Заман өзгеріп, заң түрленгенде де қазақ баласының әйел затына құрметі өзгермеді. Бірақ жолы жіңішке қыз баласының сөз өнеріндегі жолы жазушы сөзімен айтқанда, тіпті қылдырықтанып кетті. Әйел затының үлкен жазушы, журналист болуына сенімсіздікпен қарағандар да болса керек. Бірақ осы сөздің семіп қалған түсінігін бұзған қазақтың қаламгер қыздарының бірі Жұмагүл Солтиеваның келбетін таныған сайын сол сенімсіздік жадағай ойдан туған жаттанды сөздей сезіледі бүгін. «Егемен Қазақстан» газетінің шаңырағында газет ардагері, белгілі журналист, жазушы, драматург Жұмагүл Солтиеваның
70 жасқа толу құрметіне орай салтанатты жиын өтті. «Дәстүрі берік ұжымның бағдары айқын. Ғасыр жасап отырған ата басылымның бұрыннан қалыптасқан жолын, ұрпақтар сабақтастығын сақтап, өз ардагерлерімізді қашанда құрметтеп сыйлап жүреміз. Сіздердің салған дара жолдарыңызбен кейінгі өскелең ұрпақ жаңылмай жүре алады. Сіздер айтқан сөз бізге – өнеге, жастарға – үлгі. Өзіңіздің ұжымыңыздың атынан құттықтауымызды қабыл алыңыз» деп «Егемен Қазақстан» АҚ басқарма төрағасы Дархан Қыдырәлі құттықтау сөзін айтып, ардагер қаламгеріміздің иығына камзол жапты. Жұмагүл Солтиеваны құттықтауға замандастары мен сыйластары келді. Жанат Елшібек, Сайраш Әбішқызы, Сүлеймен Мәмет, Қайсар Әлім, Оразгүл Асанғазы, Елена Әбдіхалықова сияқты сөз саңлақтары жылы лебіздерін арнады.
«Осы Астананы Арқаға көшіріп, бағаналы орда құрған Елбасына ризамыз. Астанаға келгенге дейін сырттай сыйласып, жылына бір-екі рет сөйлесетін Жұмагүлмен осы Астанаға келген соң, қоян-қолтық араласып, жұмыс істедік. Жұмагүл десе, менің көз алдыма Бауыржан Момышұлы, Шерхан Мұртаза елестейді. «Қыздардан журналист шықпайды» дегендердің сөзін жоққа шығарған үркердей топтың маңдай алдында жүрген замандасымыз. Журналисткасынан бөлек драматургиясы да көпшіліктің көңілін жадыратты. Мағжанның Зылихасын қалай шебер сахнаға шығарды. Бұл күллі Алаш қайраткерлерінің жарларына қойылған ескерткіш деп ойлаймын. Кешегі желтоқсанда ерлік көрсеткен Қайрат Рысқұлбековтің қыздарға жазған хатын «Қазақстан әйелдеріне» жариялады. Яғни Жұмагүл қашанда ұлтқа керек қазыналарды аршып жүреді. Осы үшін саған халқың да разы» деп құттықтауын жеткізді қоғам қайраткері Оразгүл Асанғазы.
Сөз соңында Жұмагүл Солтиева да өзі істеген қарашаңыраққа пейіл, көңілдері үшін алғысын жеткізді. Жұмагүл апай «Япырау» әнін жас күнінде жиі айтып, керемет жақсы көреді екен. «Көңіл көңілден су ішеді». Жақсы лебіз, әйбат құттықтауларды естіп, көңілі марқайған Жұмагүл апамыз қанатының астына маржан тағып, әндетіп кетіп бара жатқан жоқ па екен...
Бағашар ТҰРСЫНБАЙҰЛЫ,
«Егемен Қазақстан»
