Осы орайда көптен ел аузында, қағаз жүзінде, ақпарат айдынында жүрген Кендірлі шығанағы алдымен ауызға ілігеді. Жаңаөзен қаласынан 70 шақырым қашықтықтағы шалғай шетте қолға алынған, Каспий теңізінің қазақстандық бөлігінде әлемдік деңгейдегі алғашқы курорттың құрылысын салу ел Үкіметінің 2014 жылғы 19 мамырдағы № 508 қаулысымен бекітілген және Қазақстанның туристік саласын 2020 жылға дейінгі дамыту тұжырымдамасында белгіленген басым жобалардың бірі болып табылатын жобаның жүзеге асырылуында асығыстық жоқ.
Жыл сайын «Өзенмұнайгаз» АҚ-қа қарасты демалыс базасы деңгейінде қызмет етіп, мұнайшыларды және аз-маз қонақтарды қабылдап келе жатқан шығанаққа қатысты жобаның межеленген шыңына шарықтай шығып, теңіз жағасындағы айтулы курортты аймақ ретінде жарқырай көз тартып, алыс-жақын елдердің туристерін шақыруына қашан қол жеткіземіз?
Жобаны жүзеге асыру аясында, яғни Кендірлі курортын дамыту жүйелік жоспарына сәйкес, сыйымдылығы 60 мың төсек-орын, оның ішінде 40 мың орын туристерге және 20 мың орын қызметкерлер мен олардың отбасыларына арналған 22 қонақ үй, 16 400 резиденция салу көзделген. Сондай-ақ келушілерге қызмет көрсету үшін бөлшек сауда орталықтары, ашық аспан астындағы және жабық жерлердегі спорттық жарыстар үшін ғимараттар, үш гольф алаңы, яхталық айлақ және жергілікті халық үшін қоғамдық мақсаттағы әртүрлі ғимараттар, өзге де көптеген ғимараттардың құрылысын салу қарастырылған. Жалпы құны шамамен 3,3 млрд АҚШ долларын құрайтын жобада 2020 жылға дейінгі есептелген инвестиция көлемі 1,96 млрд АҚШ долларын құрайды.
Қазіргі таңда Кендірлі курортты аймағын жүзеге асыру үшін толық инфрақұрылымға қол жеткізу, әуежай құрылысын салу және аймаққа газ жеткізу мәселелері күн тәртібінде тұр. Алдымен ауқымды жобаны қолға алатын сенімді инвестор табу өзекті. Бұл тәуекелге, яғни курортты дамытуға германиялық ChironGmbH компаниясы (негізгі инвесторлар – Analoga және CESAInvest) қызығушылық білдірген. «Кендірлі» курортты аймағы құрылысын салуға қатысты Қазақстан Үкіметі мен Германия арасындағы келісімнің жобасы Маңғыстау облысы әкімдігінің тиісті мемлекеттік органдарымен қарастырылып, ұсыныстар мен ескертулер Инвестициялар және даму министрлігіне жолданған.
Неміс компаниясы Кендірлі шығанағында 2700 гектарға жақын алқапта жайлы қонақүй кешендерін, яхтаға арналған айлақтар, бөлшек сауда дүкендері, тұрғын үйлер мен кеңселер және басқа да курорттық қаланың өмірі үшін қажетті инфрақұрылым енгізілетін туристік курорттық қала ашуға ниет білдіруде. Жобаның бірінші кезеңін іске асыруда үш қонақүй, оның ішінде біреуі бес жұлдыздан кем емес дәрежедегі қонақүй-казино, қажетті инженерлік-көлік инфрақұрылымы, одан кейінгі жылдары әрі қарай кеңейтумен тұрғын үйлер кешенін, тұрмыс қызметін көрсету нысандарын салу кірген.
Инвесторларды тарту үшін қолайлы жағдайлар жасау мақсатында «Кендірлі» курортының сыртқы инженерлік инфрақұрылымы нысандарын республикалық бюджет есебінен салу жоспарланған. Оның ішінде «Окарем-Бейнеу» газ құбыры тартылды, «Өзенмұнайгаз» АҚ Кендірліде су тұщыту зауыты құрылысын салуды жүзеге асыру бойынша жұмыстар жүргізуде.
Кендірлі әуежайы құрылысының техникалық-экономикалық негіздемесін түзету бойынша жұмыс жүргізіліп, мемлекеттік сараптама мен экономикалық сараптаманың қорытындысы алынды. Облыс әкімдігі «Маңғыстау облысының Кендірлі курорттық аймағының аумағында ұшу-қону алаңымен Кендірлі әуежайының құрылысын салу» жобасын концессиялық жоба ретінде жүзеге асыру туралы шешім қабылдады.
Демек, курортты дамыту бағытындағы жұмыстар әзірге тек жоба күйінде, ұсыныстар, шешімдер ретінде құжаттарда ғана «өмір сүруде». Кендірлідегі көп істің кешеуілдеуіне не кедергі – қаражат па, айдалаға апарылар инфрақұрылым қиындығы ма, әлде барды біліп, жоқты түсініп, тиімді келісімге келетін инвестор табу ма? Әлі қанша уақытқа дейін көкейдегі әдемі курорт пен қағаздағы жылтырақ есептерге телміретініміз белгісіз...
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы