2010 жылдың соңында, дәлірек айтсақ, желтоқсан айында Еуропадағы қауіпсіздік және ынтымақтастық ұйымына бір жыл бойғы төрағалығының жемісті қорытындысы ретінде Сарыарқа төрінде бой көтерген егемен елдің жаңа елордасы – Астана қаласында 56 елдің мемлекет және үкіметтері басшыларының қатысуымен ЕҚЫҰ Саммитін табысты өткізген және ұзақ уақыттар бойына басқосудың реті келмей жүрген осы алқалы жиынның 11 жылдан соң өтуіне мұрындық болып, сонымен бірге Астана декларациясының қабылдануына да қол жеткізген тәуелсіз Қазақстан мемлекеті 2011 жылдың табалдырығын үлкен абыроймен аттады.
Сөз жоқ, бұл іргесін жаңадан тіктеп, қабырғасын енді ғана қатайта бастаған жас мемлекет үшін орасан зор жеңіс еді. Бұл пікірді төмендегі мына бір дәйектермен-ақ дәлелдеуге болады.
Ресей Федерациясының президенті Дмитрий Медведев аталған саммитте сөйлеген сөзінде «Бүгінгі саммит – ЕҚЫҰ кеңістігінің шығыс аймағында бірінші рет өтіп отырған форум... Қазақстан төрағалығының қуатты іс-әрекеттері, саяси күш-жігері жалпыеуропалық үдерістерге жаңаша серпін берді...» десе, Түркия президенті Абдулла Гүл «Мен Қазақстанның ЕҚЫҰ-ға төрағалығының міндетін атқару барысындағы Президент Назарбаевтың рөлін айрықша атап өткім келеді. Бүгінгі саммит Орталық Азияның Ұйымның болашағын анықтауда белсенді рөл атқаруға дайын екендігінің бір көрінісі» деп атап көрсетті. Ал Еуропалық одақтың президенті Херман ван Ромпей өз ойын «Мен Президент Назарбаевты ЕҚЫҰ-дағы көшбасшылығы үшін құттықтағым келеді. ЕҚЫҰ-ның Орталық Азияда өтіп отырған бірінші саммиті – айта қаларлықтай оқиға. Біз үшін Қазақстан дәстүрді жалғастыру мен өзгерістердің символы болып отыр...», деген сөздерімен жеткізді.
Тарих еншісіне көшкен жылды осындай айтулы да айшықты саяси оқиғалармен түйіндеген Қазақ елін жаңа басталған 2011 жылда да дүбірлі жаңалықтар, маңызды міндеттер күтіп тұрған болатын. Олардың алғашқысы – еліміздің екі ірі мегаполистері – Астана мен Алматы қалаларында осы жылдың ақпан айында өткен VII Қысқы Азия ойындары еді. Дегенмен, Қазақстан шежіресінде елеулі орын алатын осынау оқиғаға тоқталмас бұрын сәл шегініс жасауға тура келіп тұр.
«Егемен Қазақстан» газетінің 2010 жылдың 24 желтоқсаны күнгі санында «Біз қуатты Қазақстан үшін Елбасымен біргеміз!» атты материал жарияланды. Осы мақалада Өскеменде еліміздің Тұңғыш Президенті – Елбасы Нұрсұлтан Назарбаевтың өкілеттігін 2020 жылғы желтоқсанға дейін ұзарту мақсатында бүкілхалықтық референдум өткізу жөнінде республикалық ынталы топтың жиыны болып өткендігі туралы хабарланды. Осы жиынға еліміздің 16 өңірінен жиналған 800 адамның арасында белгілі ақын және қоғам қайраткері Олжас Сүлейменов, «Халық Қаһарманы», ауған соғысының ардагері Бақытжан Ертаев, Парламент депутаттары Наталья Геллерт, Розақұл Халмұрадов, Анатолий Башмаков, «Егемен Қазақстан» республикалық газеті» акционерлік қоғамының президенті Сауытбек Абдрахманов және басқа да республикаға кеңінен танымал адамдар болды. Шығыстан бой көрсеткен осы бастама Қазақстан халқы тарапынан кең қолдау тауып, Елбасының өкілеттігін ұзартуға үн қосқан хаттар легі газет редакциясына 2011 жылдың қаңтар айында да толассыз келіп жатты. Ақыры 15 қаңтарда Парламент палаталарының бірлескен отырысы өтіп, онда Қазақстан Республикасының Тұңғыш Президенті Нұрсұлтан Назарбаевтың президенттік өкілеттігін ұзартуға мүмкіндік бере алатын өзгертулер мен толықтыруларды Конституцияға енгізу туралы заң қабылдау туралы мәселе күн тәртібіне қойылды. Айта кету керек, Парламент сәл бұрынырақ Елбасына осындай ұсыныспен шыққан болатын. Бірақ Елбасы бұл ұсынысты қабылдамады. Дегенмен, Парламент Конституцияның 91-бабының 1-тармағына сәйкес палаталардың әрқайсысындағы депутаттардың жалпы санының бестен төрті дауыс беру арқылы Ата Заңға өзгерту енгізу туралы заңды қабылдай алатын еді. Іс жүзінде солай болды да. Парламент өзінің осы өкілеттігін толық пайдаланып «Қазақстан Республикасының Конституциясына өзгеріс енгізу туралы» заңды қабылдады. 17 қаңтар күні Мемлекет басшысы аталған заңның Конституцияға сәйкестігін қарау жөнінде Конституциялық Кеңеске өтініш беріп, ол өтініш қабыл алынды. Бір айдан астам уақытқа созылған осы мәселенің тоқетерін ақыры Президенттің өзі айтты. Мемлекет басшысы Қазақстан халқына Үндеу жолдап, онда бүкілхалықтық референдумға қатысты өзінің көзқарасын ашық мәлімдеді.
«Мен бүкілхалықтық сенім білдіргені үшін барша қазақстандықтарға шынайы ризашылығымды білдіремін... Бұл – экономикалық даму және елімізді әлеуметтік жаңғыртудағы бағдарымызға бүкілхалықтық қуатты қолдау мен сенімнің айғағы. Мен үшін халқымның қалтқысыз қолдауынан артық биік баға болмайды... Бір жағынан, мен сайлаушылардың басым көпшілігін құрайтын бүкілхалықтық бастаманы кері қайтара алмаймын. Мәселенің екінші қыры, мен Елбасы және Конституцияның кепілі ретінде болашақ саясаткерлерге жаңылыс бағыт сілтейтін іске жол бере алмаймын», деп атап көрсетілді Үндеуде. Осыларды айта келіп, Мемлекет басшысы өз өкілеттігінің екі жылға қысқаратынына қарамастан, мерзімінен бұрын Президент сайлауын өткізу туралы ұсыныс енгізетінін жеткізді.
Осылайша, 2010 жылдың соңында қазақстандықтардың басым көпшілігінің қолдау білдіруімен күн тәртібіне шығарылған мәселеге, яғни Бүкілхалықтық референдум өткізу ісіне 2011 жылдың ақпанында нүкте қойылып, ол жаңа сипатқа ие болды. 2011 жылдың 4 ақпаны күні Қазақстан Республикасының Президенті Нұрсұлтан Назарбаевтың «Қазақстан Республикасы Президентінің кезектен тыс сайлауын тағайындау туралы» Жарлығы шықты. Дей тұрсақ та, әр нәрсені ретімен баяндау үшін бұл әңгіменің жалғасын кейінге шегере отырып, жыл басында болған оқиғаларға қайта оралуға тура келіп отыр. Ол – Президенттің жыл сайынғы дәстүрлі Қазақстан халқына Жолдауы.
2011 жылғы қаңтар айының 28-і күні жасалған Жолдау Қазақстанның қол жеткізген табыстарға тоқмейілсіп тұрып қалмайтынын, өзі белгілеген даму бағытымен алға қарай қарышты қадам баса беруге ниетті екенін тағы да көрсетіп берді. «Біздің бағдарламаларымыздың басты мақсаты – халықтың әл-ауқатын нығайту» деп атап көрсетілді құжатта. Осы тұрғыда Мемлекет басшысы Үкіметке 2011 жылдың 1 мамырына дейін жұмыспен қамтудың жаңа стратегиясын тұрғын үй-коммуналдық шаруашылықты жаңғырту және халықты сапалы ауыз сумен қамтамасыз ету бағдарламаларын әзірлеуді тапсырды. Алға оза отырып айта кету керек, бүгінде Президент тапсырмасына орай «Жұмыспен қамту-2020», «2011-2020 жылдарға арналған тұрғын үй-коммуналдық шаруашылығын жаңғырту», сол сияқты «Ақбұлақ» бағдарламалары қабылданып, жұмыс істеуде. 2011 жылдың өзінде «Жұмыспен қамту-2020» бағдарламасы бойынша өзін-өзі жұмыспен қамтитындарды, жұмыссыздарды және аз қамтамасыз етілген халықты оқыту және олардың еңбекке орналасуына жағдай жасау үшін 14,6 миллиард теңге қаржы бөлініп отыр. Ал республикалық бюджеттен ауылдағы кәсіпкерлікті дамытуға – 5,3 миллиард теңге, еңбек ресурстарының жұмылғыштығын арттыруға 18,2 миллиард теңге, сол сияқты, жұмыс іздеп өзге жерлерге қоныс аударушыларға тұрғын үй салуға немесе арендалық тұрғын үй алуларына 11,5 миллиард теңге қарастырылды. Барлығы осы аталған бағдарламаны жүзеге асыру үшін 2011 жылға бюджеттен 40,2 миллиард теңге қаржы бөлініп отыр. «Ақбұлақ» бағдарламасы 2011 жылдың мамыр айынан бастап іске қосылды. Екі кезеңді – 2011-2015 және 2016-2020 жылдарды қамтитын құжатта барлық ауылдық елді-мекендердің орталықтандырылған сумен қамту жүйелеріне қолжетімділігін 80 пайызға жеткізу көзделсе, қалалық жерлерде бұл көрсеткіш 100 пайызды құрауы тиіс. Бүтіндей алғанда, «2011-2020 жылдарға арнаған халықты сумен қамту жөніндегі «Ақбұлақ» мемлекеттік бағдарламасын» жүзеге асыруға 900 миллиард теңге бөлу жоспарланып отыр.
Жолдауда білім беру, денсаулық сақтау салалары мен тілдерді дамыту мәселесіне де айрықша көңіл бөлінді. «Өмір бойы білім алу» әрбір қазақстандықтың жеке кредосына айналуы тиіс деген сөз алғаш рет осы құжатта көрініс тапты. «Біз университеттік білім беру мен ғылымды дамытудың жаңа деңгейін қамтамасыз етуге міндеттіміз. Бүгінде жаңа «Назарбаев университеті» арқауында нарық сұранысына бағдарланған жоғары оқу орнының инновациялық моделі қалыптастырылуда. Ол барлық жоо-лар үшін үлгі болуы керек», деп атап көрсетілген Жолдауда. Денсаулық сақтау саласына қатысты Қазақстанда халықтың мақсатты топтарының денсаулық жағдайын бақылаудың ұлттық бағдарламалары кешенін енгізу қажеттігі айтылды. Ауыл тұрғындары үшін медициналық көмектің қолжетімділігін кеңейтуге айрықша назар аударылатындығын да осы Жолдау жолдарынан оқуға болады.
2011 жыл туралы әңгіме қозғай отырып, осы жылдың айтулы оқиғаларының біріне айналған VІІ Қысқы Азия ойындары туралы айтпай кету мүлде қисынсыз болар еді. «Жексенбі күні бірнеше жылдан бері тағатсыздана күткен күніміз де келіп жетті. Осы күні Астанадағы «Астана-Арена» жабық стадионында Қысқы Азия ойындары салтанатты жағдайда ашылып, Әл-Кувейт қаласынан бастау алған Азиаданың алауы алып аренада орнатылған Ойындардың бас қазандығында тұтанды», деп жазды әрқашанда жан жұбатар жаңалықтардың жаршысы болуға ұмтылатын «Егемен Қазақстан» газеті 1 ақпан күнгі санында. Азиаданың ашылу рәсімі елімізде бұрын-соңды болып көрмеген орасан зор ауқымды салтанатпен ұйымдастырылды. Жердің киесі мен елдің иесін танытқан фольклорлық қойылымдар бірінен соң бірі тізбектеліп өтіп, стадионға жиналған 27 мыңға жуық көрерменнің көзайымына айналды. Қазақстанның халық әртісі Асанәлі Әшімов, әнші-композитор Ескендір Хасанғалиев, атақты спортшылар Әмин Тұяқов пен Жәнібек Сауранбаев, күміс көмей әншілеріміз Нұржамал Үсенбаева мен Роза Рымбаева сияқты халқымыздың аяулы ұл-қыздарының осы салтанатты шараның төрінен табылуы, оның мән-маңызы мен ұлттық нақышын арттыра түсті. Ойындардың ашылу салтанатына орай Қазақстан Республикасының Президенті Нұрсұлтан Назарбаев сөз сөйледі.
«Әлем халқының тең жартысы мекендейтін Азия құрлығындағы бұл дүбірлі жарыс – биылғы жылдың ең үлкен спорт мерекесі. Біз мұндай құрлықтық шараны ТМД және мұсылман елдері арасында тұңғыш рет өткізіп отырмыз. Бұл жасампаз шараның Қазақ жерінде өтуі – елімізге көрсетілген құрмет пен сенімнің жарқын айғағы деп білемін. Бұл Қазақстан Тәуелсіздігінің 20 жылдық мерекесінің беташар оқиғасы болады», деп атап көрсетті Мемлекет басшысы осы салтанатты рәсімде сөйлеген сөзінде.
Шынын айту керек, еліміздің қос қанатындай Астана мен Алматыда қапталдаса өткен Қысқы Азия ойындарын көрген де арманда, көрмеген де арманда. Несін айтасың, қуаныштан халқымыздың төбесі көкке жеткендей болса, жастарымыздың кеудесін мақтаныш сезімдер кернеді. Соған сәйкес, сайыстарға баптап қосқан спортшыларымыз да намысты қолдан бермей, өздерінің қабілет-қарымдарын барынша көрсете білді. Жарыстар кезінде көк байрағымыздың қайта-қайта желбіреп, әнұранымыздың жиі-жиі шырқалуы оған айғақ. Айтары жоқ, кеудеміз биік, мерейіміз үстем болды. VІІ Қысқы Азия ойындарының қорытындысында Қазақстан 32 алтын, 21 күміс, 17 қола – барлығы 70 медальді жеңіп алып, бірінші орынға шықты.
«Әділдік пен шеберлік астасқан дүбірлі дода нағыз мықтыларды анықтап берді. Азиада барысында достықтың ізгі жалауы желбіреп, құрлық елдерінің әнұрандары шырқалды. Бұл спорт мерекесі Тәуелсіз Қазақстан тарихының жарқын беттеріне айналады деп сенемін», деп атап көрсетті Мемлекет басшысы Нұрсұлтан Назарбаев VІІ Қысқы Азия ойындарының жабылу сәтінде сөйлеген сөзінде.
12 ақпан күні Астанадағы Тәуелсіздік сарайында «Нұр Отан» халықтық-демократиялық партиясының кезекті ХІІІ съезі болып өтті. 600-ден астам делегат қатысқан съезде Мемлекет басшысы, «Нұр Отан» партиясының Төрағасы Нұрсұлтан Назарбаев сөз сөйледі. Елбасы өз сөзінде партия съезінің еліміз үшін қастерлі меже – Қазақстан Тәуелсіздігінің 20 жылдығы қарсаңында өтіп отырғандығын, осыдан 20 жыл бұрын дербес даму жолына түскенімізді айта келе, бұл жолдың шын мәнінде ел тарихындағы жаңа дәуірінің бастауына – жасампаздық пен қарышты дамудың даңғылына айналғандығын атап көрсетті. Осы съезде сөз сөйлеген нұротандықтар бірауыздан Нұрсұлтан Назарбаевты «Нұр Отан» ХДП атынан президенттікке кандидат етіп ұсынды.
Сөз орайында Қазақстан басшысының Бүкілхалықтық референдум өткізуден бас тартуының әлемдік саясаткерлерді де бей-жай қалдырмағандығын айта кету қажет. Мәселен, «Референдум туралы идеяның жан-жақты қолдау табуы Қазақстан халқының Президентке үлкен сенімін айғақтайды. Соған қарамастан аталған шешімнен бас тарту, оның үстіне мерзімінен бұрын сайлау өткізу туралы ұсынысы Қазақстан басшысының демократия құндылықтарына деген адалдығы мен өз халқының демократия мақсаттарына сенімін көрсетіп берді. Президенттің демократияны нығайту мақсатында демократиялық қағидаттарды тұрақты қолдауы өте мақтанарлық қадам және батыл шешім болып табылады», деп білдірді өз пікірін АҚШ-тың Нью-Джерси штатында тұратын саяси ғылымдар докторы Руфь Нильсен.
Көктемнің жер-жаһанға шуағын шашқан алғашқы күндерінің бірінде Астанада Қазақстан әйелдерінің тұңғыш съезі өтті. Бұл да Тәуелсіз Қазақ елі өміріндегі елеулі оқиғалардың бірі болып табылды. Тағылымды тарихымыз қайраткерлік қасиет қонған аналардан кенде болған емес. Ұлан-ғайыр далада ұрпақ мақтанышына айналған талай ұлағатты аналар өткен. Олардың өшпес өнегесі мен өлмес дәстүрі жаңа Қазақстанда жарасты жалғасын табуда. Ел мен ерге сын болған кезеңде әйел-аналар отбасы мен қоғам жүгін қайыспай көтере білді. Сіздер отбасы берекесін сақтаумен бірге, тәуелсіздікті нығайту ісіне де еселі үлес қосып келесіздер, деп жеткізді өз ойын Мемлекет басшысы осы съезде сөйлеген сөзінде. Съезге Нидерланды Корольдігі Лейден қалалық университетінің докторы, философия ғылымдарының кандидаты, шығыстанушы Зифа-Алуа Мұратқызы Әуезова арнайы келіпті. Қазақтың ұлы жазушысы Мұхтар Әуезовтің немересі өз сөзінде қазақ әйелдерінің осындай алқалы жиынына қатысқанына дән риза екенін білдіріп, Қазақстанның бүгінгі атақ-абыройы төрткүл дүниені баурап тұрғанын айтып, өзінің қазақ жұртын батысқа таныту жолында аянбай еңбек етіп келе жатқанын мақтана хабарлады.
Осының алдындағы жылы ғана ЕҚЫҰ-ға табысты төраға болып, әлем назарын өзіне аударған Қазақстан 2011 жылдың ортасынан бастап тағы бір жауапкершілігі мол міндетті атқаруға кірісті. Ол – 57 мемлекет мүше болып табылатын Ислам Конференциясы Ұйымына төрағалық ету құрметі болатын. Осы жылдың 28 маусымында Астанада аталған ұйымның Сыртқы істер министрлері кеңесінің 38-ші сессиясы өтті. Онда Қазақстан Республикасының Президенті Нұрсұлтан Назарбаев сөз сөйледі. Өз сөзінде Қазақстан басшысы «жауырды жаба тоқу» жолын таңдамай, Ислам әлеміне қатысты көптеген ащы шындықтың бетін ашты.
«ИКҰ-ға мүше елдер әлемдік энергетикалық ресурстардың 70 пайызын бақылауында ұстап отыр. Алайда, оларға әлемдік ІЖӨ-нің тек 2,5 пайызы және әлемдік тауар айналымының 11 пайызы ғана келеді. Жағдайдың бұлай қалыптасуы біз үшін мүлдем орынсыз деп санаймын. Біздің ұйымға мүше әрбір мемлекеттің, тұтастай алғанда Умманың бәсекеге қабілеттігін жоғарылату қажет», деп атап көрсетті Нұрсұлтан Әбішұлы өз сөзінде. Бұл айтылғандарды бір ғана ұлттың үдесінде шектеліп қалмай, жер шары халықтарының, соның ішінде, мұсылман әлемі жұртшылығының мүддесі үшін жүрегі сыздайтын адамның сөзі деп ұққан абзал. Сессияда ИКҰ шеңберінде азық-түлік бойынша өзара көмек көрсету жүйесін жөнге келтіру, энергетика саласына ауқымды инвестициялар тарту, Ислам әлеміне дамудың шикізаттық бағытынан индустриялық-инновациялық жолына қарай көшу, Ұйым аясында шағын және орта кәсіпкерлікті қолдау жүйесін қалыптастыру, исламдық қаржыландыру жүйесін одан әрі дамыту және басқа да көкейкесті мәселелер жан-жақты әңгіме өзегіне айналды. Өз сөзінде Қазақстан Президенті Ислам Конференциясы Ұйымы атауын Ислам Ынтымақтастығы Ұйымы деген атауға өзгерту жөнінде ұсыныс білдірді.
Бұл жылы Семей ядролық полигонының жабылғанына да 20 жыл толып отыр. Семей полигоны сияқты «адамзаттың аждаһасын» құрсаулау да Н.Назарбаевтың батыл шешімінің арқасында мүмкін болды. Сондықтан да Біріккен Ұлттар Ұйымы 2010 жылы ядролық полигон жабылған 29 тамызды «Жаппай қырып-жою қаруынан бас тартудың бүкілдүниежүзілік күні» деп жариялады. Осыған орай осы жылдың 27 тамызында Ядролық сынаққа қарсы іс-қимылдың халықаралық күніне арналған халықаралық конференция болып өтті. Осы басқосуда Қазақстан Республикасының Мемлекеттік хатшысы Қанат Саудабаев Мемлекет басшысы Нұрсұлтан Назарбаевтың конференцияға қатысушыларға арнаған жолдауын оқып берді.
«1991 жылдың 29 тамызында менің Жарлығыммен Семей ядролық полигоны жабылды. Бұл адамзат тарихындағы халықтың қалауымен жабылған ең алғашқы полигон. Ядролық сынақтардың зардаптарын өзінің басынан өткерген Қазақстан халқы бүкіл әлемдегі полигондардың жабылғанын қалайды», деп атап көрсетілді Елбасы жолдауында.
2011 жылдың соңында Тәуелсіз Мемлекеттер Достастығының құрылғанына 20 жыл толмақшы. КСРО-дай алып империяны құлату белгілі бір дәрежеде оңайға түскенімен, ТМД сияқты құрылымды құру соншалықты оңай бола қойған жоқ. Өйткені, 1991 жыл бұрынғы одақтас республикалардың КСРО-дан құтылуды жеті басты аждаһадан құтылғандай көріп, енді қайтып одаққа бірікпеспіз деп, әрқайсының дербес мемлекет болуға талпыныс жасап жатқан шағы болатын. Осындай сәтте оларға Тәуелсіз Мемлекеттер Достастығын құрайық деу жаңағы өзіміз айтқан «аждаһаның» аузына басымызды өз еркімізбен сұғайық дегенмен бірдей еді. Бірақ дәл осындай сындарлы кезеңде де Қазақстан басшысы Нұрсұлтан Назарбаевтың істің жайын алыстан ойлайтын көрегендігі үлкен рөл атқарды. Сөйтіп, Н.Назарбаев 1991 жылдың 13 желтоқсанында Орталық Азия мемлекеттері басшыларының Ашғабаттағы басқосуында КСРО-дан бөлінген республикалардың басшыларын 21 желтоқсанында Алматыда жиналуға шақырды. Ақыры Қазақстан Президентінің бастамасымен Алматыда бас қосқан бұрынғы одақтас республикалардың (Балтық бойы республикаларынан өзге) басшылары Алматы декларациясына қол қойғаны бүгінде көпшілікке мәлім.
2011 жылдың 5 қыркүйегінде Тәжікстанның астанасы Душанбе қаласында өткен ТМД-ға мүше елдердің Мемлекеттер басшылары кеңесінің отырысында да біз атап көрсеткен мәселелердің маңыздылығына мән беріліп, 20 жылдық мерейтой қарсаңында Достастықтың жүріп өткен жолына тағы бір шолу жасалды және алға тың мақсаттар белгіленді.
Қыркүйек айының ортасында Нью-Йорк қаласында өткен Біріккен Ұлттар Ұйымының Бас Ассамблеясының 66-сессиясын да 2011 жылдың басты оқиғаларының бірі ретінде бағалауға болады. Дүние жүзі мемлекеттерінің басшылары бас қосқан осы алқалы жиынға Қазақстан Президенті Нұрсұлтан Назарбаев қатысып, сөз сөйледі.
«Нұрсұлтан Назарбаев сөз басында Тәуелсіздік алғанына 20 жыл толған Қазақстан Республикасы Біріккен Ұлттар Ұйымы Жарғысын ұдайы берік ұстанумен келе жатқанын қадап айтып өтті. Елбасымыз еліміздің әлемдік қоғамдастық үшін аса маңызды екі ірі істі бастап бергенін орынды еске салды. Оның біріншісі – Қазақстанның Семей ядролық полигонын жауып, ядролық қарусыз әлемге адамзат тарихында алғаш қадам басқандығы. «Бұл менің елімнің жаһандағы бейбітшілік пен тұрақтылықты қамтамасыз етуге қосқан ұлы үлесім», деді Назарбаев дүние жүзінің ең мәртебелі мінберінен. Артық-кемі жоқ, дәл солай. Өткен жылы осында, Вашингтондағы ядролық қарусыздану жөніндегі жаһандық саммиттен жазған мақаламызда: «Бүкіл әлем тарихы – соғыс тарихы, қарулану шежіресі. Мыңдаған жылдар бойы адамдар адамдарды қырып-жоюдың жаңа жолдарын ойлап табу үшін жанталасты, мемлекеттер жойқын қару-жарақты көбейткен үстіне көбейтуге ұмтылды. Мыңдаған жылдар бойы халиф, патша, король, император, генсек атаулының бәрі өз елінің бес қаруы бойында болуын, жатжұрттықтарды жаппай қырып-жоюға дайын тұруын көздеді. Тек бір ел ғана жаңа қаруға ұмтылу былай тұрсын, қолына келіп түсіп тұрған аса алапат қарудан өз еркімен бас тартты. Тек бір ер ғана айрықша айбын болатын қатерлі қарудың өңешіне өз қолымен құм құйды. Ол елдің аты – Қазақстан. Ол ердің аты – Нұрсұлтан» дегеніміз сондықтан еді».
Қазақстанның Тұңғыш Президенті Нұрсұлтан Назарбаевтың БҰҰ мінберінен сөйлеген сөзі де, Қазақ елінің қарусыздану бағытындағы қайран қалдырарлық қадамдарын жеріне жеткізе бейнелеген газетіміздің 2011 жылдың 22 қыркүйегі күнгі «Сенім мен бірлік адамзатқа ауадай қажет» деп аталатын мақала да қазіргі заманның қауіп-қатерлерінің ауқымы мен оның алдын алудың адамзат үшін қаншалықты маңызды екенін соқырға таяқ ұстатқандай етіп көрсетіп тұр. Шынымен де, небір тар жол, тайғақ кешулерден өткен Қазақ елінің, сол зобалаңды да зардапты жылдардан қорытынды шығара білген Қазақстан басшысының қарусыздану, бейбітшілікті сақтау ісіне қосқан үлесі ұлан-ғайыр. Содан тек адамзат баласы сабақ ала білсе деп тілейік.
Мемлекет басшысының Жарлығымен Семей ядролық полигонының жабылуына 20 жыл толуына байланысты қазан айының 12-13-і күндері Астана мен Семей қалаларында «Ядролық қарусыз әлем үшін» атты аса ірі форумның өтуі де Қазақстан үшін 2011 жылдағы маңызды оқиғалардың біріне айналды.
Қазақстан басшысы Нұрсұлтан Назарбаевтың бастамасымен ұйымдастырылған алқалы жиынның күн тәртібіне Ядролық сынақтарға жаппай тыйым салу туралы келісімнің тезірек күшіне енуіне тың серпіліс беру, Ядролық қарулар мен өзге де ядролық жарылғыш құрылғылар үшін ыдырағыш материалдар өндіруге тыйым салу туралы келісімді әзірлеу, ядролық қарудан ада аймақтар принципін тиімді енгізу жөнінде практикалық нұсқаулықтар қалыптастыру және Қазақстан Президентінің бастамасына сәйкес Ядролық қарусыз әлемнің жалпыға ортақ декларациясын қабылдау сияқты мәселелер шығарылды. Осы қаралған мәселелер бойынша бірқатар маңызды құжаттар да қабылданды. Олардың ішінен Ядролық қарусыз әлем үшін деп аталатын қорытынды құжат – Астана декларациясын айрықша атап өткен жөн. ГФР-дің экс-министрі Г.-Д.Геншердің, ОАР-дың экс-президенті, Нобель сыйлығының лауреаты Ф. Де Клерктің, МАГАТЭ басшысы Ю.Аманоның, сол сияқты АҚШ-тың, Қытайдың, Ресейдің ресми өкілдерінің қатысуының өзі-ақ аталған форумның ауқымы мен маңызын айғақтай түседі.
Қазақстанның тәуелсіздік алған жылдар ішінде жаһандық деңгейде қаншама маңызды істерге бастамашы болып, бұл тұрғыда қыруар жұмыстар тындырып үлгергенін қаншалықты келістіре баяндасақ та, егер тіршілік тірегі саналатын ел экономикасының өркендеуі туралы деректерге жүгінбесек, айтқандарымыздың бәрі әншейін сылдыр сөзге ұқсап кетуі де мүмкін. Бұл бағыттағы жетістіктерден, яғни еліміздің экономикалық даму деңгейінен төмендегі азды-көпті цифрлардың өзі-ақ қанағаттанарлықтай мағлұматтар бере алады.
Бюджет саласы қызметкерлерінің орташа еңбекақылары 2007 жылға қарағанда 2011 жылы екі еседен астамға өсіп, 67 мың теңгені құрады. Жұмыссыздық деңгейі айтарлықтай кеміді. Ол 2007 жылғы 7,3 пайыздан, 2011 жылдың екінші тоқсанында 5,4 пайызға дейін қысқарды. Осы кезеңде 1млн. 170 мың жаңа жұмыс орындары ашылды.
2008-2010 жылдарға арналған мемлекеттік тұрғын үй құрылысы бағдарламасы шеңберінде ғана 19,7 млн. шаршы метр тұрғын үй пайдалануға берілді. Осы кезеңде 535 мың қазақстандық тұрғын үй жағдайларын жақсартты.
2008 жылдың қаңтарынан бері жаңа туған балаға төленетін бір жолғы жәрдемақы мөлшері 2 есе өсті. Жаңа туған сәбидің бір жасқа толғанға дейінгі күтіміне берілетін жәрдемақы 2,6 еседен астамға артты. 2011 жылы төрт және одан да көп бала туғандарға берілетін жәрдемақы 2007 жылмен салыстырғанда 4,6 еседен астамға өсті.
Білім беруді қаржыландыру шығындары іс жүзінде 2 есеге ұлғайды. Егер 2007 жылы ол 480,7 млрд. теңге болса, 2011 жылы 898 млрд. теңгеден асты. Мектепке дейінгі ұйымдар қатары 4000 нысанға көбейді. 137 балабақша салынса, 2011 жылдың соңына дейін тағы 65-і іске қосылады. 2007 жылдан бері 343 мектеп және 49 техникалық және кәсіптік білім беретін оқу орындары салынды. ЮНЕСКО есебіне сәйкес, 2008 жылы Қазақстан Білім беруді дамыту индексі бойынша 129 елдің ішінде төртінші орын алды. Денсаулық сақтау саласын мемлекеттік бюджеттен қаржыландыру көлемі 2 еседен астамға өсіп, 2007 жылғы 311 млрд. теңгеден 2011 жылы 640 млрд. теңгеге жетті. Кепілді тегін медициналық көмек көлемі айтарлықтай ұлғайды.
Жыл соңына осындай жетістіктермен жеткен Қазақстан 16 желтоқсанда өз Тәуелсіздігінің 20 жылдық мерейтойын лайықты атап өтті. «Жұлдызды жиырма жылда біз елдің көшін аудармай, шаңырағын шайқалтпай, іргесін бекітіп, шекарасын заң жүзінде шегеледік. Мемлекеттік құрылымдарын негіздеп, алтын арқауы үзіліп қалған елдік дәстүрді қайта жалғап, оны берік орнықтырдық. Елтаңбаны айшықтап, күн астында алтын қыраны қалықтаған көкбайрақты шарықтатып, әнұранды шырқаттық. Жұлдызды жиырма жылда ұлтты ұйыстырып, қаймағы бұзылмаған берекелі бірлік орнаттық», деп атап көрсетті Президент 15 желтоқсан күні ел Тәуелсіздігінің 20 жылдығына арналған салтанатты жиында сөйлеген сөзінде. Осындай даңқты күнге орайластырылып Астанада бой көтерген «Мәңгілік ел» Салтанат қақпасы да қазақстандықтардың 20 жылда қол жеткізген зор табыстарын паш ететін белгі ретінде 2011 жылдың айтулы оқиғаларының біріне айналды.
Сөзімізді түйіндей келе, 2011 жылдың бірінші жартысында ғана үдемелі индустриялық-инновациялық даму бағдарламасы шеңберінде елімізде 75 жобаның іске қосылғанын айту қажет. Осы бір азғантай мәліметтерден-ақ Қазақ елінің қазіргі таңдағы қарышты қадамының қандай екенін бағамдай беруге болады. Қазақстандықтар болашақта бұл қарқынның еселене түсеріне де кәміл сенеді.
Сейфолла ШАЙЫНҒАЗЫ.