшылығының әскерилері арнайы келді.
Шараға дайындық жұмыстары жоғары деңгейде жүргені байқалады. Екі жақтың әскерлеріне, санитарларға тігілген арнайы киім үлгілерін айтпағанда, әр тараптың өзіне сай қару-жарақтардың макетіне дейін көрер көзге шындай етіп жасалған.
Әскери-тарихи квестке екі жүзден астам адам қатысты. Олардың дені негізінен колледж студенттері, спортшылар және басқа да ерікті қатысушылар. Оларды тасымалдау үшін арнайы автобустар да бөлінген. Шараны Қарағанды қаласының әкімдігі мен мәслихатының, «Нұр Отан» партиясы қалалық филиалының қолдауымен, қалалық мәдениет және тілдерді дамыту бөлімі және Жаңа Майқұдық мәдениет үйі ұйымдастырды.
Даладағы көрініс оны көрген жандарды, әсіресе құрметті қонақ ретінде шақырылған соғыс ардагерлерін айтарлықтай әсерге бөледі. Әрекеттердің шынайылығынан болар, үлкендер жағы көзіне жас алды. Ұлы Отан соғысының ардагері Григорий Степенко айтқандай, жас ұрпақ бабаларының ерлік істерін естен шығармауы үшін осындай шараларды жиірек ұйымдастырып отырған абзал.
Осы шараға Амантай Дәулетбековтің шөбересі Рахман Әбішев арнайы шақырылған болатын. «Адамзат үшін қасіретті шақтар қайталанбауы тиіс, – дейді батырдың ұрпағы. – Елбасы Н. Назарбаевтың ұстанып отырған бейбіт саясатының арқасында қазір аспанымыз ашық, күніміз шуақты. Жүзден астам ұлттар бір шаңырақтың астында тату-тәтті тірлік кешіп жатырмыз, осы мамыражай өміріміз мәңгілік деп сенемін».
Қайрат ӘБІЛДА,
«Егемен Қазақстан»
ҚАРАҒАНДЫ
