Бұл тұжырымды Л.Н.Гумилев атындағы Еуразия ұлттық университетінде Еуразиялық интеграция институтының ұйымдастыруымен «Ұлы астаналар – «ақылды қалалар» атты екі күн бойы өткен мазмұны терең халықаралық ғылыми конференцияда сөз сөйлегендер растай түсті.
Олардың қатарында еліміздің Мәжіліс депутаттары, АҚШ, Ресей, Түркия, Франция, Беларусь, Өзбекстан, Қырғызстан мемлекеттерінің шығармашыл ғылыми зиялы қауым және дипломатиялық миссия өкілдері аталған конференция аясында тұщымды баяндамалар жасап, Астананың атын асқақтата түсті.
Конференцияға қатысушылар Қазақстанның жаңа елордасы – Астананың бой көтеруі Мемлекет басшысының қайраткерлігі мен көрегенділігінің, ерік-жігерінің жеңісі екендігін баса айтты.
Халықаралық жиын аясындағы «Ақыл-ой орталықтарының» басымдықтары: жаңа нақтылық қалыптастыру, «Астана – жалпыұлттық және әлеуметтік бірліктің фарватері», «Әлеуметтік әл-ауқат және экономикалық тұрақтылық: Астана – қазақстандықтардың қаласы», «Жаңа технологиялар және цифрландыру елорданың орнықты даму жолында» тақырыптары бойынша ұйымдастырылған дөңгелек үстел отырыстары мен пікірсайыстарда ең өзекті мәселелер қозғалды.
Ал конференцияның жалпы отырысы Астанаға қатысты құнды деректердің кеніші қазылғандай әсер қалдырды. Атап айтқанда, Мәжіліс Төрағасының орынбасары В.Божко, Қазақстан халқы Ассамблеясы Төрағасының орынбасары – Хатшылық меңгерушісі Л.Прокопенко, АӨСШК Хатшылығының кәсіби (дипломатиялық) персоналының мүшесі Н.Жалғасбаев және басқалар Астананың қалыптасуы мен елорданы дамытудағы Елбасының рөлі жайында толымды пікірлерін ортаға салды.
– Әлемдік дипломатиялық лексикада Астана процесі деген анықтама пайда болды. Бұл ұғым Сирия елін азаматтық соғыстан құтқаруға байланысты ілкімді іс-шаралар барысында жиі қайталанды. Астана атауы Иранның ядролық бағдарламадан шығу мәселесі көтерілген сайын жиі аталады. Астана әлемдік және дәстүрлі діндердің түсіністік тауып, ортақ шешімге келген келіссөздердің тал бесігіне айналды. Астанаға дейін әлемдік діни көшбасшылардың басын бір жерге құрау мүмкін емес болатын. ЕҚЫҰ аясында Астана декларациясының қабылдануы да зор еңбекті қажет етті. Астанада ғылыми орталықтар, әлемдік оқу орындарының филиалдары, медициналық кластерлер құрылып, Астана экономикалық форумына әлемдік экономиканың марқасқалары жиналып тұрады. Бұл жетістіктер алыстан айқын көрінеді, – деді Мәжіліс Төрағасының орынбасары өзінің құттықтау сөзінде.
Қазақстан халқы Ассамблеясы Төрағасының орынбасары – Хатшылық меңгерушісі Л.Прокопенко конференцияға қатысушыларды Астананың 20 жылдығымен құттықтай келе, еліміз тәуелсіздік жылдары өзінің тарихи таңдауын жасап, Мемлекет басшысының батыл саяси шешімі арқылы жаңа астананың қалыптасып, дамудың даңғыл жолына түскендігін атап өтті.
– Бүгінде Астана құрылыс, ақпарат, коммуникация саласында, нақтылай айтқанда, тұтастай еліміздің дамуына серпін беріп келеді. Оған қоса еліміздің әр түкпірінде экономикалық белдеулердің қалыптасуына оң әсерін тигізді. Астананы көшіру еліміздің мемлекеттік аппаратқа, кәсіпорындардың менеджерлеріне стратегиялық сипаттағы ғаламат әлеуметтік-экономикалық жобаларды жүзеге асыруда теңдессіз тәжірибе жинақтауға мүмкіндік берді. Олардың ең бастыларының бірі – ЭКСПО-2017 халықаралық көрмесі. Осыған орай Елбасының салиқалы саясаты елімізді табысты, бейбітшіл және болашаққа сеніммен қарайтын мемлекет ретінде танытты, – деді Л.Прокопенко.
Ал Өзбекстан елшілігінің өкілдері екі ел арасындағы қарым-қатынастарды дамытудағы Астананың рөлін атап өтті.
Конференцияның жалпы отырысында, сондай-ақ Л.Н.Гумилев атындағы Еуразия ұлттық университеті ҚХА кафедрасының меңгерушісі А. Башмаков пен Ресей өкілі, профессор, саяси ғылымдар докторы Р.Канапьянованың баяндамаларын жиналғандар ұйып тыңдады.
Л.Н.Гумилев атындағы ЕҰУ проректоры Баубек Сомжүрек жүргізіп отырған конференция соңында жиынның қорытынды құжаты – арнайы қарар қабылданды.
Серік ӘБДІБЕК,
«Егемен Қазақстан»
