Фото: Алтынбек ҚАРТАБАЙ
Нақты айтсақ, Жамбыл облысының әкімі Асқар Мырзахметовтің бастамасымен Тараз қаласындағы Бауыржан Момышұлы атындағы «Жеңіс» саябағын қайта жаңғырту жұмыстары жүзеге асырылғанын жұртшылық жақсы біледі. Шындығында осы уақытқа дейін аталған саябақ қараусыз қалғандай күй кешіп, мұнда көпшілік жиі бара бермейтін болған еді. Алайда айналасы бір айдың ішінде даңқты батыр атындағы саябақ қайтадан жаңғыртудан өтіп, көпшіліктің көзайымына айналды.
Саябақ құрылысына бас-аяғы 300 жұмысшы мен 50 техника жұмылдырылды. Сәт сайын шаһардағы құрылыс қарқын алып, саябақ жаңа келбетке енді. Сонымен қатар тұрғындар тілегіне орай «Жеңіс» саябағы маңындағы Ілияс Жансүгіров көшесіне тағы бір жолақ қосылып, кеңейтілді. Мемориалды кешеннің кіреберісіне арнайы қақпа орнатылды. Аталған кешеннің екі бас қақпасының биіктігі 8 метр, ені 13 метрлік мәрмәр, травертин тастарынан қаланды. Онда күзет сақшыларының мүсіні қойылған.
Саябақтың ортасынан «Мәңгілік алау» кешені орын алған. Сонымен қатар осы уақытқа дейін Жамбыл облыстық қазақ драма театрының бір шетінде тұрған Бауыржан Момышұлының ескерткіші аталған саябаққа көшіріліп, мұнда көрермендер үшін арнайы алаңдар жасалған. Ал «Батырлар» аллеясында Жамбыл облысынан шыққан 39 Кеңес Одағының Батыры мен 9 «Даңқ» орденінің барлық дәрежелі иегерлерінің есімдері жазылған үлкейтілген жұлдызшалар орнатылып, «Даңқ» аллеясында Жамбыл облысынан Екінші дүниежүзілік соғысқа қатысқан 105351 жауынгердің есімі алты қатар мәрмәр тасқа қашалып жазылды.
Саябақты жаңғырту жұмыстарының келесі сатысында «Даңқ» залының құрылысы жүргізіледі. Мұнда соғыс және тыл еңбеккерлеріне арналған музей салынатын болады. Аллеяның ортасында сонау қиын-қыстау жылдары тылда еңбек еткендер үшін монумент, «Тырналар» мемориалдары, іс-шаралар өткізілетін арнайы сахна орнатылады. Сонымен қатар мұнда Ауған соғысы, Чернобыль апатына қатысушылар мен Семей полигонында жауынгерлік борышын өтегендердің монументтері қайтадан жаңартылған түрде саябақтың күншығыс бетіне жайғастырылады.
Саябақтың аумағындағы 15 мың шаршы метрге абаттандыру, көгалдандыру, көгеріштендіру жұмыстары жүргізілді. Мұнда сегіз түрлі ағаштар отырғызылып, оның айналасы гүлзарлармен көмкерілді. Бір айта кетерлігі, аталған саябақтағы ағаштар мен гүлзарларды баптау үшін мұнда су желілері тартылған. Енді алдағы уақытта Қазыбек би көшесі мен Дінмұхамед Қонаев көшесі аралығындағы Үшбұлақ каналының бойында демалушылар үшін жағажай жасалып, бұл жер веложолдармен жабдықталады. Сол маңдағы көпір қайта жөндеуден өтіп, протон қойылады.
Бүгінгі таңда Бауыржан Момышұлы атындағы «Жеңіс» саябағы жамбылдық жұртшылықтың өзара сырласып, тынығып қайтатын орталығына айналды. Әрі бабалар ерлігін ұрпаққа насихаттауда да аталған саябақтың рөлі ерекше. Мұндағы «Ерлік» мемориалдық кешеніндегі даңқты қолбасшы Баукеңнің ескерткіші, оның жанындағы соғыста ерлік көрсеткен батырлардың жеке-жеке жұлдыздары, одан кейін жүз мыңнан астам әскердің жазылған есімдері бүгінгі ұрпаққа патриоттық рух сыйлайтыны ақиқат.
Хамит ЕСАМАН,
«Егемен Қазақстан»
Жамбыл облысы
